Ukukhohlisa abantu okwenziwa nguSathane lamadimoni akhe sekusiya emaphethelweni. UJehova sewabaxotsha ezulwini. (ISambulo 12:9) Esikhathini esizayo, uNkulunkulu uzathatha inyathelo lokutshabalalisa uSathane lamadimoni akhe. Embonweni awutshengiswa nguNkulunkulu, umphostoli uJohane wathi: “Ngabona ingilosi isehlela phansi isuka ezulwini, ilesihluthulelo somgodi ongelamkhawulo iphethe ngesandla sayo iketane elikhulu. Yabamba umgobho, inyoka endala leyana, engoMubi loba uSathane, yambopha okweminyaka eyinkulungwane. Yamphosela eMgodini ongelamkhawulo, yakhiya, yawuvala silikici, ukumvimbela ukuba angakhohlisi izizwe futhi kuze kuphele iminyaka eyinkulungwane.” (ISambulo 20:1-3) Ngemva kwalokho, uDeveli lamadimoni akhe bazabhujiswa phakade.​—ISambulo 20:10.

Abantu ababi abasemhlabeni labo bazabhujiswa.​—Hubo 37:9, 10; Lukha 13:5.

UJehova uzaletha izibusiso ezinengi ebantwini ngemva kokususa uSathane lamadimoni akhe. Njengoba usukwazi, abafileyo abaphili njalo kabakho. UJesu wafananisa ukufa lokulala ubuthongo obukhulu obungela maphupho. (Johane 11:11-14) Wenza njalo ngoba wayekwazi ukuthi sasizafika isikhathi lapho labo abalele ekufeni bezavuswa. Wathi: “Siyeza isikhathi lapho kuzakuthi bonke abasemathuneni abo . . . baphume.”​—Johane 5:28, 29; qathanisa ImiSebenzi 24:15.

Bazavuswa baphile emhlabeni. Kulokuthi kube lezaziso zabantu abafileyo, kuzakuba lemibiko yalabo abayabe bevuswe ekufeni! Kuzakuba yintokozo engakanani ukwamukela abantu esibathandayo bevuka emangcwabeni!