Sirbi Jehova, No Satanas
Nos tur por scoge. Sea nos ta sirbi Jehova of nos ta sirbi Satanas i su demoñonan. Nos no por sirbi tur dos. Ki sabí ta pa sirbi Jehova!
Jehova ta bon
Manera nos a mira, e demoñonan ta disfrutá di haci daño i gaña hende. Jehova no ta asina. E ta stima humanidad mescos cu un tata ta stima su yunan. E ta e Dunador di “tur bon don i tur regalo perfecto.” (Santiago 1:17) E no ta tene nada bon atras for di humanidad, ni a gran costo di su mes.—Efesio 2:4-7.
Pensa riba e cosnan cu Jesus, Dios su Yu a haci riba tera. El a pone esnan muda papia i a duna bista na esnan ciegu. El a cura leproso i hende coho. El a saca demoño i a cura tur sorto di malesa. Jesus, mediante Dios su poder, asta a lanta e mortonan na bida.—Mateo 9:32-35; 15:30, 31; Lucas 7:11-15.
Enbes di conta nos mentira pa dwal nos, Dios semper ta papia e berdad. E nunca ta gaña ningun hende.—Número 23:19.
Evitá prácticanan sushi
Mescos cu un cas di araña ta gara un muskita, miyones di hende ta den gara di supersticion i falsedad. Nan tin miedu dje mortonan. Nan tin miedu dje demoñonan. Nan ta preocupá tocante maldicion, siñal, amuleto i contranan. Nan ta mará na creencia i tradicionnan basá rib’e mentiranan di Satanas e Diabel. Dios su sirbidornan no ta ser engañá dor di ningun dje cosnan aki.
Jehova ta hopi mas poderoso cu Satanas. Si bo ta sirbi Jehova, lo e protegá bo for dje demoñonan. (Santiago 4:7) Brua lo no traha riba bo. Por ehempel, na Nigeria, tres hacidor di brua poderoso a haci brua pa mata un Testigo di Jehova cu a nenga di bandoná e stad. Ora e brua a faya, un dje hacidornan di brua cu a haña miedu, a bai cerca e Testigo i a rogu’é pa misericordia.[9]
Si e demoñonan ta molestiá bo, bo por inbocá Jehova na nomber i lo e protegá bo. (Proverbio 18:10) Pero pa bo por haña Dios su proteccion, bo mester librá bo completamente di tur cos asociá cu spiritismo i adoracion di demoño. Adoradornan di Dios den Efeso di antigua a haci esei. Nan a recogé tur nan bukinan di magia i a kima nan. (Echo 19:19, 20) Dios su sirbidornan d’jawe mester haci mescos. Deshací di “furu,” amuletonan, cadena pa “proteccion,” contra, bukinan di magia i cualkier otro cos cu ta conectá cu prácticanan spiritista.
Practicá adoracion berdadero
Si bo kier agradá Dios, no ta suficiente pa simplemente bandoná adoracion falsu i stop di haci cosnan malu. Bo mester practicá adoracion puru activamente. E Bijbel ta mustra loke ta ser rekerí:
Asociá cu Testigonan di Jehova
Satanas i e demoñonan tin hende riba tera cu ta siña i practicá cosnan robes. Pero Jehova tambe tin un pueblo. Nan ta Testigonan di Jehova. (Isaias 43:10) Rond mundu tin mas cu seis miyon Testigo. Nan tur ta traha duru pa haci bon cosnan i pa siña hende e berdad. Den mayoria pais, bo por topa nan na e Salon di Reino, caminda nan calurosamente lo yamá bo bon biní.
Nan trabou ta pa yuda otronan sirbi Dios. Nan lo studia e Bijbel cu bo den bo cas, yudando bo con siña pa adorá Jehova n’e manera corecto. Bo no mester paga pa esaki. E Testigonan ta contentu pa siña na otronan e berdad pasobra nan ta stima hende i nan ta stima Jehova Dios.