Satana nozondemone ze kave nokutikura ovandu orure komeho. Jehova we ve nakaura rukuru okuza mo meyuru. (Omavandururiro 12:9) Moruyaveze rwakatjisupi, Mukuru rukwao ma toorere Satana nozondemone ze omikambo. Motjirimunikise okuza ku Mukuru, omuapostele Johanes wa tja: “Indino ami mba munine omuengeli ama rauka keyuru, nu a ṱiza meke re ihi otjipaturure tjorutjiva rwokehi yehi notjiketanga otjizeu. Neye wa kamburire ihi otjitjupamuriro, indji onyoka onguru, okutja eye ngwi Omudiaboli poo Satan, ne tji pandeke oure wozombura eyovi. Nu ingwi omuengeli we tji yumbire morutjiva rwokehi yehi, e ru pata nu kombanda a twa ko otjiyambo, kokutja otjo atji ha pukisa oviwaṋa rukwao, nga ozombura nḓa eyovi rimwe tji za kapita.” (Omavandururiro 20:1-3) Kombunda, Omudiaboli nozondemone ze mave yandekwa nga aruhe.—Omavandururiro 20:10.

Ovandu ovavi kombanda yehi wina mave yandekwa.—Epsalme 37:9, 10; Lukas 13:5.

Kombunda yaSatana nozondemone tji va isapewa mondjira, Jehova ma sere ovandu ozondaya ozengi. Ove mo zemburuka kutja ovaṱi kave nomuinyo, kave ko. Jesus wa sasaneka onḓiro nozomboṱu—ozomboṱu ozongoto nokuhinoturoto. (Johanes 11:11-14) Eye wa tjita nao mena rokutja aa tjiwa kutja oruveze maaru tumbuka avehe mba rara monḓiro tja tja ve pendurwa komuinyo. Eye wa tja: “Oruveze maru ya ovaṱi avehe mu mave . . . piti momayendo.”—Johanes 5:28, 29; sasaneka Oviungura 24:15.

Owo mave kotorwa komuinyo imba kombanda yehi. Moruveze rwomatjivisiro wokutja ovandu va ṱu, omahepuriro wondjoroka maye serekarere ohunga na imba mba kotorwa komuinyo! Ondjoroka iṋe ndji mai kara po okuyakura imba ovasuverwa okuza komayendo!