Kwasyala vye katici lyo e Satana ni viwa vyakwe waleka ukuwipa awantu. E Yehova wa wawinga kali kwi yulu. (Ukuwumbulika 12:9) Nombanye e Yehova wandi ayize ayonone e Satana ni viwa vyakwe. Umutumwa Yohani waweni icilolwa ukufuma kwe Leza. Yohani watili: “Swinya naweni umungeli akwika mwi yulu ali na makii ya pa cizinji ica sowa impelelecezya ne ceni umukulu mu makasa yakwe. Swinya wizile alema icing’wina, ici nzoka ca pa kutalika, akuli ukuti e Kasewanya swinya e Satana, nu kumunyepa imyaka 1,000. Swinya wacisumbizile mu cizinji cino citawa ni mpelelecezya nu kumanga papela, pa kuti citasovya na swinya awantu mpaka imyaka 1,000 yize yisile.” (Ukuwumbulika 20:1-3) Pa nsizi ya kwe vyo-o, e Leza aliyonona e Satana ni viwa vyakwe umuyayaya.​—Ukuwumbulika 20:10.

E Leza aliyonona na wonsinye wano wakacita iviwipe.​—Amalumbo 37:9, 10; Luka 13:5.

Pa nsizi ya konona e Satana ni mizimu miwipe, e Yehova alicitila awantu wakwe ivintu ivizima nkaninye. Mufwile mukwizuka vino mwasambilizile mwe Baibolo ukuti awafwe wasiwako na swinya. Nanti ciwe wowo e Yesu walinginye imfwa ku kulala utulo. (Yohani 11:11-14) Cino calenzile ukuti e Yesu alinganye imfwa ku tulo amuno wamanyile ukuti awafwe walizyulupuka. Watili: ‘Impindi yikwiza pano wonsinye wano wawa mu nkungwe . . . walifumamo.”​—Yohani 5:28, 29; linganyako Imilimo 24:15.

Pano awafwe walizyulupuka waliyikala monye mu nsi. Tutaliwakwivwa amalyasi ya kuti kuli icililo, lelo tuliwakwivwa vye amalyasi amazima pa kuzyulupuka. Ala tuliwa ni cimwemwe ukupocelela wano waliwa zyulupuka!