Setan avọ idhivẹri riẹ a gbe ti su ahwo thọ oke krẹkri hi. Keme Jihova o gele rai no obọ odhiwu no. (Eviavia 12:9) Evaọ obaro kẹle na, Ọghẹnẹ ọ te wariẹ họre mukpahe Setan avọ idhivẹri riẹ. Eva eruaruẹ nọ ino obọ Ọghẹnẹ ze, Jọn ukọ na ọ ta nọ: “Kẹsena mẹ tẹ ruẹ ẹnjele nọ o bi mu no obọ odhiwu tha, yọ usiavẹ ọgọdọ odidi gbe ogbregba ulogbo jọ o riẹ obọ. O te mu odudu na, araomuomu anwae na ọnọ ọrọ Setan hayo Ẹdhọ, ọ tẹ gba e ifi odu ikpe, o te gbele ie fihọ ọgọdọ na, o te sie i họ, wuhu ie dhe i, re ọ siọ erẹwho na ba ẹviẹhọ, bẹsenọ odu ikpe na re ro re.” (Eviavia 20:1-3) Ukuhọriẹ, a re ti kpe Ẹdhọ avọ idhivẹri riẹ no bẹdẹ bẹdẹ.—Eviavia 20:10.

A re ti si ahwo omuomu no eva otọakpọ na re.—Olezi 37:9, 10; Luk 13:5.

Nọ a te si Setan avọ idhivẹri na no, Jihova ọ vẹ te rehọ eghale buobu se ohwo akpọ. Whọ rẹ kaghẹhọ nnọ iwhuowhu na a rọ uzuazọ họ, a rọ oria ovo ho. Jesu ọ rehọ uwhu dhesẹ owezẹ—owezẹ udidi nọ okarọ ewezẹ. (Jọn 11:11-14) O ru oyena keme ọ riẹ nnọ oke o te tha nọ enọ e rọ owezẹ uwhu a te rọ kpare ai ze uzuazọ. Ọ ta nnọ: “Oke o be tha nọ enọ e rọ eva iki ekareghẹhọ kpobi a jẹ te . . . nya via.”—Jọn 5:28, 29; wawo Iruẹru Ikọ 24:15.

A re ti zihe ai ze uzuazọ evaọ otọakpọ. Ukpe ọ owhowhovia ahwo nọ awhu no, kọ iyẹrẹ oghọghọ a te ta kpahe enọ a kpare ziọ uzuazọ! Didi oghọghọ o te jọ re a dede iyoyou na no uki ze!