Sheexaaneho Ikkikkinni, Yihowara Soqqami
Baalinkera doorshu noonke. Yihowara woy Sheexaanehonna durriissasira soqqama dandiineemmo. Lamenka doodha didandiineemmo. Yihowara soqqama lowo geeshsha busullete!
Yihowa Dancha Maganooti
Duriissa manna gawajjanna sorisiisa hagiirsiissannonsata laˈnoommo. Yihowa kayinni dihattooho. Annu oososi baxanno gede asse isi mannu ooso baala baxanno. Isi “dancha eltonna woˈmu atooti duuchchu” buichchooti. (Yaaqoobi 1:17) Lowo waaga xaˈmannosiha nafa ikkiro, mannu oosora danchare aate badhera dihiganno.—Efesooni 2:4-7.
Maganu Beetti Yesuusi uullate aana assinore wodanchi. Duuddichchu coyirannonna ballichchu laˈˈanno gede assino. Dhiiggaammanna laanshaawoota hursino. Durriissa fushshinonna xisso duuchcha hursino. Yesuusi Maganu wolqanni, reyitinore nafa kayisino.—Maatewoosi 9:32-35; 15:30, 31; Luqaasi 7:11-15.
Maganu kaphpho coyire ninke disorisiisanno, ayee woteno halaale coyiranno. Isi horonta ayeeno didoganno.—Zehulqu 23:19.
Batte Ikkinorinni Xeertidhe
Qiissanete mini teennichcho sarraaqe amadanno gede miliyoonetenni kiirranni manni busha ayyaanna ledo xaadu noo budinninna kaphphunni sarraaqamino. Reyitinorenna durriissa waajjanno. Rumo, quraama, digintenna ayyaanto kultanno barra waajjanno. Sheexaanu Daawuloosi kaphphinni xintamino budinninna ammaˈnanni saraaqantino. Maganu soqqamaano kayinni, togoo ikkito giddo mittete nafa disarraaqantino.
Yihowa Sheexaanunni roore wolqaataamooti. Ati Yihowara soqqamattoha ikkiro, durriissate gawajjonni agarannohe. (Yaaqoobi 4:7) Diginte ate aana diloossanno. Lawishshu gedera Nayijeeriyaaho, sasu egennantino kiilaano mittu Yihowa Farciˈraanchi katama agure fula giweenna shitara diginte daggantusi. Diginte loosa gibbuta kiilaanote giddo mittu waajje Farciˈraanchunniwa mare maaro xaˈmirino.
Durriissa qarrissannoheha ikkiro, Yihowa suˈma woshsha dandaatto, isino agarannohe. (Lawishsha 18:10) Ikkollana Maganu agarooshshi heeˈrahera hasiˈrittoro, busha ayyaanna ledo fiixooma afidhino ikkitonninna durriissa magansiratenni xeertira hasiissannohe. Biˈre Efesooni heedhanno manni Magano magansirate yite hatto assitino. Kiiltanno maxaaffa gamba assite giirtino. (Soqqamaanote Looso 19:19, 20) Yannankerano Maganu soqqamaano hatto assa hasiissannonsa. Bushurinni “agaranno” yinannirichchinni quraama wodhate, digintete, barra layirate, kiilate horoonsiˈnanni maxaaffanninna busha ayyaanna ledo fiixoomu noo ayee ikkitonni umokki keereensi.
Halaalu Magansira Millimmo Beeqqi
Magano hagiirsiisa hasiˈrittoro, kaphphu magansiranni xooqanna bushare assa agura calla diˈˈikkitanno. Halaalaancho magansira millimmora jawaantete beeqqa hasiissannohe. Qullaawu Maxaafi tini millimmo maatiro xawisanno:
Yihowa Farciˈraasine Ledo Jaaloomi
Sheexaanehonna durriissate uullate aana bunshe rosiissannonna assitanno daga noonsa. Yihowarano umisi daga noosi. Insano Yihowa Farciˈraasineeti. (Isayyaasi 43:10) Uullate aana, lee miliyoone saˈanno Farciˈraasine no. Baalunku danchare assatenna mannaho halaale rosiisate jawaattanno. Batinynye gobbara, Mangistete harira afattonsa. Hakkono hagiirrunni koyissannohe.
Loosinsa wolootu Maganoho soqqantanno gede kaaˈlate. Yihowa halaalunni hiittoo magansirattoro afatto gede kaaˈlitahera, minekki dagge Qullaawa Maxaafa rosiisate fajjaameeyyete. Konnira baatattori dino. Farciˈraasine mannanna Yihowa baxxanno daafira halaale rosiisa hagiirsiissannonsa.