Jwalijose akwete ufulu wakusagula jwakuti amtumichileje, kanga Yehofa kapena Satana ni yiŵanda yakwe. Nambo nganiyiŵa yikomboleche kwatumichila wosopeŵa ndaŵi jimo. Luli lunda kusagula kumtumichila Yehofa. Ligongo chichi?

Mpela mwatuyiwonele, yiŵanda yikusasangalala ni kwawulasya soni kwalambusya ŵandu. Nambo Yehofa nganaŵa myoyo. Jwalakwe akusatunonyela mpela mwakusatendela mtati pakumnonyela mwanache jwakwe. Jwalakwe ni jwakusapeleka “mtuka wuliwose wambone.” (Yakobo 1:17) Yehofa jwangajima ŵandu ŵakwe chindu chilichose chambone atamose pandaŵi jele kutenda yeleyo mpaka yiŵe yakupweteka mnope kwa jwalakwe.—Aefeso 2:4-7.

Aganichisye yaŵatendaga Yesu, jwali Mwanache jwa Mlungu. Jwalakwe ŵatendekasyaga ŵandu ŵangaŵecheta kuti atande kuŵecheta, ŵandu ŵangalola ŵatandaga kulola. Ŵaposyagasoni ŵandu ŵamatana soni ŵalemale. Yesu jwakoposyagasoni yiŵanda nambosoni kuposya yilwele yakulekanganalekangana. Ni machili ga Mlungu Yesu jwayikene pakwajimusya ŵandu ŵane ŵaŵawile.—Mateyu 9:32-35; 15:30, 31; Luka 7:11-15.

Mmalo mwakuti Mlungu atulambusyeje pakusaka kutusokonasya, jwalakwe ndaŵi syosope akusatusalila yisyesyene. Chitandilile, Mlungu pangali pamlambwisye mundu.—Numeli 23:19.

Mpela mwalukusatendela lunanambuli pakamula membe, ŵandu ŵajinji moŵa agano ali mpela achikapolo ŵa ngani syakulupilila yamisimu soni yaunami. Jemanjaji akusiŵajogopaga ŵandu ŵawe. Akusayijogopa yiŵanda. Akusatamila kudandawula kuti mwine ŵane chiŵaloje kapena chiŵatende yamasenga yineyakwe. Ali achikapolo ŵa yikulupi soni miyambo jaunami ja Satana. Ŵakutumichila ŵa Mlungu nganaŵa achikapolo ŵa yindu yeleyi.

Yehofa ali jwamachili mnope kumpunda Satana. Naga akusamtumichila Yehofa, jwalakwe chachachenjela wawojo ku yiŵanda. (Yakobo 4:7) Mundu nganaŵa akombwele kwaloga. Mwachisyasyo, ku Nigeria asing’anga ŵatatu ŵamlogaga jwamboni jwine juŵakanaga kutyoka mu tawuni jawo. Jemanjaji ŵasakaga kuti jwambonijo awe, nambo yalepelekaga. Yaŵasakagayo payalepelechekwe, jumo mwa asing’angawo wamkamwile mnope woga mwamti ŵapite kwa jwambonijo kukumŵenda kuti amtendele chanasa.

Naga yiŵanda yikwalagasya mpaka aŵilanjile pa lina lya Yehofa soni jwalakwe mpaka ŵachenjele. (Misyungu 18:10) Nambo kuti Mlungu ŵachenjeleje akusosekwa kuleka chilichose chakwayana ni yamisimu soni kulambila yiŵanda. Yeleyi ni yaŵatesile ŵakutumichila ŵakala ŵa ku Efeso. Ŵasongangenye mabuku gosope ga yamasenga ni kugachoma moto. (Masengo 19:19, 20) Lelojinosoni, ŵakutumichila ŵa Mlungu akusosekwa kutendasoni myoyo. Akusosekwa kwasa chilichose chakwayana ni yamisimu kanga mabuku ga yamasenga, kapena yindu yakusawala ŵandu pakusaka kulichenjela kuti yindu yausaŵi.

Naga akusaka kumsangalasya Mlungu, nganikuŵa kwakwanila gamba kuleka kulambila kwaunami soni kuleka yakusakala. Nambo akusosekwasoni kutendaga yindu yakwayana ni kulambila kusyesyene. Baibulo jikusatusalila yindu yatukusosekwa kutenda. Yindu yakwe yili yakuyichisyayi:

Satana ni yiŵanda akwete ŵandu pachilambopa ŵakusajiganya soni kutenda yindu yakusakala. Nombenajo Yehofa akwete ŵandu ŵakwe. Ŵandu ŵeleŵa ali ŵamboni sya Yehofa. (Yesaya 43:10) Ŵamboniŵa apali ŵakupunda 8 miliyoni pachilambo chosope chapasi. Wosopeŵa akusalingalinga kutenda yambone soni akusajiganya yisyesyene. M’yilambo yejinji, mpaka asimane ni ŵamboniŵa pa Nyumba ja Uchimwene. Jemanjaji chachimpochela ni makono gaŵili.

Masengo gawo gali kwakamuchisya ŵane kuti atande kumtumichila Mlungu. Jemanjaji mpaka ŵajiganye Bibulo, mwamti chachakamuchisya wawojo kuti amtumichileje Mlungu m’litala lyakuŵajilwa. Chachilijiganya mwalulele. Ŵamboni sya Yehofa akusasangalala kwajiganya ŵandu yisyesyene ligongo akusiŵanonyela ŵanduwo soni akusamnonyela Yehofa Mlungu.