Yʋʋm 25 pag gʋlsda woto: “Kansɛɛr bãag kʋʋ mam ma-wubdgã 1981 yʋʋmda. A kũumã yɩɩ toog wʋsg ne maam la m saam-biigã. M da tara yʋʋm 17, la m saam-biigã ra tara yʋʋm 11. A kaalmã ra nams-m-la wʋsgo. B sẽn da yeel maam t’a ra bee yĩngrã yĩnga, be neere, m da rat n kʋʋ m mengã n kẽng yĩngr n bʋʋg-a. A ra yaa mam zo-nongr sẽn yɩɩdã.”

Kũumã sẽn tar tõog n na n deeg y nin-nongrã wẽnda bũmb sẽn pa-tɩrga. La a sã n wa zĩndi, f sã n tagsdẽ tɩ f pa na n le tõog n gom ne-a n la ne-a, bɩ n mobg ned ning y sẽn nongã, sakr tõe n yɩɩ toog n yɩɩda. Pa b sẽn na n yeel-y tɩ y nin-nongrã bee saasẽ n na n yẽes toogã tɩlae ye.

La Biiblã tara saagr sẽn yaa toor wʋsgo. Wala tõnd sẽn yã tɩ loogã, Gʋlsgã wilgdame tɩ y le tõe n maana lagem-n-taar ne y nin-nongrã sẽn ki wã ka la bilfu, pa zĩig ning b sẽn pa miẽ saasẽ ye, la yaa tẽng zug ka bala, laafɩ la tɩrlem pʋgẽ. La sasa kãngã, ninsaalbã na n paama saagr n maan sũ-noog ne yĩns-laafɩ sẽn zems-zãngã, la b pa na n ki abada ye. ‘La sɩd-sɩda tags-kãngã yaa mamsg bala,’ woto la neb kẽer tõe n yeele.

Bõe n yaa tɩlae sẽn na yɩl n tɩ y bãng tɩ saagr kãngã pa belgre? Sẽn na yɩl n tẽ kãabgo, y segd n kɩsa sɩd tɩ ned ning sẽn maand kãabgã ratame la a tõeeme n pids-a. Rẽ, ãnd n kãab tɩ kũum na n le vɩɩndame?

Yʋʋmd 31 T.W. tɩ-tobend wakate, a Zezi Kirist togsa ne yẽesem t’a Zeova Wẽnnaam kõ-a-la tõog t’a vʋʋg kũumã. A Zezi kãaba woto: “A wa Ba sẽn vʋʋgd kũum n kõt-b vɩɩma, Biiga me kõta a sẽn dat-b rãmba vɩɩm. Bɩ yãmb da yɛɛs ne yõ wã ye. Tɩ bõe, wakat watame tɩ fãa sẽn be yaad pʋsẽ na n wʋm bãmb [a Zezi] koɛɛg n yi.” (Zã 5:21, 28, 29) N-yẽe, a Zezi Kirist kãabame tɩ neb tus-kẽema sẽn ki na n le vɩɩnda tẽn-kãngã zugu, n paam saagr n pa a zug wakat sẽn-kõn-sa laafɩ la arzãn pʋgẽ. (Luk 23:43; Zã 3:16; 17:3; mak Yɩɩl Sõamyã 37:29 ne Matɩe 5:5.) A Zezi sẽn maan kãabgã yĩnga, yaa vẽeneg t’a rat n pids-a lame. La a tõeeme bɩ?

A sẽn maan kãab kãngã pa ta yʋʋm a yiib la a Zezi wilg ne tõog kãseng t’a ratame la a tõe n vʋʋga kũum ye.

Ra yaa yell sẽn sidgd yĩnga. A Lazaar da  bẽeda bã-kɛgenga. A tãop a yiibã, a Maari la a Mart tʋmame tɩ b tɩ togs a Zezi sẽn da be Zʋrdẽ Kʋɩlgã rʋʋndã: “Zusoaba, ges-y-yã, yãmb sẽn nong a soaba ka keem ye.” (Zã 11:3) La b ra miime t’a Zezi nonga a Lazaare. A Zezi ra pa na n tʋlg n wa ges a zoa wã sẽn da pa keema sɩda? Nebã pa wʋm yellã võor ye, walla t’a kẽng Betani zĩig pʋgẽ wã, a Zezi paa zĩig ning a sẽn da beẽ wã rasem a yiib yɛsa.—Zã 11:5, 6.

A Lazaar kii b sẽn tʋm tɩ b tɩ togs a bãagã kɩbar bilf poore. A Lazaar sẽn ki wã a Zezi bãngame, la a ra tʋll n maana bũmb rẽ wɛɛngẽ. A Zezi nee a na n ta Betani t’a zo-nongrã ra kiime tɩ rasem a naase. (Zã 11:17, 39) A Zezi ra tõe n vʋʋga ned sẽn da ki sẽn kaoos wʋsg woto sɩda?

A sẽn wʋm t’a Zezi ra watame, a Mart sẽn yaa pʋg-yẽesengã zoeeme n tɩ seg-a. (Mak ne Luk 10:38-42.) A sũ-sãoongã tuka a Zezi t’a kõ-a bas-yard kãngã: “Fo tão wã na n vʋʋgame.” A sẽn wilg a tẽeb-sɩd ne beoog-daar vʋʋgrã, a Zezi togs-a-la vẽeneg woto: “Mam yaa vʋʋgre la vɩɩm. Ned ninga sẽn tẽed maam, baa yẽ sã n ki, a na paam vɩɩm.”—Zã 11:20-25.

A sẽn ta yaoogẽ wã, a Zezi yeelame tɩ b lak kugrã sẽn da pag-a wã. Rẽ a sẽn zẽk a koɛɛg n pʋʋs poore, a kõo noor woto: “Lazaare, yi!”—Zã 11:38-43.

Nebã fãa ra geta yaoogã. Rẽ poore, zug n lɩk likã pʋgẽ. B ra vila a nao wã la a nusã ne pɛɛla, t’a nengã me ra vili. “Bɩ y vilg pɛɛlã n bas-a t’a kẽnge,” woto la a Zezi kõ noore. Yaoolem peen-vindgã lʋɩɩ tẽngã. N-yẽe, ra yaa a Lazaare, rao ning sẽn da ki rasem a naas sẽn da loogã.—Zã 11:44.

B wilga a Lazaar vʋʋgrã a Zã Evãnzillã  pʋgẽ wala kʋdemd yel-sɩda. Kɩba-kãngã pida ne togs-n-welg sẽn yaa sɩd wʋsg hal n kɩt t’a pa tõe n yɩ solemd ye. F sã n kɩɩs t’a pa zĩndi, f kɩɩsda Biiblã yel-soalem fãa, n paas a Zezi Kirista meng vʋʋgrã. La kɩɩs a Zezi vʋʋgrã rat n yeelame tɩ kɩɩs kiris-neb tẽeb-sɩdã gilli.—1 Korẽnt dãmba 15:13-15.

Sɩda, y sã n sak n deeg tɩ Wẽnnaam beeme, pa segdẽ n yɩ toog ne-y tɩ y tẽ vʋʋgrã ye. D rɩk makre: Rũndã-rũndã, ned tõeeme n ning a yaoolem daabã video zugu, la a kũumã poore, a roagdbã la a zo-rãmbã tõe n yã-a lame la b wʋm a sẽn wilgd b sẽn na n pʋɩ a paoongã to-to. Yʋʋm koabg sẽn looge, b ra pa tagsd tɩ bũmb a woto tõe n yɩɩme ye. La sã n yaa ne neb nins sẽn vɩ dũniyã we-zãrsẽ wã, video yaa bũmb sẽn wẽnd yel-solemde. Ninsaalbã sã n tõe n tũnug ne bãngrã noy Naandã sẽn luglã n lebs n yiis gesr b sẽn ne la b sẽn wʋmde, Naandã pa tõe n maan tɩ yɩɩg woto ne zĩig sẽn zãr sɩda? Rẽ, a pa zems tɩ Ned ning sẽn naan vɩɩmã tõog n lebs n naan-a sɩda?

A Lazaar vʋʋgrã yel-solemd sõng n paasa nebã tẽeb-sɩd ne a Zezi la ne vʋʋgrã. (Zã 11:41, 42; 12:9-11, 17-19) Woto wilga ne manesem sẽn sidgd yĩnga, a Zeova la a Biriblã raab la b tʋlsem sẽn yaa vʋʋg kũumã.

A Zezi manesmã a Lazaar kũumã taoor pukda Wẽnnaam Biriblã bʋgsem yĩn-sidg kãsenga. A yĩn-sids zulumsã sẽn puk wakat kãngã wã wilgdame t’a tara tʋlsem kãseng n na n vʋʋg kũumã. D karemdame: “A Maari sẽn ta a Zezi sẽn be zĩig ningã n yã bãmba, yẽ yĩgimda bãmb taoore n yeel bãmb yaa: ‘Zusoaba, yãmb sã n da beẽ ka, mam tão wã ra ka na n ki ye.’ A Zezi sẽn yã tɩ yẽ ne Zʋɩf rãmba sẽn tũ yẽ wã yãbdame, bãmb wẽe sir kãsenga la b sũur sãamame. La bãmb sokame: ‘Yãmb muma yẽ yɛɛnẽ?’ Bãmb leoka a Zezi yaa: ‘Zusoaba, wa-y n ges-y-yã.’ A Zezi yãbame. Woto yĩnga, Zʋɩf rãmba yeelame: ‘Gese, bãmb nonga yẽ wʋsgo.’”—Zã 11:32-36.

Goam a tãab n wilgd a Zezi ninbãan-zoeer kãsengã: “wẽe sir kãsenga,” “sũur sãamame,” la “yãbame.” Pipi gom-biis nins b sẽn tũnug n togs kɩba-kãngã sẽn sidgd yĩnga wilgdame t’a zoa a Lazaar kũumã la a sẽn yã a Lazaar tão wã sẽn yãbdã ra tukda a sũurã wʋsg hal n kɩt t’a nina ra pid ne nintãm. *

Bũmb ning sẽn yaa kãseng yaa t’a Zezi ra reng n vʋʋga neb a yiibu. La so-kãngã, a ra rat n maana woto me ne a Lazaare. (Zã 11:11, 23, 25) La a “yãbame.” Rẽ, ninsaalbã vʋʋgr pa na n yɩ tʋʋm zaalg ne a  Zezi ye. Bʋgsem yĩn-sids zulums nins a sẽn wilg segb kãngã wã wilgda vẽeneg t’a tara tʋlsem kãseng n na n yẽes kũumã vargre.

A Zezi sẽn ‘wẽnd a Zeova Wẽnnaam zãng fasɩ’ wã yĩnga, wala sẽn zemse, d segd n gũume tɩ Wẽnnaam maan tɩ ta woto. (Hebre dãmba 1:3) Sã n yaa ne raab ning a Zeova sẽn tar n na n vʋʋg kũumã wɛɛngẽ, kɩs-sɩd soab a Zoob yeelame: “Ned sã n ki, a tõe n le vʋʋgame bɩ? . . . Yãmb sã n bool maam, mam na n sakame. La y na n nonga maam tɩ m yaa y nug-tʋʋmde.” (Zoob 14:14, 15) Ka wã, sɩngr gom-biig ning b sẽn lebg ne “y na n nonga” wilgda Wẽnnaam datem la a tʋlsem kãsengã. (Sɩngre 31:30; Yɩɩl Sõamyã 84:3) Vẽenega, a Zeova gũuda vʋʋgrã sasa ne yãgbo.

D sɩd tõeeme n tẽ vʋʋgrã kãabg bɩ? N-yẽe, sãmbg ka be ye, a Zeova la a Biriblã ratame la b tõe n maan-a lame. Woto rat n yeelame tɩ bõe ne yãmba? Y tara saagr n na n lebs n yã y nin-nongdsã sẽn maan kaalem tẽngã zug ka wã yɛl sẽn yaa toor wʋsg pʋsẽ!

A Zeova Wẽnnaam sẽn kõ ãdem-biisã sɩngr sẽn yaa sõama zẽed sẽn yaa neere, arzãn pʋgẽ wã kãabame t’a na n lebs n lugla Arzãnã tẽn-kãngã zug A yĩngr Rĩungã naam dɩɩb tẽngre a Zezi Kirista sẽn paam ziir masã wã nusẽ. (Sɩngre 2:7-9; Matɩe 6:10; Luk 23:42, 43) Arzãn-paalg kãng pʋgẽ, ninsaalbã buud na n paama saagr n vɩɩnd ne sũ-noog wakat sẽn-kõn-sa tɩ bãas kaẽ ye. (Wilgri 21:1-4; mak ne Zoob 33:25; Ezai 35:5-7.) Kisgr fãa, bu-welsgo, buud-zabr la laogã wẽgb fãa na n saame. Na n yɩɩ tẽng sẽn yɩlg n lebg arzãn a woto buud pʋgẽ la a Zeova Wẽnnaam na n tũnug a Zezi Kirist n vʋʋg kũumã.

Kiris-nin-poak ning yell b sẽn gom bab-kãngã sɩngrẽ wã saagr yaa woto masã. Yʋʋm wʋsg a ma wã kũum poore, a Zeova Kaset rãmbã sõng-a lame t’a zãms Biiblã neere. A tẽra woto: “M sẽn zãms n bãng vʋʋgrã saagrã poore, m yãbame. M sẽn mi tɩ m na n leb n yãa m ma wã yaa bõn-kãseng menga.”

Yãmb me sã n dat ne y sũur fãa n leb n yã ned y sẽn nonge, yaa ne sũ-noog la a Zeova Kaset rãmbã na n sõng yãmb tɩ y zãms n bãng wãn-wãn la y tõe n paam saagr kãngã. Bõe yĩng tɩ y pa na n tɩ yã-b Rĩung Roog ning sẽn pẽ ne yãmbã pʋgẽ, bɩ y gʋls adɛrs rãmb nins sẽn pẽ n yɩɩd sẽn be s.v.n. 32 wã.