Shuj ali causaigumi tiagrin
Satanaspash, demoniocunapash ñallami vichai tucunga
Jehová Diosca jahua cielomanda llujchishpami Satanasta, demoniocunatapash cai alpaman cacharca (Apocalipsis 12:9). Shinapash Satanaspash, demoniocunapash gentecunataca ñana ashtahuan umachingachu. Shamuj punllacunapica Jehová Diosca cutinmi Satanashuan, demoniocunahuanbash macanajunga. Chaitami Jehová Diosca shuj muscuipishna apóstol Juanman ricuchirca. Paica caita ricushcatami nirca: “Jahua cielomanda shuj ángel urai shamujujtami ricurcani. Chai angelca ucu ucu utujupa llavetapash, shuj jatun cadenatapashmi maquipi charijurca. Chai angelmi dragonda japirca. Chai dragonga pundamandapacha tiashca culebrami can. Paimi Diablo y Satanás can. Paitami mil huatacunata huatarca. Shina huatashpami paitaca ucu ucu utujuman shitarca. Chaipimi paitaca vichashpa saquirca. Y gentecunata cutinga ama pandachichunmi, mil huatacaman chai utujuman yaicuna entradataca vichashpa, ali ali sellashpa saquirca” (Apocalipsis 20:1-3, TNM). Ñallami Satanaspash, demoniocunapash para siempre tucuchi tucunga (Apocalipsis 20:10).
Shinallata cai alpapi nali gentecunapashmi tucuchi tucunga (Salmo 37:9, 10; Lucas 13:5).
Huañushcacunaca cutinmi causaringa
Huañushcacunaca cai alpapi causangapami causaringa
Satanasta, demoniocunatapash tucuchishca jipaca, Jehová Diosca ashtaca bendiciongunatami caramunga. Yuyaripashun, huañushcacunaca ni maipi na causanajunllu. Paicunaca illaitapachami illan. Jesusca huañuitaca, pipash huañujta puñunahuanmi compararca (Juan 11:11-14). Shina comparashpaca huañushcacunata cutin rijchachina tiempo chayamugrijushcatami intindichijurca. Jesusca nircami: “Na manllarinachu canguichi, gulpi huañushcacunami [...] causaringa” (Juan 5:28, 29, TNM; Hechos 24:15, TNM textohuan chimbapurashpa ricupangui).
Huañushcacunaca cai alpapi cutin causangapami causaringa. Chai tiempopica gentecuna huañushcami pipash nijtaca ñana uyashunllu. Chaipa randica ashtaca ashtaca gentecuna cutin causarishcatami uyapashun. Y ñucanchi juyashca familiacuna causarijpica ninanda cushijushpami chasquipashun.