Diostayá yupaychasun, amayá satanastaqa
Sapakamam tantiakunanchik pita servinapaq. Diostachu servisun icha satanastawan demoniokunatachu, manam iskaynintaqa servichwanchu. ¡Mayna allinmi Jehova Diosllata serviyqa!
Jehova Diosqa kuyakuqmi
Yachamusqanchikman hinam demoniokunaqa runakunata pantachispan ñakarichin. Diosmi ichaqa mana chaynachu, payqa taytanchikmi chaymi anchata kuyawanchik. Paymantam hamun “tukuy imapas allin kaqkunaqa hinaspa allinkuna chaskisqanchikqa” (Santiago 1:17). Allin kaqkunamantaqa manam harkawanchikchu (Efesios 2:4-7).
Jesusqa runakunatam sanoyaykachirqa paykunata kuyasqanrayku.
Jesuspas kay pachapi kachkaspanmi runakunata kuyaspan mana rimaqkunata rimarichirqa, ñawsakunata qawarichirqa, unquqkunata sanoyachirqa, wistukunata allinyachirqa, demoniokunapa ñakarichisqan runakunata yanapaykurqa. Diospa atiyninwantaqmi wañuqkunatapas kawsarichirqa (Mateo 9: 32-35; 15: 30, 31; Lucas 7: 11-15).
Diosninchikqa kuyawaspanchikmi imam kaqta willawanchik. Payqa manam haykaqpas llullakunmanchu (Numeros 23:19).
Saqisunyá mana allin ruwaykunataqa
Imaynam chuspipas qunqaymanta arañapa llikanman wichiykun, chaynam achka runakuna pantaykunaman wichiykunku. Hinaspankum wañuqkunata, demoniokunata manchakunku, manchakunkutaqmi pipas layqata ruwarunanta piensaspanku. Paykunaqa watasqa hinam tarikunku satanasmanta hamuq costumbrekunawan. Diosta serviqkunam ichaqa mana chaynachu tarikunchik.
Diosqa aswan atiyniyuqmi satanasmantaqa, payta serviptinchikqa waqaychawasunmi (Santiago 4:7). Nigeria nacionpim kimsa brujokuna huk testigota layqata ruwaspanku wañuchiyta munarqaku, ichaqa manam atirqakuchu. Chayta qawaspanmi huknin brujo wasinman rispan llakipayaykunanpaq mañakurqa.
Efeso llaqtayuq runakunaqa Diosta serviyta qallaykuspankum layqamanta rimaq libronkuta kañarqaku.
Demoniokuna ñakarichisuptikiqa Jehova Diostayá sutinmanta qayakuy, payqa waqaychaykusunkim (Proverbios 18:10). Chaypaqqa manam brujokunapa hinaspa demoniokunapa kaqkunaqa kapusunaykichu. Chaytam ruwarqaku Efeso llaqtayuq runakunapas. Paykunaqa layqata ruwanankupaq libronkuta huñuykuspankum kañaykurqaku (Hechos 19: 19, 20). Diosta serviq runakunapaqa manam kapuwananchikchu mana allinkunamanta harkawananchikpaq kaqkunaqa.
Diostaqa yupaychay munasqanman hina
Jehova Dioswan kuyachikunaykipaqqa manam mana allin costumbrekunatawan mana allin ruwaykunallatachu saqinayki. Aswanqa Diostam munasqanman hina yupaychanayki. Chaypaqqa kaykunata ruway:
Huñunakuykunamanmi rinayki (Hebreos 10:24, 25).
Bibliamantam yachanayki (Juan 17:3).
Diosmantam willakunayki (Mateo 24:14).
Diostam mañakunayki (Filipenses 4:6, 7).
Bautizakunaykim (Hechos 2:41).
Jehova Diospa testigonkunawan hukllawakuy
Satanaspawan demoniokunapaqa kay allpa pachapim serviqninkuna kan. Ichaqa Diospa serviqninkunapas kanmi, paykunaqa Jehova Diospa testigonkunam (Isaias 43:10). Enteron allpa pachapim 8 millon masnin kachkaniku. Kallpanchakunikum allin kaqta ruwanaykupaq, runakunaman Diosmanta yachachinaykupaq. Huñunakusqayku wasiman hamuptikiqa kuyakuywanmi chaskiykusqaykiku.
Munaptikiqa wasikipim bibliamanta yachachikikuman. Bibliapiqa yachasunmi Jehova Diosta munasqanman hina servinapaq. Ancha-anchatam kusikuniku runakunaman Diosmanta yachachispayku. Mana qullqillapaqtaqmi yachachinikupas.
Jehova Diospa testigonkunaqa Diosta servinaykipaqmi yanapasqaykiku.
