Si Satanas kag ang iya mga demonyo indi na magapatalang sa katawhan sing malawig pa. Gintagbong na sila ni Jehova gikan sa langit. (Bugna 12:9) Sa malapit nga palaabuton, ang Dios magapanghikot sa liwat batok kay Satanas kag sa iya mga demonyo. Sa isa ka palanan-awon gikan sa Dios, si apostol Juan nagsiling: “Nian nakita ko ang anghel nga nagakunsad gikan sa langit nga may yabi sa kadadalman kag dakung tanikala sa iya kamot. Kag gindakop niya ang dragon, yanang dumaan nga man-ug, nga amo ang Yawa kag Satanas, kag gingapus sia sing isa ka libo ka tuig. Kag gintagbong sia sa kadadalman kag gintakpan ini kag ginpat-inan sa ibabaw niya, agod nga indi na niya pagdayaan ang mga pungsod tubtob nga matapos ang isa ka libo ka tuig.” (Bugna 20:1-3) Sa ulihi, ang Yawa kag ang iya mga demonyo pagalaglagon sing dayon.—Bugna 20:10.

Ang malaut nga mga tawo sa duta pagalaglagon man.—Salmo 37:9, 10; Lucas 13:5.

Pagkatapos si Satanas kag ang mga demonyo malaglag, si Jehova magadala sing madamong mga pagpakamaayo sa katawhan. Madumduman mo nga ang patay wala sing kabuhi, wala nagaluntad. Ginpaanggid ni Jesus ang kamatayon sa pagtulog—mahamuok nga pagtulog nga wala nagadamgo. (Juan 11:11-14) Ginhimo niya ina bangod nakahibalo sia nga magaabot ang tion nga ang mga nagatulog sa kamatayon pagapukawon pa kabuhi. Sia nagsiling: “Ang takna magaabot nga ang tanan nga yara sa handumanan nga mga lulubngan . . . magaguwa.”—Juan 5:28, 29; ipaanggid ang Binuhatan 24:15.

Pagabanhawon sila diri sa duta. Sa baylo sang mga pahibalo nga may napatay, ang makalilipay nga mga balita magasugid tuhoy sa mga ginbanhaw pa kabuhi! Daw ano nga kalipay abiabihon ang mga hinigugma halin sa lulubngan!