Satana ni yiŵanda yakwe ngasapitilisya kwalambusya ŵandu mpaka kalalaka. Yehofa ŵatopwele kala jemanjaji kwinani. (Chiwunukuko 12:9) Pachangakaŵapa, Mlungu chamalane ni Satana soni yiŵanda yosope. Mlungu ŵamkamuchisye ndumetume Yohane kuti alole yayichitendekwa msogolo. Yohane jwatite,“Kaneko naliweni lilayika lili mkutuluka kutyochela kwinani, myala mwakwe lyaliji lili likamulilile kiyi ja kwisimbo lyangali mbesi kula, nambosoni unyolo wekulungwa. Ŵachikamwile chingwena chila, lijoka lyakala lila lyele lyalikukolanjidwa jwakusakala kapena Satana ni kuchitaŵa kwa yaka 1,000. Lilayika lyachiponyisye chalakwecho mwisimbo lila, ni kuchiwugalila mwelemo ni kusiŵa pakuwugalilapo kuti chikasalambusyasoni kwa mitundu ja ŵandu mpaka yili yimasile yaka 1,000 yila.” (Chiwunukuko 20:1-3) Panyuma pakwe Mlungu chachimjonanga Satana pampepe ni yiŵanda yakwe mwamti ngasasimanikwasoni mpaka kalakala.—Chiwunukuko 20:10.

Mlungu chachajonanga ŵandu ŵakusakala wosope.—Masalimo 37:9, 10; Luka 13:5.

Yehofa pachachimtyosya Satana soni yiŵanda chachatendela ŵandu yindu yambone yejinji. Mpela mwatuyiwonele kala, ŵandu ŵawe ngakusapitilisya kola umi. Yesu ŵachiwanichisye chiwa ni lugono. (Yohane 11:11-14) Jwalakwe jwaŵechete myoyo ligongo jwamanyililaga kuti msogolomu ŵawe chachijimuka. Jwalakwe jwatite, “Jili mkwisa ndaŵi jakuti ŵawile wosope tachigapikana maloŵe gakwe ni tachikopoka m’malembe.”—Yohane 5:28, 29; awanichisye ni Masengo 24:15.

Ŵandu chachijimuka ni kutamaga pachilambo chapasi panopano. Mmalo mwakupochela mautenga gakuti ŵandu awile, tuchipochelaga mautenga gakusangalasya gakuti ŵandu ajimwiche ku chiwa. Yichiŵa yakusangalasya mnope kwapochela achamlongo achimjetu ali mkwimuka kutyochela kumalembe.