Mauhpa Htawm Hpang
Kade n na yang, Satan hte nat ni jahten hkrum sana
Satan hte nat ni gaw masha ni hpe aten na na gaw hkalem lu sana n re. Yehowa gaw shanhte hpe sumsing lamu kaw na jahkrat kau sai. (Shingran 12:9) Kade n na yang, Satan hte nat ni hpe Karai Kasang tara jeyang sana re. Karai Kasang jaw ai shingran langai hta Yawhan ndai hku mu ai: “Bai, lamu kasa langai mi gaw, sung htum ai shara na sumsaw hte hpri sin-yu kaba shi a lata hta lang let, lamu de na yu hkrat wa ai hpe, ngai mu nngai. Shi gaw Nat hte Satan rai nga ai, moi na lapu ngu ai baren numraw hpe rim la nna, shaning hkying mi du hkra, sharen da na matu, gyit hkang da wu ai: dai shaning hkying mi garai n lai ai laman e, masha amyu baw ni hpe n hkalem kau lu u ga, dai sung htum ai shara kata de shi hpe jahkrat bang da nna, dai shara hpe la da ai hte de a ntsa e dazik shakap da wu ai: dai shaning hkying mi lai jang, ladaw mi sha shi hpe naw raw dat na rai nga ai.” (Shingran 20:1-3) Dai hpang, Satan hte nat ni gaw htani htana jahten hkrum sana re.—Shingran 20:10.
Mungkan ga na nhkru n kaja ai masha ni mung jahten hkrum na re.—Shakawn 37:9, 10; Luka 13:5.
Si Mat Ai Ni Bi Hkrung Wa!
Si mat ai ni gaw mungkan ga hta asak bai hkrung wa na
Satan hte nat ni a dingbai dingna n nga mat ai hpang, Yehowa gaw shinggyim masha ni hpe shaman chyeju law law ru jaw ya na re. Masha jasi ni gaw asak n nga ai, gara kaw mung n shanu nga ai hpe matsing nga na re. Si hkrung si htan hpe yup ai, yup mang n mu ai sha grai yup pyaw nga ai hte Yesu shingdaw nna tsun dan wa ai. (Yawhan 11:11-14) Si ai hta yup pyaw nga ai ni asak bai hkrung wa na aten du wa na hpe Yesu chye ai majaw ndai hku tsun wa ai re: “Lup ni hta rawng nga ai ni nlang hte gaw . . . pru lu na ahkying du na ra ai.”—Yawhan 5:28, 29; Kasa 24:15 hte shingdaw u.
Shanhte gaw mungkan ga ntsa hta asak bai hkrung wa na re. Lasu su laika ni a malai, bai hkrung wa ai ni hte seng ai kabu hpa shiga ni hpe sha na lu sana re. Lup kaw nna tsawra ai ni hpe hkap tau la lu ai gaw, grai myit pyaw hpa rai na re.
