ỌSHARE ỌVO VWẸ NEW YORK (U.S.A.) da ta: “Ọmọ mẹ Jonathan ra mrẹ igbeyan rọyen vwẹ asan ro sheri emerha. Aye mẹ, Valentina guọnọre nẹ ọ yanra-an. Oshọ muo kidie imoto bun idjerhe na nọ. Ẹkẹvuọvo, ọmọ na vwo ẹguọnọ rẹ ekuakua uhworo mamọ, igbeyan rọyen na vwo asan ra da rhuẹrẹ erọnvwọn tiọyena rọ sa nẹrhẹ Jonathan tẹn ona rọyen. Mẹvwẹ hẹ uwevwin vwẹ Manhattan, New York. Aye mẹ kọn bru ihwo orua rọyen ra vwẹ Puerto Rico. Mi roro nẹ Jonathan che rhivwin rhe nananana. Siẹvuọvo na, agogo rẹ uwevwin na de hworo. ‘O muẹro nẹ ọyen Jonathan.’ Ẹkẹvuọvo, ọ dia ọye-en. Elọkpa vẹ ihwo re vwẹ omaesivwo rẹ okpakpa vwọphia, eyen rhere. Ọvo usun rẹ elọkpa na da nọ vwẹ nẹ, ‘Wo vughe ohwo ro vwo ilaisẹnsi nana?’ ‘E, ọ rẹ ọmọ mẹ, Jonathan.’ ‘Avwanre vwo iyẹnrẹn ọbrabra. Ọmọ wẹn, . . . ọmọ wẹn . . . ghwuru vwẹ asidẹnti.’ Ota ẹsosuọ ro nẹ uvwe unu rhe ọyehẹ, ‘Ọ cha sa dia uyota-a!’ Ovuẹ ọbrabra yena phi ora phiyọ ubiudu avwanre vwẹ ikpe buebun.”

 Ọsẹ ọvo vwẹ Barcelona (Spain) de si: “Vwẹ ukpe rẹ 1961 fiẹ 1969, orua avwanre vọnre vẹ omavwerhovwẹn. Aye mẹ María herọ, vẹ emọ avwanre erha David, Paquito vẹ Isabel rehẹ ẹgbukpe 13, 11, vẹ 9.

“Ẹdẹ ọvo vwẹ March, 1963, Paquito vwo nẹ isikuru rhe, ọ da tanẹ uyovwin kpere mamọ. Jẹ avwanre riẹn oboresorọ-ọ. Inọke erha vwọ wan nu, o de ghwu. Ọga rọ nẹrhẹ ọbara hwẹ vwẹ afọnrhe, yen hwere.

“Paquito vwo ghwu na, ọ vrẹ ẹgbukpe 30 re. Dedena, ughwu rọyen na je miavwan avwanre oma. Otoro obo ro kri te-e, yẹrẹ uche emọ rẹ ọmiọvwọn vwori-i, ọvo de ghwu, orọnvwọn rode yen ghwru vabọ.”

 Ikuegbe ivẹ nana, djerephia nẹ ọmiaovwẹ rẹ ughwu rẹ ọmọ sua pha gangan, o ji krotọ mamọ. Eta rẹ idọktọ ọvo siri ghini uyota, rọ vwọ ta: “Ughwu rẹ omotete, da ohwo vrẹ ọ rẹ ohwo rọ kpakore, kidie, vwevunrẹ uwevwin, ọmọ yen ohwo ro fori nẹ o ghwu kuko. . . . Ughwu rẹ omotete, nẹrhẹ omamọ akpeyeren ro rhe yerin jovwo bru dje, ji te oyerinkugbe ro rhe vwo [kerẹ ọmọ, aye, uvwrọmọ], vẹ obo ro rhe ru vwọ kẹ ihwo efa.” Ọtiọyen aye rẹ evun rọyen sheri ji hirharokuẹ ọmiaovwẹ rẹ ughwu rẹ ọmọ rọyen.

Aye ọvo rẹ ọshare rọyen ghwuru da ta: “Ọshare mẹ, Russell, sivwin ihwo re wan oma vwẹ Ofovwin Akpọeje II. O rhiẹromrẹ ifovwin buebun ri muoshọ re. O de rhivwin rhe America, o vwo yerin akpọ rẹ ufuoma. Ọke vwọ yanran na, ọ da rhe dia ohwo ro ghwoghwo Ota Ọghẹnẹ. Ọke rọ vwọ vrẹ ẹgbukpe 60 re, ọ da rhe riẹn nẹ o vwo ọga rẹ ubiudu. Ọ je davwẹngba ro vwo yerin ghene ọga na. Ẹkẹvuọvo, ẹdẹ ọvo vwẹ July 1988, ọga rẹ ubiudu na de hwe. Ughwu rọyen na hra ẹwẹn mẹ totọ. Me mrẹ ọke vwọ tota kẹ o ki ghwu-u. Ọ diẹ ọshare ọvo ọ hepha kẹ vwẹ-ẹ, jẹ ugbeyan rọ ma kẹrẹ ovwẹ. Ẹgbukpe 40, ọyen avwanre rọvwọnre. Asaọkiephana, ẹdia rẹ ọruvwohwo kọyen me hepha.”

Enana evo usun rẹ erọnvwọn ebrabra re phia kẹ erua sansan vwẹ akpọ na kẹdẹ kẹdẹ. Ihwo buebun rehẹ ẹdia uvweri cha vuẹ wẹ nẹ, ọke rẹ ọmọ, ọshare, aye, oni, ọsẹ, yẹrẹ ugbeyan wẹn de ghwu, ku wọ cha riẹn nẹ ughwu ghini “ọvweghrẹ rọ ka uko,” kirobo rẹ Pọl siri. Ọke buebun, iyẹnrẹn ọbrabra ọtiọyena se mu ihwo ẹro ẹsosuọ-ọ, ayen siọn nẹ, “Ọ cha sa dia uyota-a! O muvwẹro-o.” O ji vwo erọnvwọn efa rẹ ayen ruẹ kirobo ra cha mrẹ vwẹ obaro.—1 Kọrẹnt 15:25, 26.

Ẹkẹvuọvo, tavwen avwanre ke tota kpahen uvweri, e jẹ a kpahenphiyọ enọ eghanghanre evo. Ughwu yen oba rẹ akpeyeren rẹ ohwo na? Iphiẹrophiyọ herọ nẹ a cha rhoma mrẹ ihwo rẹ avwanre vwo ẹguọnọ kpahen ri ghwuru?

Vwevunrẹ Baibol na, Ọyinkọn Pọl kẹ avwanre iphiẹrophiyọ re che vwo nẹ abọ rẹ ughwu, rọ dia “ọvweghrẹ rọ ka uko.” O de si: “Ughwu hẹ ọvweghrẹ rọ ka uko rọ cha ghwọrọ.” (1 Kọrẹnt 15:26) Diesorọ ọnana vwo mu Pọl ẹro? Fikiridie, Jesu Kristi rọ dia ohwo ra rhọnvwọn nẹ ushi rhe na, ọyen yono Pọl. (Iruo Rẹ Iyinkọn Na 9:3-19) Kọyen sorọ Pọl se vwo si nẹ: “Kidie kirobo rẹ ughwu wan oma rẹ ohwo ọvo [Adam] rhe, ọtiọye evrẹnushi rẹ otu ri ghwuru je wan oma rẹ ohwo ọvo [Jesu Kristi] rhe. Kidie kirobo rẹ ihwo ejobi wan oma rẹ Adamu ghwu, ọtiọye rhe vwẹ oma ri Kristi ihwo ejobi ke cha rhọ.”—1 Kọrẹnt 15:21, 22.

Ọ miavwan Jesu oma mamọ ọke rọ vwọ mrẹ ayeuku ọvo vwẹ Nen vẹ ọmọshare rọyen ro ghwuru. Baibol na da ta: “[Jesu] rhi vwo te ughere rẹ orere na [Nen], nighe, a ra ghwa orivwin ọvo cha, ọmọ ọvuọvo rẹ oni vwiẹri, aye na kẹ ayeuku; ihwo rẹ orere na buebun ke viẹ nene. Rẹ Ọrovwohwo vwọ mrẹ, ẹro rọyen da dọn ọ da ta kẹ, Wọ viẹ-ẹ. O de rhi si kẹre okọ na, ihwo re ghwarọ de mudia. Ọ da ta, Emeghene na, Me ta kẹ wẹ, vrẹn. Ọ ro ghwuru na de vrẹn tidia, kọ ta ota. Ọ da reyọ vwọ kẹ oni rọyen. Oshọ de mu ayen ejobi; ayen de jiri Ọghẹnẹ, tanẹ, Ọmraro rode rhi mu vwẹ  uherevie rẹ avwanre, Ọghẹnẹ bru ihwo rọyen rhe re.” Jokaphiyọ arodọnvwẹ ro mu Jesu vwọ rhọnvwọn ọmọshare rẹ ayeuku na! Roro kpahen oborẹ ọyena dje oborẹ ọke rọ cha obaro na cha dia!—Luk 7:12-16.

Vwẹ irharo rẹ ihwo na yen Jesu de ru igbevwunu rẹ evrẹnushi rọ cha sa chọrọ ayen ẹro na-a. Ọnana odjephia rẹ evrẹnushi rọ cha phia vwẹ otọrakpọ na vwẹ otọ rẹ usuon rẹ “odjuvwu ọkpokpọ” rẹ Jesu tota kpahen jovwo re na. Jesu tare vwẹ ọke yena nẹ: “Wo jẹ ọnana gbe ovwan unu-u; kidie ọke na cha rẹ irivwi rẹ hẹ evun rẹ ishi ejobi che vwo nyo urhuru rọyen, ke cha yanphia.”—Ẹvwọphia 21:1, 3, 4; Jọn 5:28, 29; 2 Pita 3:13.

Pita vẹ idibo efa ri nene Jesu ji rhiẹromrẹ evrẹnushi na. Jesu tota kẹ ayen ọke rovwo vrẹnushi nu, vwẹ Urhie ri Galili. Ọbe ri Jọn da ta: “Jesu da ta kẹ ayen, A mọ re a re emu. Asakiephana ohwo ọvuọvo yivwi nọ nẹ, Wẹ ono-o? Ayen riẹnre nẹ ọye hẹ Ọrovwohwo na. Jesu rhere ọ da reyọ ikara na ọ da vwọ kẹ ayen, ọtiọye ji te eri na. Asaọkiephana ọnana kọye asiarha ri Jesu vwẹ oma phia kẹ idibo na ro vwo vrẹn nẹ ughwu na.”—Jọn 21:12-14.

Kọyen sorọ Pita sevwo si vẹ imuẹro nẹ: “Ebruba kẹ Ọghẹnẹ kugbe Ọsẹ rẹ Ọrovwavwanre Jesu Kristi! Ra vwẹ arodọnvwẹ rọyen rode na rhoma vwiẹ avwanre ọkpokpọ kẹ iphiẹrohọ ro jeghwo vwẹ oma re vrẹnushi ri Jesu Kristi nẹ ughwu rhe.”—1 Pita 1:3.

Ọyinkọn Pọl vwo imuẹro kokoroko, rọ vwọ tanẹ: “Mi de segbuyota kemu kemu rẹ urhi na djeri eyẹ rẹ emraro na si phihọ otọ, vẹ iphiẹrohọ kpahe Ọghẹnẹ rẹ ekpuyovwi rẹ ayen vwori, nẹ evrẹnushi herọ kẹ ihwo te ihwo ọsoso te i ri jẹ ọsoso ẹdia.”—Iruo Rẹ Iyinkọn Na 24:14, 15.

Ọtiọyena, iduduru rẹ ihwo ki se vwo iphiẹrophiyọ rẹ ayen vwọ mrẹ ihwo rẹ ayen vwo ẹguọnọ kpahen re cha rhoma yerin vwẹ otọrakpọ na. Mavọ yen akpọ na cha dia ọke yena? A cha fuẹrẹn oborẹ Baibol na ta kpahen iphiẹrophiyọ rọ herọ vwọkẹ ihwo rẹ avwanre vwo ẹguọnọ kpahen ri ghwuru, vwẹ uyovwinrota rọ koba rẹ ibroshọ nana, “Obọdẹn rẹ Iphiẹrophiyọ Vwọ kẹ Ihwo ri Ghwuru.”

Ẹsosuọ, e jẹ avwanre roro kpahen enọ evo ru wọ sa nọ siẹrẹ wọ da hẹ ẹdia uvweri: Ofori mi vwo vwere uvweri ọtiọna? Mavọ mi sevwo yerin ghene uvweri? Die yen ihwo efa se ru vwọ chọn vwẹ uko? Mavọ me sa vwọ vwẹ ukẹcha kẹ ihwo rehẹ ẹdia uvweri? Ọ rọ ma rho, Die yen Baibol na tare kpahen obọdẹn rẹ iphiẹrophiyọ rọ herọ vwọ kẹ ihwo ri ghwuru? Me je sa mrẹ ihwo ri mi vwo ẹguọnọ kpahen ri ghwuru? Vwẹ tivọ?