Ko pili o se toe fakaloi‵loi ne Satani mo ana temoni a tino. Ko oti ne ‵pei ifo latou ne Ieova mai i te lagi. (Fakaasiga 12:9) I se taimi pili mai nei, ka toe fai ne te Atua se faiga ki a Satani mo ana temoni. I te fakaasiga mai i te Atua, ne fai atu penei te apositolo ko Ioane: ‘Ne matea atu ne au te agelu e fanaifo mai te lagi, e puke i tena lima a te kī o te lua ‵poko mo te seni ‵mafa. Ne puke ne ia te talako, telā ko te gata mua eiloa, ko te Tiapolo tenā io me ko Satani, kae ne saisai ne ia i te afe tausaga. Ne ‵pei ne te agelu a ia ki te lua ‵poko, ‵loka faka‵mau ko te mea ke se toe takitaki ‵se ne ia a fenua ke oko eiloa ki te palelega o te afe tausaga.’ (Fakaasiga 20:1-3) Fakamuli ifo, ka ‵ta fakapalele te Tiapolo mo ana temoni ki te se-gata-mai.—Fakaasiga 20:10.

Ka ave keatea foki a tino ma‵sei mai i te lalolagi nei.—Salamo 37:9, 10; Luka 13:5.

Kafai ko oti ne ave keatea a Satani mo te kau temoni, ka aumai ne Ieova te fia o fakamanuiaga ki tino. E masaua ne koe me e se ola a tino ‵mate. Ne fakatusa ne Iesu te mate ki te moe—ko te moe palapala kae e seai ne moemiti. (Ioane 11:11-14) Ne fai ne ia te mea tenā me e iloa ne ia me ka oko mai te taimi ka toe ‵fagu mai ei a tino kolā e ‵moe i te mate ke toe ola mai. Ana muna: ‘Ka oko mai te itula e ulu mai ei ki tua a latou katoa kolā e ‵nofo i tānuga.’—Ioane 5:28, 29; fakatusa ki te Galuega 24:15.

Ka toe ola mai latou ki te lalolagi nei. Ka se toe fai a faka‵pulaga e uiga ki tino kolā ko ‵mate, kae ka maua a lipoti fakafia‵fia loto kolā e fakailoa mai i ei a tino kolā ne toe fakaola mai! E pefea te gali ke mafai o toe fetaui mo tino pele kolā ko o‵mai mai i te tānuga!