AMEERIKAHO heeꞌrannohu mittu manchi togo yee coyiꞌrino: “Beettiꞌya Joonaatani jaallasi ledo godoꞌlara shiima kiilomeetire fafe haꞌre no. Galteꞌya Valentiina kayinni, tenne haꞌrinshosi dibaxxanno. Doogo kaameelunninna mannunni cifantannohura keere higasi huluullissannose. Ikkollana elekitiroonikisete uduunnicho baxanno daafira jaallasi suuqe haꞌre woꞌnaalsha assanno. Ani kayinni Niwu Yorkete katamira galchimi Manataanira qaete noommo. Galteꞌya Porto Rikote noo fiixase layidhara hadhe no. ‘Joonaatani mulenni higanno’ yitanno hedo nooe. Waalchoꞌya ganganneenna iso laweennae gobbara fuleemmo wote, polisichahonna danote yannara kaaꞌlo uyitanno loosaasineeti. Polisete hajajaanchi, ‘Tini kaameela kadate fajjo ayeetero afootto?’ yee xaꞌmie. ‘Ee, beettiꞌya Joonaatanite’ yuummo. ‘Busha duduwo kullammohera dangoommo. Dano kalaqantino; . . . beettikki, . . . beettikki reyino’ yiie. Macciishshanni heeꞌrenni, ‘Horonta ikkara didandaanno!’ yuummo. Hakko masilli xaa geeshsha wodaninkera hurtannokki mada kalaqinonke.”

 Ispeenete gobbara Barseeloonu katamira heeꞌranno manchi togo yee borreessino: “Ispeenete gobbara 1960 qooxeessira hagiirraame maate noonke. Galteꞌya Maariyaranna anera, 13 dirihu Deevidi, 11 dirihu Paakitonna 9 diriti Isaabeeli yinanniri sase ooso noonke.

“Badheessa 1963nni mitto barra, Paakito umo lowo geeshsha damuunseennasi rosu mininni agure higi. Ma ikkikka yine jajjarrummo; ikkollana seeda yanna dikeeshshino. Xiwamihunni sase saate gedensaanni gufiꞌri. Galaaffattinositi umu giddo mundee duꞌnamate.

“Paakito reyinohu 30 diri albaanniiti. Ikkollana, reyosi wodaninkera kalaqqino mada xaa geeshsha dihurtino. Qaaqquulle shiiꞌrino amanna anni batinye ooso heedhunsarono woy aye geeshshi yanna saꞌurono xissiisiꞌransa digattanno.”

Tini lamenti ikkito, ooso gufidhuro shiiro amanna anna mageeshshi geeshsha gawajjitannoronna  xissono mageeshsha keeshshitannoro leellishshanno. Mittu dokiterichi togo yee borreessinoti halaaleho: “Oosote reyo jajjabu reyoni roore xissiissannotenna masissannote; korkaatuno maatete giddo ooso jajjabba balaxxe reyitanno yine agarrannikkihuraati. . . . Mittu qaaqqi reyanno wote, kuni qaaqqi lophe kalaqanno fiixoomi [yaano beetto, anna, ahaaho assannotinna] wole hagiirsiissanno hexxo baala mitteenni baꞌanno.” Umo kaꞌino meyatino hakko garinni xissiisidhara dandiitanno.

Minaanna shiidhinoti mitte mancho togo yitino: “Ayiddaanniꞌya Raaseli, Layinki Alamete Oli yannara Pasifiikete olu bayicho olantote xagisaancho ikke loosino. Hakkono lowo geeshsha waajjishanno oli giddonni keere fulino. Galagale Yunaayitidi Isteete hige dancha heeshsho heeꞌrino. Yannate gedensaanni Maganu Qaali soqqamaancho ikki. Dirisi 60 ikke saita wodanu xisso noosita leellishanno malaati leelli. Ikkirono barru barrunku diinaggesira jawaataho. Maaju aganira 1988nni mitto barra hedeweelcho wodanisi loosa agureenna reyi. Isi reyo lowo geeshsha gawajjitinoe. Keerunni nafa diyoommasi. Isi minaannaꞌya calla ikkikkinni lowo geeshsha baxeemma jaalaꞌyaati. Mitteenni 40 diro heeꞌnoommo. Xa kayinni lowo geeshsha callatoomma.”

Kuriuu, woꞌma alamera heedhanno maatera barru barrunku iillitannote kumunni kiirranni dadillissanno ikkito giddo shiimate. Batinyu shiiro gantinonsari coyidhinonte gede, ooso, minaanni, minaama, annu, ama woy jaalu reyiꞌnero Kiristaanchu Phaawuloosi, reyo ‘goofimarchu diinaati’ yiinoti halaale ikkase huwattinanni. Mannu togooha masisanno duduwo macciishshanno wote, “Ikkara didandaanno! Ani diammaneemmo” yaara dandaanno. Albaange laꞌneemmonte gede wolurino macciishshamannonsari no.—1 Qorontoosi 15:25, 26.

Kayinni shiidhinorira mayi macciishshamannonsaro laꞌnammora albaanni, hanni mite mite hasiissanno xaꞌmora dawaro qollo. Reyote yaa heeshshote goofimarchooti yaate? Reyitinore galagalle laꞌꞌa dandiineemmo hexxo no?

Qullaawu Maxaafi borreessaanchi Phaawuloosi “goofimarchu diina” ikkitino reyonni gantanni hexxo noota xawisino. “Reyo mullare ikkitanno.” (Haaro Alame Tiro) “Goofimarchoho qeelamanno diini reyote” yee borreessino. (1 Qorontoosi 15:26) Phaawuloosi tenne hexxo lainohunni horonta huluullaminokkihu mayiraati? Korkaatuno reyotenni kainohu Yesuusi Kiristoosi rosiisinosi daafiraati. (Soqqamaanote Looso 9:3-19) Konni daafira Phaawuloosi togo yee borreessino: ‘Reyo dagginohu mittu manchi Addaami widoonni ikkinonte gede, reyotenni kaꞌꞌano dagginohu mittu manchi Yesuusi Kiristoosi widoonniiti. Addaami abbino daafi widoonni mannu duuchu reyannonte gede, hattono Kiristoosi widoonni mannu duuchu heeshsho afiꞌranno.’—1 Qorontoosi 15:21, 22.

Yesuusi Nayina yinanni olliira mitte gunnitte manchonni xaade reyino beettose lai wote lowo geeshsha mararinose. Qullaawu Maxaafi togo yaanno: ‘Yesuusi hakko ollaa iilli woyite reeshsha haaꞌre olluunni fulanno manninni xaadi. Kunino mitte gunnitte manchora afidhinohu mittichu beettise reyino. Olluunnihu lowo manni ise ledo no. Mootichu ise lai woyite wodanisinni marare, ‘Hanni wiꞌli’ yiise. Hakkiichinni Yesuusi gamba yee rere kisi. Reeshsha duhe noo manni uurri. Yesuusi, ‘Koo wedellicho gotti yite kai yeemmohe’ yii. Reyino beetti gotti yee kae coyiꞌra hanafi. Yesuusino qole  amasira uyi. Woꞌmunku manni waajje Magano galati. ‘Bayiru himanaanchi mereeronke kaino; Maganu mannasi towaatara dayi’ yitu.’ Yesuusi mararrotenni, manchote beetto reyotenni kayisinota wodanchi! Togo assasi konni kaꞌira maricho leellishshannoro hedi!—Luqaasi 7:12-16.

Madaarsha fulino manni noowa, Yesuusi reyino beetto kayise hambannikki dhagge assino. Tini kao, Yesuusi tenne dhagge assara albaanni masaalinotera, “haaru iimi” hunda uullate aana heeshsho afiꞌrate kaꞌnanni kaora safote. Hatte yannara Yesuusi togo yiino: ‘Konnira hanni maalaꞌle; waammate giddo noori qaalesi macciishshitanno yanna daggannona.’—Ajuuja 21:1, 3, 4; Yohaannisi 5:28, 29; 2 Pheexiroosi 3:13.

Kao laino manni mereero Pheexiroosinna 12 Yesuusi harunsaano giddo mitu mitu no. Reyotenni kainohu Yesuusi umisi Galiilu Baari mule coyiꞌranna macciishshitino. Qullaawu Maxaafi togo yaanno: ‘Hakkonni gedensaanni Yesuusi, “Daggine shooꞌme” yiinsa. Mooticha Yesuusi ikkinota duuchunku affinohura, rosaanosi giddo mittuno, “Ati ayeeti?” yee xaꞌminosihu dino. Yesuusi daye tima haaꞌre uyiinsa; hattono qulxuꞌme uyiinsa. Yesuusi reyotenni kaihu gedensaanni rosaanosira leellanna tini sayikkite.’—Yohaannisi 21:12-14.

Konni daafira, Pheexiroosi woꞌmu wodaninni togo yee borreessino: ‘Yesuusi Kiristoosi reyotenni kaꞌꞌasinni baꞌannokki hexxo uyinonkehu, bayira maarosinni haaro ilamanni oososi assinonkehu, Mootichinke Yesuusi Kiristoosi Anna ikkinohu Maganu maassamo.’—1 Pheexiroosi 1:3.

Soqqamaasinchu Phaawuloosi huluullissannokki hexxosi togo yee xawisino: ‘Coyilla kayinni kulammohera hasiꞌreemmohu, ani ammaꞌnoommota annuwanke Magani doogo ‘Soꞌrote’ yitanno. Ani kayinni Muse Seeri giddo noohanna Himanaanote borro giddo nooha duucha ammaneemmo. Insa hexxitannonte gede anino Maganu cubbaataammanna keeraano reyotenni kayisannota ammaneemmo.’—Soqqamaanote Looso 24:14, 15.

Konni daafira, miliyoonetenni kiirranni manni reyotenni baxxinonsa manni ledo uullate aana xa noo ikkito woyyaabbeenna galagale xaadannoti kaajjaddo hexxo noonsa. Tini woyyaabbanno ikkito maati? Banxeemmori reyitinorira noonsata Qullaawu Maxaafi aana xintantino hexxo lainohunni, tenne birosherera, “Reyitinorira Noota Huluullissannokki Hexxo” yaanno birxichi hunda roore xawishsha uyinanni.

Kayinni balanxe baxxinanni manni reyiꞌnero xaꞌmitinara dandiitinanni xaꞌmuwa laꞌno: Togo ikke manchitaꞌya garaho? Xissoꞌya dandee heeꞌreemmohu hiittoonniiti? Wolootu sheshifachishshaera dandiitannohu hiittoonniiti? Shiidhinore sheshifachisha dandeemmohu hiittoonniiti? Duuchunku aleenni, Qullaawu Maxaafi reyitinorira noonsata huluullissannokki hexxo lainohunni mayyaanno? Reyino manni ledo galagale xaada dandeemmo? Xaadeemmoha ikkiro hiikko xaadeemmo?