Diabluwan demoniukunaqa ichik tiempullanam nunakunata engañayanqa. Jehoväqa ciëlupita qarqamushqanam (Apocalipsis 12:9). Y ichikllachönam maskunata ruranqa. Jehovä suëñuchönö rikätsinqanta willakurmi Apostol Juan kënö nirqan: “Tsënam juk angelta rikarqä mankarëkaq uchkupa llävinta y jatun cadënata tsarashqa ciëlupita urëkämoqta. Mantsëpaq jatun culebrata, awmi, Diablu y Satanas unë kaq culebrata prësurkurmi, mil watapa watëkurqan. Y mankarëkaq uchkuman jitarkurmi wichqarkurqan, y mil watakuna ushanqanyaq nacionkunata yapë mana engañanampaqmi yëkunanta sellarkurqan” (Apocalipsis 20:1-3). Tsëpitanam Diabluwan demoniukunaqa pasëpa ushakäyanqa (Apocalipsis 20:10).

Mana allita ruraq nunakunapis pasëpam ushakäyanqa (Salmus 37:9, 10; Lücas 13:5).

Diablutawan demoniukunata ushakäratsirmi, Jehoväqa nunakunata imëkanöpa bendicinqa. Yarpäshun wanushqakunaqa manam kawëkäyantsu. Jesusqa nirqan wanushqakunaqa, mana suëñushpa pasëpa punukashqanö këkäyanqantam (Juan 11:11-14). Tsëtaqa nirqan, punuykäyanqampita sharkamoqnö kawariyämunampaq kaqta musyarmi. Pëmi kënö nirqan: “Ichikllachönam sepultürachö këkaqkunaqa qayanqanta wiyar tsëpita yarqayämunqa” (Juan 5:28, 29; Hëchus 24:15 ninqantapis rikäri).

Wanushqakunaqa Patsachö kawayänampaqmi kawariyämunqa. Pillapis wanunqanta willakayämunampa rantinmi, ¡pikuna kawariyämunqanta willakayämunqa! ¡Kawariyämuptin kuyë familiantsikkunata chaskirqa alläpachi kushikushun!