Yumi olgeta yumi inap tingting: Yumi laik mekim wok bilong Jehova, o bilong Satan na ol spirit nogut? Yumi no inap mekim wok bilong tupela wantaim. Sapos yumi gat gutpela tingting bai yumi mekim wok bilong Jehova!

Yumi save pinis, ol spirit nogut i save amamas long mekim nogut long ol man na giamanim ol. Jehova i no save mekim olsem. Em i laikim tumas ol manmeri olsem papa i laikim tumas pikinini. Em i save givim “olgeta gutpela samting” long yumi, maski em i samting i dia tumas long em.—Jems 1:17; Efesus 2:4-7.

Tingim ol samting Jisas, em Pikinini bilong God, i bin mekim long graun. Em i mekim na ol mauspas i toktok na aipas i lukluk. Em i oraitim ol lepraman na ol lek nogut. Em i rausim ol spirit nogut na oraitim olgeta kain sik. Long strong bilong God, em i kirapim bek man i dai pinis.—Matyu 9:32-35; 15:30, 31; Luk 7:11-15.

God i no save mekim ol tok giaman bilong giamanim yumi; em i save mekim tok i tru tasol. God i no save giaman.—Namba 23:19.

Umben bilong binatang spaida i save kalabusim lang, na olsem tasol ol bilip giaman na tok giaman i save kalabusim planti milion man. Ol i pret long ol man i dai pinis. Ol i pret long ol spirit nogut. Ol i save tingting planti long tok bilong bagarapim ol, na long ol mak bilong samting i stap hait, na ol i tingting planti long sakim masalai. Ol bilip na pasin em tok giaman bilong Satan i as bilong en i kalabusim ol, tasol ol wokboi bilong Jehova, nogat.

Jehova i gat bikpela strong, winim tru Satan. Sapos yu mekim wok bilong Jehova bai em i lukautim yu, na ol spirit nogut i no inap bagarapim yu. (Jems 4:7) Ol kain posin na marila i no inap mekim wanpela samting long yu. Long Naijiria 3-pela strongpela posinman i laik kilim i dai wanpela Witnes Bilong Jehova i no laik lusim taun. Tasol posin bilong ol i no gat strong, olsem na wanpela bilong ol em i pret na i go askim Witnes long marimari long em.

Sapos ol spirit nogut i mekim nogut long yu, yu ken singaut na kolim nem bilong Jehova na em bai lukautim yu. (Sindaun 18:10) Tasol yu mas lusim olgeta wok bilong ol spirit nogut bambai Jehova i ken lukautim yu. Ol Efesus i lotuim God long bipo ol i bin mekim olsem. Ol i kukim olgeta buk bilong ol i stori long marila posin samting. (Aposel 19:19, 20) Ol man i laik i stap wokman bilong God long nau, ol tu i mas rausim olgeta samting i bilong wokim marila o posin o sakim masalai samting. No ken spetim kawarwar o holim skin diwai o pasim salat long bilum bilong “lukautim” yu o pikinini, o mekim narapela pasin olsem em i wok bilong ol spirit nogut.

Sapos yu laik bai God i amamas long yu, yu mas lusim lotu giaman na ol pasin nogut, na yu mas mekim wanpela samting moa—yu mas kirap bihainim lotu i tru. Baibel i kolim ol samting yu mas mekim:

Satan na ol spirit nogut i gat ol wokboi bilong ol long graun em ol i save lainim ol man long ol tok giaman na ol i bihainim ol pasin i kranki. Tasol Jehova tu i gat ol wokboi bilong em. Em ol Witnes Bilong Jehova. (Aisaia 43:10) Long olgeta hap bilong graun winim 6 milion Witnes ol i stap. Olgeta i save wok strong long bihainim ol gutpela pasin na lainim ol man long ol tok i tru. Long planti kantri yu inap bung wantaim ol long Haus Kingdom. Bai ol i amamas long lukim yu i kam bung wantaim ol!

Wok bilong ol em bilong helpim ol man long mekim wok bilong God. Ol i laik i kam long haus bilong yu na lainim yu long Baibel, na helpim yu bambai yu inap lotuim Jehova long pasin i stret, na ol i no save singaut long pe. Ol Witnes i amamas long lainim ol man long tok i tru, long wanem ol i laikim tumas ol man na ol i laikim tumas God Jehova.