Satana ni viwa vyakwe yatalatwalilila ukusomba antu pa nsita itali. Yeova wayasumba mpiti ukufuma ukwiyulu. (Umbwilo 12:9) Likwene sile Leza wasya ace aonoone Satana ni viwa vyakwe. Umu cilolwa icafumile kuli Leza, Yoane walanzile ati: “Nupya ndola mungeli akwika kufuma mwiyulu, ala lemile mfungulo ya kuciwina caula mpela nga nu munyololo ukulu cuze. Alino alema cizoka campiti, kuli kuti Satana nanti Ciwa nu kumunyepa kulingana ni myaka izimbi lyonga. Lyene mungeli amusumbila mu ciwina caula mpela, afungapo nu kumatilila, pakuti atasomba antu amu nko nupya, kufika lino myaka zimbi lyonga ilasila.” (Umbwilo 20:1-3) Alino, Satana ni viwa vyakwe yalonoonwa.—Umbwilo 20:10.

 Antu aipe aya umu nsi nayo yalonoonwa.—Masamu 37:9, 10; Luka 13:5.

Lino Satana ni viwa yalonoonwa, alino Yeova alaleetela antunze ivintu ivisuma. Muliusya ukuti afwe yataya nu umi. Yesu wakolinye imfwa uku tulo—utulo utwaula iviloto. (Yoane 11:11-14) Walanzile vivyo pano wamanyile ukuti insita ikwiza lino alazyula afwe. Walanzile ati: ‘Kasita kakwiza, kano antu yonsi aali umu malindi . . . yalafumamo.’—Yoane 5:28, 29; kolanyini ni vili pa Milimo 24:15.

Yalatutuluka nu kwikala umu nsi. Kutalaya ukwikula ukuti umwi watafwa, lelo kulaya sile amalyasi asuma akuti antu afwile yali nu umi nupya! Kulaya uluzango cuze pa kupokelela yano yalatutuluka!