Sehdan oh nah ngehn saut akan solahr pahn pitih aramas. Siohwa ketin kausirailsangehr nanleng. (Kaudiahl 12:9) Ni ahnsou keren, Koht pahn ketin pwurehng kadeik Sehdan oh nah ngehn saut akan. Nan kasansal ehu sang Koht, wahnpoaron Sohn koasoia: “Ngehi eri kilangada tohnleng men me wa kihen ritingada pwoahr loalo me soh kapi oh selmete toutou pwoat. E ahpw poarokedi drakono, iei serpent en kawao, me iei Tepil de Sehdan—e ahpw salihedi erein sounpar kid. Tohnlengo eri kesepwekehdilahng nan pwoahr loalo, me soh kapi, loakehdi oh katengehdi powe, pwe e dehr kin pitih wehi kan, pahr kido lao imwisekla.” (Kaudiahl 20:1-3) Mwuhr, Tepilo oh nah ngehn saut akan pahn kasohrala soutuk.​—Kaudiahl 20:10.

Aramas suwed kan nin sampah pil pahn kasohrala.​—Melkahka 37:9, 10; Luk 13:5.

Mwurin Sehdan oh nah ngehn saut akan solahr mie, Siohwa pahn ketikihda kapai tohto ong aramas akan. Ke sukuhlkier me me melahr akan solahr momour oh solahr mie. Sises ketin mahsanih me mehla duwehte meir kelik me sohte kak ouraman. (Sohn 11:11-14) E mahsanih met pwehki e mwahngih me ahnsou ehu pahn kohdo me irail kan me melahr pahn pwourda. E mahsanih: “Ahnsou ehu pahn kohdo me irail koaros me mihmi nan sousou kan pahn . . . pedoisang nan arail sousou kan.”​—Sohn 5:28, 29; Wiewia 24:15.

Irail pahn pwurehng mourda nin sampah. Kitail solahr pahn rong pakair en mehla ahpw kitail pahn rong pakair kaperen en irail kan me pwurodohsang mehla! Ia uwen kaperen en kasamwo irail kan me kitail poakepoake sang nan sousou!