Satani bona ena lauma dikadia edia koikoi karadia be kahirakahira do idia ore. Iehova ese guba amo ia negedia diho vadaeni. (Apokalupo 12:9) Nega sisina murinai do ia kara henidia lou. Dirava ese ia henia matahanaina lalonai, aposetolo Ioane ia gwau: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani’, ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai.” (Apokalupo 20:1-3) Unai murinai Diabolo bona ena lauma dikadia do idia hamasedia ore ela bona hanaihanai.​—⁠Apokalupo 20:10.

Kara dika taudia danu tanobada dekenai do idia haorea.​—⁠Salamo 37:9, 10; Luka 13:5.

Satani bona ena lauma dikadia  do ia koua murinai, Iehova ese taunimanima do ia hanamodia badabada. Oi diba mase taudia be idia mauri lasi bona idia noho lasi danu. Iesu ia gwau mase be mahuta bamona​—⁠ta ia mahuta mase bona ia nihi lasi neganai bamona. (Ioane 11:11-14) Ia be unai bamona ia hereva, badina be ia diba nega ta do ia ginidae, mase lalonai idia mahuta taudia be do ia hanogaia do idia mauri lou totona. Ia gwau: “Nega ta do ia mai, mase guria gabu dekenai idia noho taudia ibounai . . . do idia toreisi.”​—⁠Ioane 5:28, 29; bona Kara 24:15 danu itaia.

Tanobada dekenai do idia mauri lou. Unai neganai taunimanima ese unai mauri lou taudia edia sivarai do idia halasia mai edia moale bada, bona edia lalokau taudia be mase guria gabuna amo do idia toreisi lou neganai, do idia abidia dae mai edia moale bada ida!