Satan gi jochiendene ok bi wuondo dhano kuom ndalo mathoth. Jehova ose witogi oko mar polo. (Fweny 12:9) E ndalo ma biro ma koro chiegni, Nyasaye biro kawo ondamo ne Satan gi jochiende mage. E gima noneno moa kuom Nyasaye, jaote Johana nowacho: “Eka naneno malaika koa e polo koting’o rayaw mar Bur Matut gi ratego maduong’ e lwete. Nomako Thuol, Thuol machonno, miluongo ni Jachien kendo Satan, mi notueyogo higini gana achiel. Nowite e Bur Matut, kendo noloro dho burno, moketo kido kuome mondo kik Thuol ochak owuond ogendini, nyaka higini gana achielgo rum.” (Fweny 20:1-3) Bang’e jachien gi jochiende mage ibiro kethi nyakachieng’.​—Fweny 20:10.

Jo maricho e piny bende ibiro kethi.​—Zaburi 37:9, 10; Luka 13:5.

Bang’ golo Satan gi jochiende eyo, Jehova biro kelo gweth mang’eny ne dhano. Par ni jo motho onge ngima, gionge. Yesu nowacho ni tho chalo gi nindo​—nindo matut maonge gi lek. (Johana 11:11-14) Nowacho kamano nikech nong’eyo ni ndalo nebiro ma joma ne onindo e tho onego ochiew oduogi e ngima. Ne owacho: ‘Ndalo biro ma ji duto manie liete . . . nowuog oko.’​—Johana 5:28, 29; rang Tich Joote 24:15.

Ibiro duokgi e ngima mana e piny ka. Kar mondo wawinji lendo mag tho, wabiro winjo weche mag mor ma wuoyo kuom joma ochier! Nobedi chieng’ mar mor manade mar rwako joherawa mane otho ka wuok e liete!