1, 2. (a) Nkia kingana katá o Yesu muna songa o kondwa kwa kwikizi kwa afidi a nsambila ya esi Yuda? (b) Nkia diambu dilenda longokwa muna kingana kia Yesu mu diambu dia aleke amatoko ye ndumba?

 UNA kiafinamang’e lumbu kia lufwa lwandi, o Yesu wayuvula kiuvu kiasalukisa e buka kia afidi a nsambila ya esi yuda. Wavova vo: “Kansi adieyi nuna diau? O muntu wakala yo wana wole; wele kwa ndiona wantete, oku vo, e mwana, wenda sal’o unu muna mpatu a vinyo. Ovutwidi vo, ngongo ame: okalokala wiyibenze, wele. Wele kwa ndiona wezole,  ovovele diau adimosi. Ovutwidi vo, mono oyu, e mfumu: kele ko. Nani vana bena, yau ewole, ovangidi luzolo lu’ese?” Afidi a nsambila ya esi Yuda Bavovele vo, “Ndiona wantete.”—Matai 21:28-31.

² Muna mvovo miami, o Yesu wasong’o kondwa kwa kwikizi kwa afidi a Yuda. Oyau bakedi nze i mwana ndiona wanzole, i sia vo, basia o nsilu a vang’o luzolo lwa Nzambi kansi ke balunganisa wo ko. Mase mayingi bezaya wo vo e kingana kia Yesu kilenda sadilwa mpe muna umbakuzi wambote muna zingu kia nzo. Nze i una katoma dio songa, ezak’e ntangwa diampasi muna zaya oma bebanzanga aleke, yovo zaya edi besinga vanga. O nleke nanga olenda kala mwan’ampasi muna ntela a kitoko yovo kindumba kiandi, kansi okuntwala okitukidi se mbuta wa nkwa mbebe yo toma zitiswanga. Tufwete dio sungamenanga ekolo tubadika e diambu dia kolama kw’aleke.

3. Amase ekuma ke bafwete kwenda nzaki ko za yika o mwana vo nkolami?

³ Nanga owanga vo aleke akaka bekolamanga o mase mau. Dilenda kala vo ozeye nzo ina yo mwan’etoko yovo andumba ke lendakananga longwa ko. Kansi, ke diasazu ko muna zaya kana vo o mwana ndiona nkolami kieleka. Ye mpe, dilenda kala diampasi muna bakula ekuma o wana akaka muna nzo yau imosi bekolamanga—akaka—lembi kolama. Adieyi bafwete vang’amase avo bamwene vo mosi muna wana okitukanga se nkolami yo ntima ambadi? Muna vutula e kiuvu kiaki, ediantete tufwete zaya kana nani i nkolami.

4-6. (a) Nani i nkolami? (b) Adieyi bafwete yindula amase kele vo nleke okolamanga ntangwa ke tangwa?

⁴ Muna mvovo miasazu, nkolami i muntu okolamanga  kuna lukanu yovo okwamanananga o kolama e mpungu-wisa. Kansì, o ‘uzowa una muna ntim’a mwana.’ (Ngana 22:15) Muna diadi, ezak’e ntangwa konso mwana nanga okolamanga e wisa kia mase. Ediadi ditoma vangamanga muna kolo kenungunukanga mu nitu ye ngindu, i sia vo muna ntela a kitoko yovo kindumba. E nsobani mpasi yitwasanga muna zingu kia konso muntu, e ndungunuk’aleke yazala ye nsobani. O mwan’aku etoko yovo andumba mu sisa se kena e mvu mia kinsedia yo nungunuka muna mvu mia kimbuta. I kuma, muna kolo kiaki, mpasi dikalanga kwa mase makaka yo wana muna wizana. Ntangwa zayingi, lembi wo zaya amase betezanga ningik’e ndungunuka yayi yo kubabanzila nze wan’akete, ekolo kina vo o wana bazolele kuyimwena vo se ambuta.

⁵ O nleke a nkolami ovezang’o malongi mambote ma mase. Kansi, sungamena dio vo omaka mavangu ma kolama ke mekitulanga muntu se nkolami ko. Muna zingu kia umwanda, o wana akaka kuna lubantiku nanga ke betoma vwanga ludi kia Nkand’a Nzambi mfunu ko, kansi nanga ke akolami kwau ko. Yeno mase, ke nwendi nzaki ko mu yika wan’eno vo akolami.

⁶ I sia vo anamatoko ye ndumba awonso akolami a wisa kia mase mau bekitukang’e? Ke wau dina ko! E ziku kisonganga vo akete kaka besonganga o kolama kwampwena. Kana vo i wau, aweyi tuvova mu kuma kia nleke una vo nkwa lulendo okwamananang’o kolama? Nki kilenda fil’o muntu muna kolama kwa mpila yayi?

7. E zingu kia nza ya satana aweyi kilenda fidil’o nleke mu kolama?

⁷ E kuma kikitulang’o muntu se nkolami i mambu  oma mevangamanga omu nza yayi ya Satana. “E nza yawonso muna mbi ilele.” (1 Yoane 5:19) E nza iyalwanga kwa Satana izele yo mavangu mena vo Akristu bafwete mo sunda. (Yoane 17:15) E fu yayi itomene mwangana kikilu, ya vonza ye yitoma vukumunang’o wantu ke mu tandu yavioka ko. (2 Timoteo 3:1-5, 13) Amase ovo ke balongele ko, yovo lukisa yo lembi tanina o wan’au, balenda sundwa kwa “mwanda una usalanga wau muna [wan’akolami, NW].” (Efeso 2:2) Akundi a sikola mpe bevavanga vukumuna. O Nkand’a Nzambi uvovanga vo: “O makangu ma mazowa, mpasi kemona.” (Ngana 13:20) Diau adimosi, ndiona okalanga vamosi y’awana bazele yo mwand’a nza yayi olenda vukumunwa kwa mwanda wau. Aleke lusadisu lwa ntangwa ke ntangwa bavwidi o mfunu, muna zaya vo o lemvokela e nsiku mia Nzambi i tuku dia zingu kiambote.—Yesaya 48:17, 18.

8. Nkia mambu malenda fil’o mwana mu kolama?

⁸ Oma mevangamanga mpe muna nzo, malenda kala kuma kiakaka muna kolama. Kasikil’owu, ovo ese yovo ngudi nkwa kolw’a malavu, mu ndue a dikaya yovo mbangiki a nkaz’andi, o nyindu a zingu kia mwan’etoko yovo wa ndumba kilenda bendomoka. Kana nkutu muna nzo zina vo zavuvama zilenda kitul’o mwana se nkolami ovo o nleke omonanga vo amase mandi ke benkuvwanga mfunu ko. Kansi o kolama kwa aleke ke kutukanga kaka mu mambu ma kumbazi ko. Aleke akaka bevezang’o malongi ma mase mau, kufwil’owu ko vo amase mau belemvokelanga e nsiku mia Nzambi yo kubatanina mu mambu mayingi ma nza yayi ibazietele. Ekuma? Nanga mu kuma kia waka mwanzi wa mpasi zeto—lembi  lunga kwa wantu. O Paulu wavova vo: “Muna muntu mosi [Adami] i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso, wau yawonso basumuka.” (Roma 5:12) O Adami okedi se nkolami wa nkw’eloko, wasis’evwa diambi kwa mbongo andi yawonso. Aleke akaka bekolamanga, nze una wa kolam’o nkulu au ndiona.

9. Nkia mpil’a longela ilenda kitula o mwana se nkolami?

⁹ E kuma kiakaka kia kolama kwa aleke i ngindu zalembi sikila za mase mu diambu dia long’o wana. (Kolosai 3:21) Amase makaka akwa ntona besimbininang’o wana muna maka mambu yo kubalonga kikilu. Akaka beyambulwilanga, ke besikidisanga nsiku ko milenda sadisa o nleke okondele ngangu. Ke diambu diandwelo ko muna tezanis’o mambu mama mau’mole. E nswaswani a wana lusadisu lwaswaswana mpe yivavanga. Omosi nanga ofwete toma siwang’o meso ke mu wakaka ko. Nana vo, vena ye nona yole muna Nkand’a Nzambi yamfunu muna song’e vonza kina muna sakisang’e tezo kia kafinina yovo yambulwila.

10. O Ele nkia kuma kakadila s’ese dia sumbula, kana una vo wakala ngang’a mbuta ya kwikizi?

¹⁰ O Ele, wa ngang’a mbuta a Isaele yankulu, ese kakala. Mvu 40 kasala muna salu kia kingang’a mbuta, ka lukatikisu ko vo, watoma zay’o Nsiku a Nzambi. Nanga watoma lungisanga e salu kiandi kia kinganga, ye nanga mpe watoma long’o wan’andi Kofene yo Finekase o Nsiku a Nzambi. Kansi o Ele wingi kabayambulwilanga. O Kofene yo Finekase yau bavitang’o ntu muna salu kia kinganga, kansi  “yimpumbulu kwau” bakala, baluta vwang’o mfunu a yukutis’e nzala zau y’ezolela yau yambi. Vana ntandu, vava bavangang’o mavangu mansoni vana fulu kiavauka, o Ele kakala yo unkabu wa kubakatula muna salu kiakina ko. Wabavoveselanga kaka kuna malembe. Muna kuma kia yambulwila kwandi, o Ele waluta vumina wan’andi ke mu Nzambi ko. Muna kuma kiaki, o wan’andi batelamena e nsambila avelela ya Yave e nzo yawonso ya Ele yabwa mu sumbula.—1 Samuele 2:12-17, 22-25, 29; 3:13, 14; 4:11-22.

11. Amase adieyi bafwete longoka muna mbandu ambi ya Ele?

¹¹ O wan’a Ele ambuta bakala vava mavangam’o mambu mama, kansi o lusansu lwalu lusongang’e vonza kia simbinin’elongi. (Tala Ngana 29:21.) Vena yo mase ke beswasanisanga ko o zola yo yambulwila, muna diadi beyambulang’o sia yo sikidis’e nsiku mia sikila muna tezo kifwete lemvokelwa. Ke bevananga elongi diamfunu ko, kana nkutu vo nsiku mia Nzambi mikulwilu. Muna kuma kia yambulwila kwayingi, o wana bevezanga e wisa kia mase yovo konso mpila wisa kiakaka.—Tala Kimpovi 8:11.

12. Nkia vilwa kavanga o Rekabame muna sadila e wisa kiandi?

¹² O Rekabame i mbandu yakaka ya muntu wasadila e wisa kiandi kuna mbalu. Yandi i ntinu ansuka muna kintinu kia kanda dia Isaele yawonso, kansi kakala ntinu ambote ko. O nkangu a nsi ina kavingil’o Rekabame ke wakala wayangalala ko mu kuma kia vangu ki’ezitu basilwa kwa Solomo, w’es’andi. O Rekabame nga wavanga edi diambote? Ve. Vava e buka kia wantu bayenda kunlomba mu vevola e vangu kina bakomenwa, oyandi kasidi wila nkutu luludiku lw’ambuta ko ana banludika, wakudikila diaka e zitu muna vangu kia nkangu. O ntim’andi a lulendo watelamesa makanda kumi e  kintinu kia vambulwa mu buka yole.—1 Ntinu 12:1-21; 2 Tusansu 10:19.

13. Amase aweyi balenda vanga mu lembi bwa mun’esumu dia Rekabame?

¹³ Amase balenda longoka diambu diamfunu muna lusansu lwalu lwa Nkand’a Nzambi mu kuma kia Rekabame. Bafwete ‘tomba Yave’ muna sambu yo fimpa e mpila belongelang’o wana mun’owu wa nsiku mia Nkand’a Nzambi. (Nkunga 105:4) “O lubangamu lukitula nkwa ngangu se lau,” i uvovanga Kimpovi 7:7. E nkendelo za tezo kiafwana zisadisang’aleke mu toma sansuka yo kubatanina muna mbi. Kansi, o wana ke bafwete zingila mu nzo yazala ye nsiku miambadi ko yo simbininwa kuna vo kulenda kubasima yo lembi nungunuka e nkal’a tezo kia kuyisingika yo kuyibund’e vuvu. Vava amase besadilanga e tezo kia nsiku miau yo sia e nkendelo ina yifwene yasikididi, aleke ayingi ke beluta kolamanga ko.

14, 15. Amase aweyi bafwete badikilang’e ndungunuka ya wana?

¹⁴ Kana una vo amase beyangalalanga muna mona vo o mwana mu nungunuka kena kuna kimbuta, nanga ke beyangalalanga ko vav’o nleke kesonganga e tezo kia lembi tuminwanga kaka yo songa vo mu ntela akuyitumina se kena. Muna ntela yayi, kusalukwa ko kele vo mwan’etoko yovo andumba osongel’e fu kia kuyizolela yo lembi vanga una unzolele. Zaya kaka vo diambu dia mase ma Akristu i sans’o Mukristu azikuka, wakumama wa nkwa mbebe.—Tala 1 Korinto 13:11; Efeso 4:13, 14.

¹⁵ Kana nkia mpila mpasi nkutu dikala, amase ke bafwete menganga kaka ko o nswa belombang’o  wana muna kuyivangila yau kibeni mana bazolele. Muna mpila ngangu, o mwana ofwete sansuka nze muntu. Dialudi, vena y’aleke kana una vo bakinu ye mvu miakete, besonganga vo bena ye ngindu za kimbuta. Kasikil’owu o Nkand’a Nzambi uyikanga Yosiya wa ntinu oku vo: “Wau kakala kindende [tezo kia mvu 15], obantikidi o tomba Nzambi a Davidi.” O nleke ndioyu, nkwa mbebe kakala.—2 Tusansu 34:1-3.

16. Ekolo bevewanga o nswa a kuyisolela, adieyi bafwete bakulang’o wana?

¹⁶ Kansì tu, o luvevoko mbebe lutwasanga. Muna diadi, yambula o nleke oyu okitukanga se mbuta kayimwena yandi kibeni e ndandu za nzengo yo mavangu mandi. Edi divovwanga vo “o muntu, konso eyi kekuna, yau i [ketambula, NW],” ediadi dibwilanga mpe aleke ye ambuta. (Ngalatia 6:7) Aleke ke betaninwa yakwele mvu ko. Kansi aweyi, ovo mwana ozolele vanga e diambu dina ka difwete tondwa ko? Yeno mase akwa mbebe nufwete vova vo “Ve.” Kana nkutu ozolele song’e nsasa, ka vafwete kala diambu kana dimosi ko difwete soba o mvovo aku “Ve” muna “Elo.” (Tala Matai 5:37.) Kansi o “Ve” diaku ofwete dio vovela kuna malembe yo umbakuzi, kadi, “E mvutwilu a malembe ivilula nsita.”—Ngana 15:1.

17. Nkia nsatu z’aleke bafwete lungisang’amase?

¹⁷ Aleke lutaninu bevavanga lutukanga muna malongi ma ngwizani, kana una vo ke betondanga kaka nsilu ye nsiku bevewanga ko. O sobang’aka e nsiku landila ezolela ya mase, wana kuyoyesanga. Ye mpe, ovo aleke batomene kasakeswa yo vewa o lusadisu muna sunda o wonga, yovo kondwa vuvu, nanga balenda vwa o unkabu. Aleke bevavanga mpe vo babundwang’e vuvu kwa mase mau.—Tala Yesaya 35:3, 4; Luka 16:10; 19:17.

18. Yika maka mambu ma kiese mu kuma kia aleke.

 ¹⁸ Amase balenda kuyifiaulwisa mu zaya vo, ovo vekala yo luvuvamu, yo zola kwasikila muna nzo, o wana besansuka yo vimpi ye kiese. (Efeso 4:31, 32; Yakobo 3:17, 18) Elo, aleke ayingi batuka muna nzo z’akwa nkolwa malavu, abangiki, yovo nzo za maka mambu mambi, kansi balenda o sunda e nkala yayina yambi, yo kituka se mbuta zambote kikilu. Ozevo, ovo e nzo aku yavuvama aleke mukuyimwena bena vo bavwidi etininu yo zaya vo bezolwanga, bena nze akundi yo vuw’o mfunu—kana nkutu vo ubasidi e nkendelo yo kubalonga e nsiku mia Nkand’a Nzambi kuna umbakuzi—oyau nanga bekituka s’ambuta ana olenda sanisina.—Tala Ngana 27:11.

19. Wau vo mase bafwete ‘long’o mwana muna nzila ina kekwenda,’ nkia mbebe ina kuna kwa mwana?

¹⁹ Diamfunu kikilu dia kala mase mambote. E Ngana 22:6 ivovanga vo: “Tongonwena mwana muna nzila kekwenda, Vava kenunuva, kekatuka mo ko.” Kansi, aweyi tuvova mu kuma kia ana bena vo wan’ampasi kikilu kana una vo bena yo mase mambote? Nga dilenda kal’e? Dilenda. E kapu kia ngana kin’ova ntandu kifwete yindulwa yo tezaniswa y’eyaka kapu yisongang’e mbebe a wana muna ‘wa’ yo lemvokel’o mase mau. (Ngana 1:8) Amase yo wana bafwete lemvokela kumosi e nsiku mia Nkand’a Nzambi, muna wete wa ngwizani a nzo au. Ovo mase yo wana ke basadidi kumosi ko, mpasi bekala zau.

20. Amase nkia mpila ngangu bafwete kala zau vava o wana bevangang’o vilwa lembi wo kana?

²⁰ Aweyi bafwete vang’amase kele vo o nleke ovangidi edi diambi yo kuyisia muna mpasi? Eyayi i ntangwa in’o nleke ketoma vwanga o lusadisu o  mfunu. Ovo mase basungamene dio vo nleke okondele ngangu bazolele sadisa, sunda besunda ekasi diau. Muna nkutakani o Paulu waludika ana bazikuka muna mwanda oku vo: “Ovo muntu obakamene mu’kuzuka, oyeno nuna yo umwanda nunludikila ndiona wina wau, muna mwand’alembama.” (Ngalatia 6:1) Amase balenda sadil’elongi diadi muna sadis’o nleke ovenge edi dia vilwa. Kana una vo bafwete toma kiesesa vo edi kavangidi diambi kikilu, y’owu kafwete vanga mu lembi dio vutukil’o vanga, amase bafwete toma songa vo, ke nleke ko i muntu ambi, kansi evangu kavangidi i diambi.—Tala Yuda 22, 23.

21. Muna landa e mbandu a nkutakani ya Kikristu, adieyi bafwete vang’amase ovo mwana ovenge esumu diampwena?

²¹ Kansi aweyi, ovo o vilwa kavangidi o nleke wampwena kikilu? Muna kuma kiaki, lusadisu lwamfunu yo luludiku lwasikila kavwidi o mfunu. Vava omwisi nkutakani kevanganga esumu diampwena, okasakeswanga mu vilukw’o ntima yo vav’o lusadisu kw’akuluntu. (Yakobo 5:14-16) Ovo ovilukidi o ntima, akuluntu bevava kunsadisa muna mwanda. Muna nzo, e mbebe a sadisa aleke bavangidi o vilwa, kwa mase ina, kana una vo balenda mokena e diambu diadi y’akuluntu. Kieleka, ke bafwete sweka ko kwa akuluntu esumu diampwena kavangidi o mwana.

22. Muna tanginina Yave, nkia fu bafwete teza songa mase ovo mwana ovenge vilwa wampwena?

²² Okala yo wana babwidi muna vilwa i diambu disundidi e mpasi kikilu. Amase wau vo bakendalele kikilu, nanga balenda vumis’o nleke ovenge edi dia vilwa ye nganzi zawonso; kansi ovo vangidi wo okunkendeleka kaka. Sungamena dio vo din’ovanga  muna kolo kiaki kiampasi, i dilenda sadisa yovo mpe yivisa e zingu kia nleke ndioyu. Sungamenanga mpe vo o nkangu andi vava bayambulang’o vanga oma mambote o Yave walolokanga—una bavilukwang’o ntima. Se we e mvovo miandi miazala ye nzola: “Nwiz’owau, [twasingik’e mambu vakati kweto, NW] i kavovele o Yave; o masumu meno kana mabwaka, mepemba nze mvul’ampembe; kana mebiluluka nze nduwa, mekala nze mika.” (Yesaya 1:18) Nkia mpila mbandu ambote kuna kwa mase!

23. Ovo mosi muna wana osumukini esumu diampwena, amase aweyi bafwete vanga, adieyi ke bafwete vanga ko?

²³ Ozevo, tez’o sadisa on’ovangidi e mbi kayambul’evangu diadi. Vava malongi mamfunu kuna kwa mase akwa ngangu ye kwa akuluntu a nkutakani. (Ngana 11:14) Ku sakisa makasi ko, ngatu lwaka mu tezo kia vova yovo vanga mambu malenda mwesa wonga kwa mwana yo lembi finama yaku. Yambul’o makasi ye ntantu zasaka. (Kolosai 3:8) Kuyoyi vanavau ko. (1 Korinto 13:4, 7) Kana una vo ofwete menga e mbi, kubadisa ntima ko yo saul’o mwan’aku. Edi disundidi o mfunu, amase bafwete vang’e ngolo muna songa e mbandu ambote yo siamisang’o lukwikilu lwau muna Nzambi.

24. Ezak’e ntangwa nkia diambu diankenda dilenda bwa muna nzo za Akristu, aweyi bafwete vanga amase?

²⁴ Vena y’aleke bena vo yau kibeni bayibakidi e nzengo za kolama yo bembola mvimba e nkal’a Kikristu. Avo i wau ofwete zindalala mu lunga-lunga e zingu kia esi nzo aya basidi. Ku fwasi e ngolo zaku zawonso ko muna mwan’a nkolami, yo bembola akaka. Kuvavi sweka diambu diadi kw’awaya basidi ko,  kansi mokena dio kumosi yo yau muna tezo kiafwana kuna ngemba zawonso.—Tala Ngana 20:18.

25. (a) Muna tanginina e fu kia nkutakani ya akristu, aweyi bafwete vanga mase ovo mosi muna wana okitukidi se nkolami olembi singikwa? (b) Adieyi bafwete yindula mase ovo mosi muna wana okitukidi se nkolami?

²⁵ O Yoane wa ntumwa wavova vo muna nkutakani ovo muntu okitukidi se nkolami olembi vilukwa, yandi oku vo: “Ke nuntambula mu nzo nkutu ko, ngatu kunkayisa.” (2 Yoane 10) Amase nanga balenda vanga diau adimosi kwa mwana a yau kibeni, wa nkolami una vo se mbuta kikilu. (Tala Nsiku 21:18-21.) Ekana nkia mpila mpasi nkutu ye nkenda dikala, diamfunu muna tanina akaka esi nzo ana basidi. E nzo aku tanina ivava yo filwa ntangwa ke ntangwa. Muna diadi, siamananang’o sia e nkendelo ya nkal’ambote bafwete songa, kansi muna tezo kifwene. Mokenanga yo wana akaka. Songang’o mfunu a ngolo bevanganga kuna sikola ye kuna nkutakani. Yambula mpe bazaya vo kana una vo kuyangalelanga mavangu ma ndiona wa nkolami ko, ongeye ku kumenganga ko. Tumba o mavangu mambi, ke mwana ko. Vav’o nzole muna wan’a Yakobo batwas’e mpasi muna nzo mu kuma ki’evangu diau diambi, o Yakobo wasiba o makasi mau mambi, ke wana ko.—Etuku 34:1-31; 49:5-7.

26. Nkia lufiaulwisu balenda vwa amase ovo mosi muna wana okolamene?

²⁶ Ongeye nanga okuyitumba mun’oma mabwidi omu nzo aku. Kansi kele vo ovangidi kuna ntona zawonso mana mafwan’o vangwa, yo sadila elongi dia Yave muna mpil’ambote, kuyitumbi nkatu ko. Uyifiaulwisa mu zaya vo ke vena ese yovo ngudi alunga ko; i kuma vo, ovangidi mawonso mu kala ese yovo ngudi ambote. (Tala Mavangu 20:26.) Okala yo mwan’a  nkolami muna nzo olembi vilukwanga dina nze siw’e mbele omu ntima, kansi ovo dibwididi, zaya dio vo o Nzambi ozeye wo, ye mpe ke bembola nkutu asadi andi ko aya bayiyekola kwa yandi. (Nkunga 27:10) Ozevo, kitula e nzo aku s’etininu dia mwanda kuna kwa wana akaka ovwidi.

27. Muna sungamenang’e kingana kia mwana kimpumbulu, nkia vuvu balenda kala kiau amase bena yo mwana a nkolami?

²⁷ Vana ntandu, kudimbula vuvu ko. E ngolo ovanganga muna toma longa on’ovenge edi dia vilwa zilenda soba o ntim’andi yo vilukw’e ntima. (Kimpovi 11:6) Nzo zayingi za Akristu babwilwa e diambu diadi, akaka mu yau bamona e mputuka ya mwana ndiona wayibendomona, nze mwan’a kimpumbulu oyikilu muna kingana kia Yesu. (Luka 15:11-32) Diau adimosi mpe dilenda vangama kwa ngeye.