Weküfü ka tañi wedake püllü, pichilewey ñi ngünenkamekeafiel tati pu che. Jewba dew (chay no) ütrüfnakümpafi Mapu mew (Apokalipsi 12:9). Ka tuntelewelay Jewba ñi weychayafiel ta Weküfü ka tañi pu inuma. Tati apostol Juan pey kiñe perimontun reke Chaw Ngünechen mu küpalu, fey feypi: “Pefiñ kiñe werken püllü nagpalu ta wenu mapu küpalnielu ti abismo ñi llafe ka kiñe fütra kadena küpalniey ñi kuwü mew. Fey tüfeychi werken püllü trarifi tati weküfü filu, tüfeychi fütra kuyfi mew mülekechi weküfü filu fey ta weküfü ka Satana pingekelu, fey trarifi kadena mew kiñe warangka tripantu. Ütrüftukufi tati fütra lolo mew, feymew rakümtukukünufi, ka tukukünuy ta kiñe sellu tati puerta mew tañi ngünenkawenoafiel tati trokiñke mapu mew mülechi pu che rupale wüla ta kiñe warangka tripantu” (Apokalipsi 20:1-3). Fey wüla, Weküfü ka tañi pu wedake püllü apümngeayngün (Apokalipsi 20:10).

Ka tati pu wedake che mülelu Mapu mu ka femngechi apümkangeay (Salmo 37:9, 10; Luka 13:5).

Rakümtukungele Weküfü ka tañi wedake püllü, Jewba müna kümelkayafi tati pu che. Tukulpange, pu layelu niewelay mongen, chew no rume mülelayngün. Jesu feypi tati lan dungu umaw reke feley, pu layelu fütra küme ümawtuleyngün reke, ka pewmakelayngün rume (Juan 11:11-14). Tüfachi dungu feypi Jesu kimlu am ñi küpayal ti antü kom pu layelu ñi wiñomongetual, trepelngetuay engün kiñe che umawtulelu reke. Ka feypi: “Fey akule tati antü itrokom tati pu layelu [...] tripapatuay engün ñi rüngan küfwe mew” (Juan 5:28, 29; ka papeltuafuymi Hecho 24:15).

Wiñomongetuayngün Mapu mew. Allküngewelayay kiñe werken ñi feypial ‘lay kiñe che’, welu may ¡ayüwün mu feypingeay ñi wiñomongetun ti pu che! ¡Müna ayüwün-ngeay taiñ llowal kom taiñ pu che ñi wiñomongetun mu!