Tucuicunallatami Jehovata sirvinata o Satanasta paipa demoniocunata sirvinata decidina capanchi. Pero ishcandita sirvinaca na alichu can. Jehová Diostalla sirvinata decidinami alipacha can.

Imashinami ña ricupashcanchi, demoniocunaca gentecunata llaquichinata, umachinatapashmi gushtan. Pero Jehová Diosca na shina canllu. Paica shuj taita paicunapa huahuacunata juyanshnami gentecunataca juyan. Jehová Diosca imagutapash na mitsashpami “jahua cielomandaca ashtahuan alipacha regalocunata caramun” (Santiago 1:​17, TNM). Jehová Diosca ñucanchita ninanda juyaimandaca, paipa Churigutapashmi ñucanchimanda huañuchun caramurca (Efesios 2:​4-7).

Taita Diospa Churi Jesucristo cai alpapi cashpa ima cosascunatalla rurashcapi pensaripai. Paica lepra unguita charijcunata, suchugucunata, aya catishca gentecunata, shuj shuj unguicunata charij gentegucunatami jambirca. Jehová Diospa poderhuanga, Jesusca hasta huañushcacunatapashmi causachirca (Mateo 9:​32-35; 15:​30, 31; Lucas 7:​11-15).

Llullacunahuan ñucanchita umachinapa randica, Jehová Diosca siempremi verdadta parlan. Paica nunca na pitapash umachingachu (Números 23:19).

Caipi pensaripashunchi, shuj chuspi telarañapi pillurishpaca nimamanda ñana llujshita ushanllu. Shina cuendami ashtaca millón gentecunaca, Satanaspa llullacunapi, trampacunapipash pillurinshna urmashca. Chaimandami huañushcacunata, demoniocunatapash manllashpa causan. Shinallata brujeriamanda, suertemanda, muscuicunamandapashmi gentecunaca preocupadomi causan. Huaquingunaca Satanás llullashpa yachachishca costumbrecunata crishpami causan. Pero Taita Diosta sirvijcunaca, chai trampacunahuan Satanás umachichunga na saquishcachu.

Jehová Diosca, Satanasta yali podertami charin. Jehová Diosca paita sirvijpica demoniocunamandapashmi cuidanga (Santiago 4:7). Pipash brujuchijpipash imapash na pasangachu. Por ejemplo, Nigeria llactapica shuj Testigo de Jehovataca paipa pueblogumanda na ringapaj munajpimi, quimsapura brujocunaca brujuchishpa huañuchingapaj munarca. Shinapash chai brujocunapa brujuchishcacunaca imatapash na rurarcachu. Chaimi shuj brujocarin ninanda manllarirca. Shinallata chai Testigopaman rishpa perdonahuai nishpa mañarca.

Demoniocuna quiquinda molestanajujpica, Jehová Diospa shutipi mañapai. Shina rurajpica, Jehová Diosca cuidangami (Proverbios 18:10). Jehová Dios ñucanchicunata cuidashpa catichun munashpaca, demoniocunahuan ricuna cosascunata huasipi charishpaca tucuchitapachami tucuchina capangui. Punda tiempopi Éfeso llactamanda Taita Diosta sirvijcunaca chaitami rurarca. Paicunaca brujo tucungapaj, magiata yachajungapaj librocunatapash rupachishpami saquirca (Hechos 19:​19, 20). Y cunanbi Taita Diosta sirvijcunapash chaitallatami rurana can. Por ejemplo, imapash amuletocunata, huasita cuidachun nishca cosascunata, magiamanda parlaj librocunata o demoniocunahuan ricuna cosascunata charishpaca tucuchitapachami tucuchina capangui.

Taita Diosta cushichingapaca, panda yachachishcacunamanda caruyashpa nali cosascunata ruranata saquishca jahuapash, Taita Diospa cabal yachachishcacunata quiquinba causaipi pactachingapami esforzarina capangui. Chaita rurai ushangapaca Bibliapimi imacunatalla rurana cashcata yachachin:

Cai alpapica Satanaspa, demoniocunapa nali ruraicunata apoyaj gentecunami tian. Paicunami panda yuyaicunata, panda ruraicunata, panda costumbrecunata yachachin. Shinapash Jehová Diospashmi paita apoyaj gentecunata charin. Paicunaca Testigo de Jehovacunami can (Isaías 43:10). Mundo enteropica 8 millón yali Testigocunami tian. Paicunaca gentegucunaman Taita Diospa cabal yachachishcacunata predicangapaj, shinallata ali cosascunata rurangapapashmi esforzarin. Testigocunaca casi tucui llactacunapimi Salón del Reinocunapi tandanajun. Chaiman rijpica, paicunaca cushijushpami quiquindaca chasquinga.

Testigo de Jehovacunaca, shuj gentecunapash Taita Diosta sirvishpa causachunmi ayudan. Paicunaca Bibliamandaca gratismi yachachin. Jehová Dios munashcashna adorachunbashmi yachachinga. Testigo de Jehovacunaca Jehová Diosta, gentecunatapash juyaimandami Bibliamanda cushijushpa yachachinga.