E isi se filifiliga mō tatou katoa. Me e tavini atu tatou ki a Ieova io me e tavini atu tatou ki a Satani mo ana temoni. E se mafai o fai katoa te avā mea konā. E pefea te ‵lei ke tavini atu ki a Ieova!

E pelā mo mea ko oti ne matea atu ne tatou, e fia‵fia sāle te kau temoni ke fakapa‵kia ne latou a tino kae ke fakaloi‵loi foki ne latou a tino. Kae e se penā a Ieova. E alofa a ia ki tino e pelā me se tamana e alofa ki ana tama‵liki. Ko ia ko te Tino telā e tuku mai ne ia “a mea ‵lei katoa kola e maua fua mo meaalofa katoatoa takitasi.” (Iakopo 1:17) E se taofi ne ia se mea ‵lei mai i tino, faitalia me e pefea te faigata ki a ia.—Efeso 2:4-7.

Ke mafau‵fau ki mea kolā ne fai ne te Tama a te Atua, ko Iesu, i te lalolagi nei. Ne fai ne ia ke fai‵pati a tino gūgū kae ne faka‵pula ne ia a mata o tino ‵kivi. Ne faka‵lei aka ne ia a tino lepela mo tino ‵pili. Ne ‵tuli keatea ne ia a temoni kae ne faka‵lei aka ne ia a vaegā masaki valevale katoa. Ona ko te malosi o te Atua, ne toe faka‵tu aka foki ne Iesu a tino ‵mate ki te ola.—Mataio 9:32-35; 15:30, 31; Luka 7:11-15.

I lō te taku atu o pati ‵loi ke fakaloiloi mai ki a tatou, e faipati  faeloa te Atua ki te munatonu. E se mafai lele eiloa o fakaloiloi ne ia se tino.—Numela 23:19.

E pelā mo te ‵lave o se lago i te leveleve o te naleau, e penā foki te ‵lave mautakitaki o te fia miliona o tino i manatu ‵se mo akoakoga ‵se. E ma‵taku latou ki tino ‵mate. E ma‵taku latou ki temoni. E manava‵se latou ki pati fetu, pati ‵lau, fagu tausi, mo tupua. E saisaitia latou i talitonuga mo faifaiga masani kolā e fakavae ki pati ‵loi a Satani te Tiapolo. E se ‵lave a tavini a te Atua i mea konā.

E sili atu te malosi o Ieova i lō Satani. Kafai e tavini atu koe ki a Ieova, ka puipui ne ia koe mai i te kau temoni. (Iakopo 4:7) Ka se ma‵goi a pati fetu kolā e fai atu ki a koe. E pelā mo te mea ne tupu i Naitilia, e tokotolu a tino faivailakau kolā e isi ne olotou ‵mana ne fai ne latou a pati fetu ke tamate ei se Molimau a Ieova telā ne ita ma tiakina ne ia te fa‵kai. I te taimi ne seki magoi ei te faiga o pati fetu konā, ne gasolo o mataku te tino faivailakau e tokotasi, ne fanatu a ia ki te Molimau, kae ne akai atu ke fakamagalo mai a ia.

Kafai e fakalavelave mai te kau temoni ki a koe, e mafai ne koe o kalaga atu ki a Ieova kae ka puipui ne ia koe. (Faataoto 18:10) Kae ke maua ne koe te puipuiga a te Atua e ‵tau mo koe o ‵kalo katoatoa keatea mai i mea katoa kolā e aofia i te faivailakau mo te ifo ki temoni. Tenā eiloa te mea  ne fai ne tino kolā ne tapuaki ki te Atua i te fa‵kai mua ko Efeso. Ne ‵luku fakatasi ne latou olotou tusi faivailakau katoa kae ne ‵sunu. (Galuega 19:19, 20) E ‵tau foki o fai penā a tavini a te Atua i aso nei. Ke na ave keatea mai i a koe a fagu tausi, sai, uka “puipui,” tupua, tusi faivailakau, penā foki loa mo so se isi mea telā e aofia i faifaiga faivailakau.

Kafai e manako koe ke fakafiafia atu ki te Atua, e se lava fua  i te tiakina ne koe o tapuakiga ‵se kae ke fakagata foki ne koe te faiga o mea ma‵sei. E ‵tau eiloa o kau tonu atu koe ki te tapuakiga ‵mā. E fakaasi mai ne te Tusi Tapu me ne a mea e manakomia i ei:

E isi ne tino o Satani mo te kau temoni i te lalolagi nei kolā e akoako atu a mea ‵se kae e fai foki ne latou a mea ‵se. Kae e isi foki ne tino o Ieova. A latou ko Molimau a Ieova. (Isaia 43:10) I te lalolagi kātoa ko sili atu nei i te toko ono miliona o Molimau. A latou katoa e taumafai malosi o fai a mea ‵lei kae ke akoako atu foki ki tino e uiga ki te munatonu. I te lasiga o fenua, e mafai o fetaui koutou i te Kingdom Hall, ko te koga telā ka fia‵fia latou o talia koe i ei.

A te lotou galuega ko te fesoasoani atu ki nisi tino ke tavini atu ki te Atua. Ka fai ne latou se akoga fakatasi mo koe i te Tusi Tapu i tou fale, kae ka fesoasoani atu foki ki a koe me e mafai pefea o tapuaki atu koe ki a Ieova i te auala tonu. E se ‵tau o ‵togi ne koe te mea tenā. E fia‵fia te kau Molimau ke akoako atu te munatonu me e a‵lofa latou ki tino kae e a‵lofa foki latou ki a Ieova te Atua.