Ka ta dura, Satanás ku se dimónis ka ta ben ngana algen na Téra más. Jeová dja tra-s di Séu. (Apocalipse 12:9) I sta falta poku ténpu pa el ben tra-s di Téra tanbê. Deus da apóstlu Juan un vizon i el fla: ‘N odja un anju ta dixi di Séu ku txabi di abismu i un korenti grandi na se mô. El pega kel dragon, kel primeru kóbra, ki é Diabu i Satanás, i el pô-l prézu pa mil anu. I el bota-l na abismu, el fitxa abismu i el tranka-l na el, pa el ka kontinuaba ta ngana kes nason más ti ki kes mil anu kaba.’ (Apocalipse 20:1-3) Dipôs Satanás ku se dimónis ta ben ser distruídu pa tudu ténpu. — Apocalipse 20:10.

Kes algen mau na Téra tanbê ta ben ser distruídu. — Salmo 37:9, 10; Lucas 13:5.

Óras ki Jeová ben tra Satanás ku se dimónis kel puder ki es ten, Jeová ta ben traze un monti di benson pa algen li na Téra. Ka bu skese ma mortus ka sta bibu, es ka ta izisti más. Jizus konpara mórti ku un sónu pizadu i sen sonhu. (João 11:11-14) El fla kel-li pamodi el sabia ma ta ben txigaba kel ténpu ki kes algen ki móre ta ben kordadu pa es vive otu bês. El fla: ‘Ta ben txiga kel óra ki tudu kes ki sta na sipultura mimorial ta ben. . . sai’. — João 5:28, 29; konpara ku Atos 24:15.

Es ta resusitadu pa ben vive li na Téra. Nu ka ta ben obi ta fladu ma algen dja móre, envês di kel-li nu ta ben obi notísias di kes algen ki dja resusitadu pa ben vive otu bês! Nu ta ben fika uma kontenti di resebe kes algen ki nu ta ama ki resusitadu!