Nomba line fye, Satana ne fibanda fyakwe bali no kuleka ukubepa abantu. Yehova alibatamfya kale ku muulu. (Ukusokolola 12:9) Kabili nomba line ali no kukanda Satana ne fibanda fyakwe. Umutumwa Yohane alimwene icimonwa icafumine kuli Lesa. Atile: “Kabili namwene malaika aleika mu muulu ali na makii ya pa cilindi icabula impela no munyololo uukalamba mu minwe yakwe. Kabili aikete icing’wena, icisoka ca pa kutendeka, e kutila Kaseebanya kabili Satana, no kucikaka imyaka 1,000. Kabili acipoosele mu cilindi icabula impela no kwisalapo no kukomenena pa muulu wa ciko, pa kuti cilufya na kabili inko mpaka imyaka 1,000 ikapwe.” (Ukusokolola 20:1-3) Pa numa ya ifi, Lesa akonaula Satana ne fibanda fyakwe.—Ukusokolola 20:10.

Lesa akonaula na bantu abacita ifyabipa.—Amalumbo 37:9, 10; Luka 13:5.

Pa numa yakonaula Satana ne fibanda fyakwe, Yehova akapaala abantu icine cine. Mufwile muleibukisha ukuti Baibolo itila abafwa balaleka ukubako. Yesu alingenye imfwa ku kulaala utulo ukwabula ukuloota. (Yohane 11:11-14) Icalengele alinganye imfwa ku tulo ni co alishibe ukuti abafwa bakabuushiwa. Atile: ‘Inshita ileisa ilyo bonse ababa mu nshiishi . . . bakafumamo.’—Yohane 5:28, 29; Linganyeniko Imilimo 24:15.

Ilyo abafwa bakabuushiwa, bakalaikala pano pene pe sonde. Mu nshita ya kulaumfwa amalyashi pa bantu abafwile, tukalaumfwa amalyashi ya nsansa pa bantu ababuushiwe. Tukalaba sana ne nsansa ukusengela abakalabuuka.