O Setani kei ira nona timoni era na sega ni vakacala tiko ga na kawatamata. Sa kolotaki ira oti mai lomalagi o Jiova. (Vakatakila 12:9) Ena dua ga na gauna e liu oqo, ena totogitaki Setani tale kina kei ira nona timoni o Jiova. E kaya na yapositolo o Joni ni oti nona raica e dua na raivotu ni Kalou: “Ka’u a raica e dua na agilose sa lako sobu mai lomalagi, sa taura e na ligana nai dola kei bulubulu sa sega ni vakabotona ka dua na sinucodo levu. A sa laki taura na gata levu, a gata makawa, o koya oqo na Tevoro kei Setani, a sa vesuki koya me oti mada e dua na udolu na yabaki, a sa biuti koya ki bulubulu sa sega ni vakabotona, a sa sogolati koya eloma, a sa dregata nai sogo vei koya, me kakua ni temaki ira tale na veivanua ko koya, ka me oti mada na yabaki e dua na udolu.” (Vakatakila 20:1-3) E muri, sa na qai vakarusai vakadua na Tevoro kei ira nona timoni.—Vakatakila 20:10.

Na tamata ca e vuravura era na vakarusai tale ga.—Same 37:9, 10; Luke 13:5.

Ni sa vesu oti o Setani kei ira nona timoni, sa na qai vakalougatataka sara vakalevu na kawatamata o Jiova. O sa raica oti mai nira sega ni qai vakila tale e dua na ka na mate. E vakatauvatana o Jisu na mate me vaka ga na moce—na mocelutu e sega kina na tadra. (Joni 11:11-14) E tauca na ivakatautauvata oya baleta ni kila ni na yaco na gauna era na vakayadrati kina mera bula o ira na moce matemate tu. A kaya: “Sa lako tiko mai na gauna . . . ko ira kece ka ra tu e na i bulubulu, ka ra na lako cake mai kina.”—Joni 5:28, 29, VV; vakatauvatana Cakacaka 24:15.

Era na vakabulai tale e ke ena vuravura. Sa na sosomitaka na itukutuku ni mate na itukutuku marautaki me baleti ira na vakabulai tale! Sa na dua dina na ka rekitaki mera kidavaki mai na ibulubulu na wekada lomani!