Swensinye twawa ni nsambu zya kusola wino tuzipizile ukuwombela, nampo nge Yehova nanti e Satana ni vimizimu viwipe. Tutanga tuwombele wawili pa mpindi yonga. Fwandi cingazipa sana nga mwasolapo ukuwombela Yehova!

Ndi vino tuweni, iviwa vyatemwa sana ukucuzya awantu nu kuwawipa. Lelo e Yehova weni asa vino wawa, watutemwa wulyanye vino umukwasi wino wakunda awana wakwe akacita. Awino akapa “ica wila consinye icizima swinya icipwililike.” (Jemusi 1:17) Akapa awantu ivya wila ivizima nanti aca kuti ukucita wo-o kungalenga ayipusule.​—Waefeso 2:4-7.

Te yelenganyani pa vintu vino e Yesu, Umwana wa kwe Leza wacisile pano walinji mu nsi. Wapozizye wa ciwulu, nu kuziwula aminso ya ntonko. Wapozizye awa mambombo na walemale. Wafumizye iviwa nu kupozya imisango yonsinye iya ndwala. Swinya wawomvizye na maka yano Leza wamupile ukuzyulupula awafwe.​—Mateyu 9:32-35; 15:30, 31; Luka 7:11-15.

E Leza asiwipa, lyonsinye akalanda icisinka. Asitela wipepo uwufi.​—Impendwa 23:19.

Iviwa vikalema awantu awavule nkaninye wulyanye vino ikonde lye tandawulwe likalema insazi. Vyalenga awavule ukutalika ukutina awafwe, ukutipana, ukuzwala incilisi, nu kutalika ukuwomvya ivizimba. Swinya vyalenga awantu ukuzumila intambi zya kwe Satana ni visambilizyo vya wufi. Awawomvi wa kwe Leza wasilemwa mu citeyo nanti cimwi pe vyo-o.

E Yehova wawa na maka nkaninye ukucila e Satana. Acino aliwamicinjilila ku viwa nga ca kuti mu kumuwombela. (Jemusi 4:7) Kusi nanti wenga wino angamivina. Ku ca kulolelako, ku Nigeria, wa sing’anga watatu walondanga ukukoma e Nte wumwi pano wakanile ukufuma mu kaya. Walile wapotwa ukumuvina, e sing’anga wenga pe wa-a wivwile intete swinya wayile ku mwanawitu nu kuya mukulenga ukuti amutetele.

Iviwa nga viza mukumicuzya, muwapepa kwe Yehova nu kulumbula izina lyakwe, nawe aliwamicinjilila. (Imilumbe 18:10) Nomba pa kuti Yehova atwalilile ukumicinjilila, muzipizile ukuleka ukuwomvya icili consinye cino wakawomvya pa kwivwana ni mizimu. Wonye wo-o avino awawomvi wa kwe Leza wano wikalanga mu Efeso wacisile. Walonganisile amabuku yonsinye yano wawomvyanga pa kwivwana ni mizimu nu kuyoca. (Imilimo 19:19, 20) Na pe yonye impindi avino awawomvi wa kwe Leza wazipizile ukucita. Acino muzipizile ukusumba incilisi, impundu, na vino wakawomvya pa “kuyisinka”, ivizimba, amabuku ya mayele, na vyonsinye vino vyalemenkana nu kwivwana ni mizimu.

Mutazipizile ukupelela vye pa kufuma mukupepa kwa wufi nu kuleka ukucita iviwipe nga ca kuti mu kulonda ukusecelesya Leza. Muzipizile ukuwoma mu kupepa kwa cisinka. E Baibolo ikatunena vino tuzipizile ukucita:

E Satana ni viwa wawa na wantu mu nsi wano wakasambilizya nu kucita iviwipe. E Yehova nawenye wawa na wantu wakwe. Wa-a awantu, Ante zya kwe Yehova. (Ayizeya 43:10) Ukuzinguluka insi, kwawa wa Nte ukucila pe 8 millioni. Wonsinye wakakwelezya na maka ukucita ivizima nu kusambilizya wanji icisinka ica mu Baibolo. Mu nsi imvule, ungawazana pa Ng’anda ya Wufumu, swinya nga wiza wayapo walikupocelela ni nsansa.

Umulimo wawo awakwavwa wanji ukuwombela Leza. Walimisambilizya e Baibolo pa ng’anda yinu, pa kuti mumanye vino muzipizile ukucita pa kuti muwapepa e Yehova. Mutazipizile ukuwalipila. Cino cikalenga wasambilizya wanji pa cisinka ca mu Baibolo, akukunda Yehova na wantu.