Kua fai fifiliaga oti a tautolu. Ko e fekafekau a tautolu ki a Iehova po ke fekafekau ki a Satani mo e haana tau temoni. Nakai maeke a tautolu ke taute ua. Ko e iloilo ha a ia ke fekafekau ki a Iehova!

Tuga he kitia e tautolu, kua fiafia lahi e tau temoni ke fakamamahi mo e fakahēhē e tau tagata. Kua nakai pihia a Iehova. Kua fakaalofa a ia ke he tau tagata tuga e matua taane kua fakaalofa ke he haana fanau. Ko ia ko e Foaki he tau “mena mitaki oti . . . katoa mo e tau mena fakaalofa oti kua katoatoa ai e mitaki.” (Iakopo 1:17) Kua nakai taofi e ia ha mena mitaki taha mai he tau tagata, pete ni he totogi lahi mahaki ki a ia.—Efeso 2:4-7.

Manamanatu la ke he tau mena ne taute e Iesu he lalolagi ko e Tama he Atua. Ne taute e ia e tau tagata kuhukuhu ke vagahau mo e fakaala e tau matapouli. Ne fakamaulu e ia e tau lepela mo e tau tagata kulikuli. Ne vega kehe e ia e tau temoni mo e fakamaulu e tau vahega gagao oti. Kua maeke ia Iesu ha ko e malolō he Atua, ke fakatū hake e tau tagata mamate ke he moui.—Mataio 9:32-35; 15:30, 31; Luka 7:11-15.

Ha kua nakai talahau e tau pikopiko ke fakahēhē aki a tautolu, kua talahau tumau he Atua e kupu mooli. Kua nakai fakahēhē e ia ha tagata taha.—Numera 23:19.

Tuga ni e fata kufani ne taofi nivaniva e lago, ti ko e tau miliona he tau tagata ne taofi nivaniva pihia he matakutaku teao mo e mahani pikopiko. Kua matakutaku a lautolu ke he tau tagata mamate. Kua matakutaku a lautolu ke he tau temoni. Kua tupetupe lahi a lautolu ke he tau malaia, tau fakamailoga kelea, tau lagatau taulatua, mo e tau koloa ne ha ha i ai e malolō kelea. Ne līlī a lautolu ke he tau mena ne talitonu ki ai mo e tau aga tuai ne fakavē ke he tau pikopiko ha Satani ko e Tiapolo. Ko e tau fekafekau ha Iehova ne nakai kototia he ha mena taha he tau mena na.

Kua mua ue atu e malolō a Iehova ki a Satani. Ka fekafekau a koe ki a Iehova, to puipui e ia a koe mai he tau temoni. (Iakopo 4:7) To nakai gahua e malolō fakataulatua ia ki a koe. Ko e taha fakamaamaaga, i Nigeria, tokotolu e taulatua malolō lahi ne taute e tau lagatau fakataulatua ke kelipopo aki e Fakamoli a Iehova, ko ia ne fakatikai e ia ke toka e taone. Ko e magaaho ne kaumahala ai e tau lagatau fakataulatua, ne matakutaku lahi ai e taha he tau taulatua, ti fano a ia ke he Fakamoli, mo e ole ke fakaalofa hofihofi age ki a ia.

Kaeke ke fakakelea he tau temoni a koe, ti hea e koe e higoa a Iehova, to puipui e ia a koe. (Fakatai 18:10) Ke maeke ia koe ke moua e puipuiaga he Atua, kua lata ia koe ke fakaataina katoa mai he tau mena oti ne fio fakalataha mo e tau agaaga talahau tuai mo e tapuakiaga ke he tau temoni. Na taute he tau tagata tapuaki he Atua i Efeso i tuai e mena ia. Ne oko oti e lautolu ha lautolu a tau tohi fakataulatua mo e tugi a lautolu. (Gahua 19:19, 20) Ko e tau fekafekau he Atua he vahā nei kua lata ke taute e mena taha ia ni. Kia moumou ia koe e tau lagatau taulatua, tau koloa tui puipui aitu, tau kave afo “puipuiaga,” tau koloa ne ha ha i ai e malolō kelea, tau tohi taulatua, mo e ha mena he tau mena foki ne matutaki mo e tau tauteaga agaaga fakatemoni.

Ka manako a koe ke fakafiafia e Atua, nakai la lahi ia kaeke ke fakaoti ni hokoia e tapuakiaga pikopiko mo e fakaoti e taute he tau mahani kelea. Kua lata ia koe ke taute fakamalolō e tapuakiaga meā katoatoa. Kua fakakite mai he Tohi Tapu e tau mena kua lata:

Kua ha ha ia Satani mo e tau temoni e tau tagata he lalolagi ne fakaako mo e taute e tau mahani hehē. Ka kua ha ha ia Iehova foki e tau tagata. Ko lautolu haia ko e Tau Fakamoli a Iehova. (Isaia 43:10) Ha ha he lalolagi katoa, kua molea e ono e miliona he Tau Fakamoli. Ko lautolu na kua lali fakamalolō oti ke taute e tau gahua mitaki mo e fakaako e kupu mooli ke he tau tagata. Ke he loga he tau motu, kua maeke ia koe ke feleveia mo lautolu he tau Fale he Kautu, to fakafeleveia fiafia e lautolu a koe.

Ko e gahua ha lautolu ko e lagomatai he falu ke fekafekau ke he Atua. To fakaako e lautolu mo koe e Tohi Tapu he kaina haau, mo e lagomatai atu a koe ke fakaako ke tapuaki ki a Iehova he puhala hako. To nakai totogi e koe e fakaakoaga nei. Kua fiafia lahi e Tau Fakamoli ke fakaako e kupu mooli ha kua fakaalofa a lautolu ke he tau tagata mo e fakaalofa a lautolu ki a Iehova e Atua.