Na siri gale, Sathane ni madhemoni yaye kha va na nga pengisa gambe vathu. Jehovha a va tutumiside ndzadzini. (Gutuledwa 12:9) Nya mba hweya, Nungungulu a na wugeya gambe Sathane ni madhemoni yaye. Omu nya giwoniso gi nga ba gita khu ga Nungungulu, mupostoli Johane a di khuye: “Nyi di wona ngilozi na yi gu tshiga khu ndzadzini, yiri ni pfhungulu nya liphala nya guete ni likhetse mandzani gwaye. Iyo yi di mola mwamilambo, nyoga ya gale a gu uye Dhiyabhulosi ni Sathane, a gu mu khothela likhumi mazana (1000) myaga. Yi di mu rinya phalani nya guete yi mu segela, yi vega gifungo vbatshani gasi a si pengisi gambe mayigo kala gu enela likhumi mazana (1000) myaga.” (Gutuledwa 20:1-3) Hwane nya isoso, Dhiyabhulosi ni madhemoni yaye va na fuviswa kala gupindruga. — Gutuledwa 20:10.

Vathu vatshavbo nya myonyo nya guvivbe va gomogo mafuni va na fuviswa. — Ndzimo 37:9, 10; Luka 13:5.

Hwane nya gu ba na Jehovha a fuviside Sathane ni madhemoni yaye, uye a na resa makategwa nya mangi ga vathu. U na dundrunga gu khuwe ava va fudego kha va vbanyi, va mwalo gambe. Jesu fananiside gufa ni gu lala ligovbe nya likhongolo nya mba lora gilo. (Johane 11:11-14) Uye gu fananiside khu ndziya yoyo kholu a di gu dziti gu khuye ava va fudego va na wuswa va vbanya gambe. A di khuye: “Yi ngu vboha tepo eyi vatshavbo va fudego va gomogo marowoni va na . . . wugago.” — Johane 5:28, 29; wona gambe Mithumo 24:15.

Va na wuswa va vbanya omu mafuni. Kha hi na ngapwa gambe myango nya malilo, ganiolu hi na tsaka khu gupwa mahungu nya gu pwani vomo va wusidwego khu gufani! Ngapwa gutsaka hi na gu manago khu gu hoyezeya sigodwa sathu si na wuswago khu gufani!