Satana ne bandemona banji kechi bakatwajijila na kujimbaika bantu ne. Yehoba wibapanga kala mwiulu. (Lumwekesho 12:9) Kulutwe, Lesa ukashinda jikwabo Satana ne bandemona banji. Mu kimwesho kyafumine kwi Lesa, mutumwa Yoano waambile’mba: “Kabiji namwene malaika saka afuma mwiulu wajinga na kii wa kalengwa kabula kupela ne munyololo mukatampe mu kuboko kwanji. Wakwachile awa nsuñunyi yenka muloolo wa kala, aye Diabola kabiji Satana, ne kumukasa myaka 1,000. Kabiji wamutayile mu kalengwa kabula kupela ne kushinkapo ne kubikapo katetesho, kuba’mba abule kujimbaika jibiji bisaka bya bantu kufikatu ne yoya myaka 1,000 byo ikapwa.” (Lumwekesho 20:1-3) Kabiji pa kupitapo kimye, Diabola ne bandemona banji bakebonauna myaka ne myaka.—Lumwekesho 20:10.

Bantu babi nabo bakebonauna.—Salamo 37:9, 10; Luka 13:5.

Satana ne bandemona byo bakebonauna, Yehoba ukaleta mapesho avula ku bantu. Vulukai kuba’mba bafu kechi baji na bumi ne, bafwako. Yesu wafwanyikizhe lufu ku muntu walaala tulo. (Yoano 11:11-14) Waambile bino mambo wayukile’mba katatakatu bonse balaala mu tulo twa lufu bakebabuushe. Waambile’mba: ‘Kimye kibena kwiya aba bonse baji mu bilende bya kivuluko . . . kyo bakafumamo.’—Yoano 5:28, 29; Esakanyaiko Byubilo 24:15.

Bakebasangula ne kwikala pano pa ntanda. Kechi kukekala kumvwa masawakya a bantu bafwa ne, kukekalatu masawakya awama a bantu bo bakasangula. Byo kikawamapo kutambwila balunda netu kufuma ku bilende.