Эрлик болгаш ооң буктары кижи төрелгетенин моон соңгаар мегелевес апаар. Иегова оларны дээрден шагда-ла дүжүр октапкан (Ажыдыышкын 12:9). Удавас Бурган Эрликке болгаш буктарга удур тура халыыр. Ону Иоанн элчин Бургандан көстүүшкүнге мынчаар көрген: «Оон Бурганның дээрден бадып орар төлээзин көрүп кагдым. Ол холунда тамының дүлгүүрүн болгаш аар илчирбе тудуп алган болду. Ол төлээ улуну — эрлик база удурланыкчы болур шаандагы чыланны — тудуп хоругдааш, ону илчирбе-биле муң чыл дургузунда кинчилеп кагды. Дээрниң төлээзи улуну тамыже киир октааш, үнер черин хаггаш, таңмалап кагды. Ынчаар орта демги улу муң чыл төнмээнде, делегейниң чоннарын оон ыңай мегелээр харыы чок апарган» (Ажыдыышкын 20:1—3). Ооң соонда Эрлик бодунуң аза-буктары-биле кезээ-мөңгеде узуткаттырар (Ажыдыышкын 20:10).

Каржы кижилерни база чер кырындан кыргып-хыдыыр (Ырлар 36:9, 10; Лука 13:5).

Эрликти база ооң аза-буктарын узуткаан соонда, Иегова кижи төрелгетенин кайгамчыктыг, төнчү чок кылдыр йөрээр. Сактып кээр болзувусса, кижиниң өлген соонда улаштыр чурттаар сүнезини чок деп көрдүвүс. Иисус өлүмнү ханы уйгуга дөмейлээн (Иоанн 11:11—14). Ол ындыг деңнелгени өлген улус катап дирлип кээр деп билир болгаш ажыглаан. «Чевеглерде чыдар бүгү улус... туруп кээр» үе келир деп, Иисус чугаалаан (Иоанн 5:28, 29; деңнеңер: Ажыл-чорудулга 24:15).

Чок апарган улус чер кырынга катап дирлип кээр. Өлүм дугайында чарлалдар орнунга, диргизиишкин дугайында өөрүшкүлүг чарлалдар дыңнаар бис! Чоок улузувус дирлип кээрге, оларны өөрүшкү-маңнайлыг уткуп алыр бис!