Maʼ kun xáantaleʼ Satanás yéetel u kʼasaʼan angeloʼobeʼ yaan u jáawal u tuskoʼob wíinik. Jéeobaeʼ tsʼoʼok u jóoʼskoʼob teʼ kaʼanoʼ (Apocalipsis 12:9). Yéetel ichil upʼíit kʼiineʼ yaan u kʼalkoʼob. Dioseʼ bey tu tsʼáajil u yil apóstol Juan le baʼax kun úuchloʼ: «Teneʼ tin wilaj juntúul ángel táan u yéemel teʼ kaʼanoʼ, u machmaj u llaveil le taamkach jooloʼ bey xan junpʼéel nojoch cadena. Letiʼeʼ tu machaj le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal yéetel Satanás tiʼoʼ, ka tu kʼaxaj tu yáamil 1,000 años. Tsʼoʼoleʼ tu píikchʼintaj teʼ taamkach jooloʼ ka tu makaj yéetel ka tu sellartaj utiaʼal maʼ u seguer u tusik u kajnáaliloʼob luʼum, tak ken tsʼoʼokok le 1,000 añosoʼ» (Apocalipsis 20:1-3). Tu tsʼookeʼ, yaan u xuʼulsaʼal Satanás yéetel u kʼasaʼan angeloʼob (Apocalipsis 20:10).

Yaan xan u luʼsaʼal way Luʼum le máaxoʼob kʼasaʼanoʼoboʼ (Salmo 37:9, 10; Lucas 13:5).

Ken tsʼoʼokok u xuʼulsik Satanás yéetel le kʼasaʼan angeloʼoboʼ, Jéeobaeʼ yaan u beetik maʼalob baʼaloʼob utiaʼal u kiʼimaktal u yóol wíinikoʼob. Kʼaʼajaktecheʼ le máaxoʼob ku kíimloʼoboʼ mix baʼal ku pʼáatal kuxaʼanil tiʼob. Jesuseʼ tu ketaj le kíimil yéetel u jach tʼúubul u wenel máak tuʼux maʼatech u wayakʼtik mix baʼaloʼ (Juan 11:11-14). Tu ketaj beyaʼ, tumen u yojel yaan u kʼuchul u kʼiinil u kaʼa líiʼsaʼal le máaxoʼob kimenoʼob bey táan u weenloʼoboʼ. Tu yaʼalaj: «Yaan u kʼuchul u kʼiinileʼ tuláakal le máaxoʼob yanoʼob ichil le muknaloʼoboʼ [...] yaan u jóokʼloʼob» (Juan 5:28, 29; ket yéetel Hechos 24:15).

Yaan u kaʼa kuxkíintaʼaloʼob way Luʼumeʼ. Maʼ kun kaʼa úuchul tsikbal tu yoʼolal máaxoʼob tsʼoʼok u kíimloʼob, baʼaxeʼ ¡yéetel kiʼimak óolal kun aʼalbil máaxoʼob tsʼoʼok u kaʼa kuxkíintaʼaloʼob! ¡Jach yaan u kiʼimaktal u yóol máak ken u yil u kaʼa kuxkíintaʼal le máaxoʼob u yaabilmoʼoboʼ!