A Sʋɩtãan ne a zĩn-dãmbã sẽn belgd ãdem-biisã na n talla tɛka. A Zeova zoe n dig-b-la saasẽ. (Wilgri 12:9) Ka la bilfu, a na n le maana bũmbu. A vẽnega a Zã t’a gʋls woto: “Dẽ, mam yãa malɛk sẽn yi arzãn [saasẽ] n sigi. La a tara bog-zulung kʋɩlen-biiga, la bãn-kãseng a nugẽ. Yẽ yõka dargõ wã sẽn yaa wag-kʋdre, sẽn yaa diabl la Sʋɩtãanã n balg-a yʋʋm tusri. La b loba yẽnda bog-zulungẽ n pag bokã n sog a noorã t’a ka tõe n le belg nebã sẽn be soolem toɛy-toɛyã yɛs ye. B na n basa yẽ be hal tɩ yʋʋm tusr looge.” (Wilgri 20:1-3) Rẽ poore, b na n sãama a Sʋɩtãan ne a zĩn-dãmbã zãng-zãnga.—Wilgri 20:10.

Nin-wẽnsã sẽn be tẽngã zugã me na n sãamame.—Yɩɩl Sõamyã 37:9, 10; Luk 13:5.

A Zeova sã n wa kɩt t’a Sʋɩtãan ne zĩn-dãmbã pa le tõe n nams nebã, bark ka tɛk la ãdem-biisã na n paame. Tẽeg-y tɩ sẽn ki-bã pa tɩ be zĩig a to ye. B pa le vɩ ye. A Zezi maka kũumã ne gõeem, gõeem sẽn pa naag ne zãmsdo. (Zã 11:11-14) Woto wilgdame t’a ra miime tɩ daar n wat tɩ sẽn ki-bã na n vʋʋge. A yeelame: “Bɩ yãmb da yɛɛs ne yãoã ye. Tɩ bõe, wakat watame tɩ fãa sẽn be yaad pʋsẽ na n wʋm bãmb koɛɛg n yi.”—Zã 5:28; ges-y 1 Korẽnt dãmba 15:26.

Wẽnnaam na n vʋʋga sẽn ki-bã tɩ b vɩɩmd tẽngã zugu. Wakat kãngã, d pa na n le wʋm tɩ ned n maan kaalem ye. D na n wʋmda b sẽn yet tɩ neb n vʋʋge. Na n yɩɩ sũ-noog tɛkẽ! D na n deeg-b-la sõma, n pʋʋs-b ne b waoongo!