Satana neendemoni daye itava ka kala vali nokupukifa ovanhu. Jehova okwe va umba mo nale meulu. (Ehololo 12:9) Monakwiiwa i li popepi, Kalunga ota ka katukila vali Satana neendemoni daye. Memoniko la dja kuKalunga, omuyapostoli Johannes okwa ti: “Ndele nda mona omwengeli ta kuluka meulu, e noshapi yombwili nelyenge linene meke laye. Ye okwa kwata ongadu, eyoka linya likulu, olo ondiaboli naSatana, ndele okwe mu pandeka [oule] womido eyovi limwe, nokwe mu ekela mombwili ndee ta idile po, nokwa tula ko oshipateko konima yaye, a ha hongaule vali oiwana fiyo omido odo eyovi inadi xula po.” (Ehololo 20:1-3) Hauxuuninwa, Ondiaboli neendemoni dayo otadi ka hanaunwa po fiyo alushe. — Ehololo 20:10.

Ovanhu vai kombada yedu navo otava ka xulifwa po. — Epsalme 37:9, 10; Lukas 13:5.

Konima eshi Satana neendemoni daye va xulifwa po, Jehova ota ka etela ovanhu omanangeko noupuna mahapu. Oto ke shi dimbulukwa kutya oonakufya kave na omwenyo, kave po. Jesus okwa faafanifa efyo nokukofa — eemhofi didjuu nope he na eendjodi. (Johannes 11:11-14) Ye okwe shi tya shaashi okwa shiiva kutya efimbo otali ke uya eshi ovo va kofa mefyo tava ka pendulwa va kale nomwenyo. Ye okwa ti: “Efimbo tali uya, opo aveshe ava va kala meembila . . . otava holoka mo.” —Johannes 5:28, 29; faafanifa Oilonga 24:15.

Vo otava ka nyumunwa va kale nomwenyo oku kombada yedu. Ponhele yomashiivifo kutya ovanhu ova fya, omahokololo mahafifa otaa ka hepaulula ovo va nyumunwa! Itashi ka kala tuu ehafo okuhambelela ovaholike okudja meembila!