Ọdịnihu Dị Ebube
Ọdịnihu Dị Ebube
Setan na ndị mmụọ ọjọọ ya agaghị eduhie ihe a kpọrọ mmadụ ruo ogologo oge. Jehova achụpụwo ha rịị n’eluigwe. (Mkpughe 12:9) N’ọdịnihu dị nso, Chineke ga-emekwa ihe ọzọ megide Setan na ndị mmụọ ọjọọ ya. N’otu ọhụụ sitere n’aka Chineke, Jọn onyeozi sịrị: “M wee hụ mmụọ ozi ka ọ na-esi n’eluigwe rịdata, na-eji mkpịsị ugodi nke abyss ahụ n’aka ya, ya na oké mkpọrọ. O wee jide dragọn ahụ, bụ́ agwọ ochie ahụ, onye bụ Ekwensu na Setan, o wee kee ya agbụ [otu puku afọ], wee tụba ya n’ime abyss ahụ, mechie ya, kaakwa ya akara n’elu ya, ka o wee ghara iduhie mba nile ọzọ, ruo mgbe [otu puku afọ] ahụ ga-agwụsị.” (Mkpughe 20:1-3) Mgbe e mesịrị, a ga-ebibi Ekwensu na ndị mmụọ ọjọọ ya ruo mgbe ebighị ebi.—Mkpughe 20:10.
A ga-ebipụkwa ndị ọjọọ nọ n’elu ala.—Abụ Ọma 37:9, 10; Luk 13:5.
Ndị Nwụrụ Anwụ Ga-adị Ndụ Ọzọ!
Mgbe e wepụsịrị Setan na ndị mmụọ ọjọọ ya, Jehova ga-ewetara ihe a kpọrọ mmadụ ọtụtụ ngọzi. Ị ga-echeta na ndị nwụrụ anwụ adịghị ndụ, ha adịghị adị. Jisọs ji ọnwụ tụnyere ụra—ụra dị omimi nke a na-adịghị arọ nrọ na ya. (Jọn 11:11-14) O mere nke ahụ n’ihi na ọ maara na oge na-abịa mgbe a ga-akpọlite ndị ahụ nọ n’ụra ọnwụ bịa ná ndụ. Ọ sịrị: “Oge hour na-abịa mgbe ndị nile dị n’ili . . . ga-apụtakwa.”—Jọn 5:28, 29; tụlee Ọrụ Ndị Ozi 24:15.
A ga-eme ka ha dịghachi ndụ n’elu ala. Kama ịdị na-anụ ịma ọkwa na ndị mmadụ anwụwo, a ga na-anụ akụkọ na-enye ọṅụ ndị na-ekwu banyere ndị a kpọghachiworo ná ndụ! Lee nnọọ ihe ọṅụ ọ ga-abụ ịnabataghachi ndị anyị hụrụ n’anya site n’ili!
[Foto dị na peeji nke 28]
N’oge na-adịghị anya, a ga-eme ka Setan na ndị mmụọ ọjọọ ya kwụsị ịrụ ọrụ
[Foto dị na peeji nke 29]
Ndị nwụrụ anwụ ga-abịaghachi ná ndụ n’elu ala