He ‘ikai ke hoko atu ‘o fuoloa ‘a hono kākaa‘i ‘e Sētane mo ‘ene kau tēmenioó ‘a e fa‘ahinga ‘o e tangatá. Kuo ‘osi lī hifo ‘e Sihova ‘a kinautolu mei hēvani. (Fakahā 12:9) ‘I he kaha‘u ofi maí, ‘e toe fai ‘e he ‘Otuá ha ngāue kia Sētane mo ‘ene kau tēmenioó. ‘I ha vīsone mei he ‘Otuá, na‘e pehē ‘e he ‘aposetolo ko Sioné: “Pea u vakai ha angelo ‘oku ‘alu hifo mei he langi, ‘oku ‘iate ia ‘a e kī ‘o e Luo Ta‘ehanotakele, pea ‘oku ne to‘o ha fu‘u, seini. Pea ne puke ‘a e Talakoni, ‘a e Ngata ‘o ono‘aho, ‘a ia ko e Tevolo foki mo Setane, pea ne ha‘i ia ke ‘osi ha ta‘u ‘e afe, pea ne li ia ki he Luo, ‘o ne tapuni ia ‘o sila‘i mei ‘olunga; koe‘uhi ke ‘oua te ne toe kākā‘i ‘a e kakai kae‘oua ke kakato ‘a e [t]a‘u ‘e taha afe.” (Fakahā 20:1-3) ‘I he hili iá, ‘e faka‘auha ‘o ta‘engata ‘a e Tēvoló pea mo ‘ene kau tēmenioó.​—Fakahā 20:10.

‘E toe ‘auha mo e kakai kovi ‘i he māmaní.​—Sāme 37:9, 10; Luke 13:5.

‘I he hili ‘a hono to‘o atu ‘a Sētane mo ‘ene kau tēmenioó, ‘e fakahoko mai ‘e Sihova ‘a e ngaahi tāpuaki lahi ki he fa‘ahinga ‘o e tangatá. ‘Okú ke manatu‘i, ko e kau maté ‘oku ‘ikai te nau mo‘ui, ‘o ‘ikai te nau ‘i ai. Na‘e fakatatau‘i ‘e Sīsū ‘a e maté ki he mohe​—ko e mohe ma‘u ‘o ‘ikai ha misi. (Sione 11:11-14) Na‘á ne fai pehē koe‘uhi na‘á ne ‘ilo ‘e hoko ‘a e taimi ‘e ‘ā hake ai ‘o mo‘ui ‘a e fa‘ahinga ‘oku mohe ‘i he maté. Na‘á ne pehē: “‘Oku ‘unu mai ha taimi, ‘a ia . . . [ko e] kakai kotoa pe ‘oku ‘i he ngaahi fa‘itoka, . . . te nau ‘alu atu mei ai.”​—Sione 5:28, 29; fakafehoanaki mo Ngāue 24:15.

Te nau toe mo‘ui ‘i heni ‘i māmani. ‘I he ‘ikai ke ‘i ai ha ngaahi fanongonongo ‘oku fakahā ai kuo mate ha taha, ‘e fakahā ‘a e ngaahi fakamatala fakafiefia ‘o fekau‘aki mo kinautolu kuo fakafoki mai ke mo‘uí! Ko ha toki me‘a fakafiefia ē ke talitali lelei ‘a e fa‘ahinga ‘ofeina ‘e fakafoki mai mei he fa‘itoká!