1-3. Ntshinyi tshidi tshifikishe ku divulangana dia mêku a muledi umuepele, ne mmunyi mudibi ne buenzeji kudi benamu?

 MÊKU a muledi umuepele mmabikidibue ne: “mushindu wa mêku adi avula ne lukasa luonso” mu États-Unis. Nsombelu udi wa mushindu umue mu matunga makuabu mavule. Bungi bua katshia ne katshia bua mabaka mashipa, diumbuka kumbelu, diabulukangana mu mabaka, ne dilela bana ba panshi budi ne bipeta bia buenzeji bukole kudi miliyo ya baledi ne bana.

² “Ndi mukamba wa bidimu 28 muena bana babidi,” ke muakafunda mamu kampanda mujike. “Ndi muzengele bikole bualu tshiena musue kukolesha bana banyi kabayi ne tatu. Bidi bimueneka ne: kakuena muntu udi untabalela. Bana banyi batu bammona ndila misangu mivule ne bidi bibatua ku muoyo.” Kusakidila ku diluangana ne ngikadilu bu mudi tshiji, didipiisha, ne bunkaya, baledi bajike bavule batu batantamena lutatu lua dienza mudimu pambelu pa dîku ne dikumbaja midimu ya ku nzubu. Muledi umue mujike wakamba ne: “Kuikala muledi mujike kudi bu kuikala munayi wa dilambu utu ukupa bintu muulu ne ubiakidila. Kunyima kua ngondo isambombo ya didibidija, udi ukokesha ndekelu wa bionso kunaya ndundu inayi diatshimue uyikupa muulu ne uyakidila. Kadi anu pautshidi ukokesha kuenza nanku, muntu kampanda udi ukukupila ndundu mupiamupia.”

³ Bansonga badi mu mêku a muledi umuepele batu misangu mivule ne yabu mvita. Badi ne bua kutantamena majinga makole a mu mutshima bu tshipeta tshia diya dia mu tshimpitshimpi peshi lufu lua muledi kampanda. Bua bansonga bavule dibenga kuikalaku dia muledi didi dimueneka bu didi ne buenzeji bubi butambe.

4. Mmunyi mutudi bamanye ne: Yehowa udi uditatshisha bua mêku a muledi umuepele?

 ⁴ Mêku a muledi umuepele avuaku mu bikondo bifundilebo Bible. Mifundu idi yakula misangu mivule bua “muana wa nshiya” ne bua “mukaji mukamba.” (Tshimuangi 22:22, MMM; Dutelonome 24:19-21; Yobo 31:16-22) Yehowa Nzambi kakalengulula nsombelu wabu. Mufundi wa misambu udi ubikila Nzambi ne: ‘tatu wa bana ba nshiya ne mulumbuluidi wa bakaji ba mu lufuila.’ (Musambu wa 68:5) Bushuwa, Yehowa udi uditatshisha bia muomumue bua mêku a muledi umuepele lelu’eu! Ee, Dîyi diende didi difila mêyi-maludiki adi mua kubambuluisha bua kulubuluka.

5. Ndutatu kayi ludi baledi bajike bakamangana nalu kumpalampala?

⁵ Konkonona mudimu wa dilongolola ku nzubu. “Kudi bikondo bivule biudi ujinga kuikala ne mulume ku luseke luebe, bu padi mashinyi ebe abangisha kuenza mutoyi ne kuyi mumanye kudiwu ufumina,” ke mudi mukaji mushipe dibaka umue wamba. Balume badi bashipe mabaka matuku adi panshi aa peshi badi bafuishe bakaji badi mua kuikala bia muomumue balubakajibue bua bungi bua midimu ya ku nzubu idibu mpindieu ne bua kuenza. Bua bana, dipangika dia bulongame ku nzubu didi divudija disumpakana ne lungenyi lua dipanga bukubi.

6, 7. (a) Ntshilejilu kayi tshilenga tshiakafila “mukaji wa tshitembu” wa mu Nsumuinu? (b) Mmunyi mudi tshisumi mu dikumbaja majitu a ku nzubu mua kufila diambuluisha mu mêku a muledi umuepele?

⁶ Ntshinyi tshidi mua kuambuluisha? Tangila tshilejilu tshifila kudi “mukaji wa tshitembu” mutela mu Nsumuinu 31:10-31 (MMM). Bualabale bua bidiye mukumbaje budi bukemesha​—kusumba, kupanyisha, kutela, kulamba, kusumba madimi, kumuna ne kudima, ne kuenda mushinga. Nsapi wende uvua tshinyi? Uvua muena tshisumi, wenza mudimu too ne ku dilolo ne ubika kumpala kua dîba bua kutuadija midimu yende. Ne uvua mudilongolole bimpe,  upesha bakuabu imue midimu ne ukuata mudimu ne bianza biende bua kuambuluisha bakuabu. Kabiena bikemesha bua mushindu wakasamunyibuaye!

⁷ Biwikala muledi mujike, wikale mumanye majitu ebe a ku nzubu. Wikale ne disanka mu mudimu eu, bualu muine eu udi ne buenzeji buvule bua kuvudija disanka dia bana bebe. Nansha nanku, didianza-kupangadija dilenga ne dilongolola bidi ne mushinga mukole. Bible udi wamba ne: ‘Meji adi muena mutshima wa mudimu upangadija adi amuvudijila lupetu luvule.’ (Nsumuinu 21:5) Tatu mujike umue wakatonda ne: “Tshitu ngela meji ku biakudia too ne pandi ngumvua nzala.” Kadi biakudia bidianza kulongolola bidi mua kuikala bitamba kudiisha mubidi ne kusankisha bipite ebi bidi bilamba lukasa lukasa. Udi kabidi mua kulonga midimu mipiamipia ya ku nzubu. Pa kuebeja balunda badi ne dimanya, kubala mikanda ya midimu eyi, kuebeja bayenji badi mua kufila diambuluisha, bamue bamamu bajike bakamanya mua kulaba mukubu, kuakaja milonda ya mâyi, ne kulongolola mashinyi kakese.

8. Mmunyi mudi bana ba baledi bajike mua kuambuluisha kumbelu?

⁸ Mbimpe kulomba bana bua bakuambuluishe anyi? Mamu mujike umue uvua wela meji ne: “Ndi musue kukumbaja dipangika dia muledi mukuabu pa kupepejila bana nsombelu.” Bualu ebu budi mua kumvuika kadi pamu’apa kabutu misangu yonso butuadila muana disanka. Bansonga batshinyi ba Nzambi ba mu bikondo bifundilebu Bible bavua bapeshibua midimu mikumbanyine. (Genese 37:2; Musambu wa Solomo 1:6) Nunku, nansha biwikala ne ntema bua kubenga kubomekela bujitu bupite, neuleje meji pa kubapesha imue midimu bu mudi disukula malonga ne kulama nzubu wabu wa kulala ne mankenda. Bua tshinyi kubenga kuenza imue midimu pamue? Kuenza nunku kudi mua kupetesha disanka divule.

9. Bua tshinyi bamamu bajike batu misangu mivule bapetangana ne ntatu ya mfranga?

⁹ Baledi bajike bavule batu bamona bibakolela bua kukumbaja makengela abu a mfranga, ne bamamu bakena  basela batshidi bansongakaji batu pa tshibidilu ne ntatu ya pa buayi. a Mu matunga mudi mbulamatadi ufila diambuluisha, badi mua kumona ne: mbia meji bua kudipeta, too ne ku tshikondo tshikalabu mua kupeta mudimu. Bible udi ushila bena nkristo njila bua kubabidilabu ndongoluelu eu padibi bikengedibua. (Lomo 13:1, 6) Bakamba ne bakaji badi bashipe mabaka batu baakama ntatu ya muomumue. Bavule, benzejibue bua kuangatshibua ku mudimu kunyima kua bidimu bivule bia dikala mamu wa nzubu, batu misangu mivule bapeta anu midimu ya difutu dikese. Bamue badi badikolesha bua kuakaja nsombelu wabu pa kudifundisha ku programe ya dilonga mudimu anyi malonga a matuku makese.

10. Mmunyi mudi mamu mujike mua kumvuija bana bende bua tshinyi udi ne bua kukeba mudimu wa ku mubidi?

¹⁰ Kukemi bikala bana bebe kabayi ne disanka paudi ukeba mudimu, ne kudiumvu mupiile. Bishilangane, ubumvuije bua tshinyi udi ne bua kuenza mudimu, ne ubambuluishe bua kujingululabu ne: Yehowa udi ukulomba bua kubapetesha bidibu bakengela. (1 Timote 5:8) Kunyima kua matuku, bana bavule batu bibidila. Tshidibi, udikoleshe bua kupitshisha dîba divule nabu bilondeshile mudi programe webe wa mudimu ukushila mpunga. Ditabalela dia dinanga dia mushindu’eu didi kabidi mua kuambuluisha bua kukepesha buenzeji bua dipangila mfranga didi dîku mua kuakama.​—Nsumuinu 15:16, 17.

11, 12. Mmikalu kayi idi baledi bajike ne bua kulama, ne mmunyi mudibu mua kuenza nunku?

¹¹ Mbia tshibidilu bua baledi bajike kuikala basuikakane ne bana babu mu mushindu wa pa buawu, kadi ntema idi ne bua kuteyibua bua se: mikalu miela kudi Nzambi pankatshi pa baledi ne bana kayikoseki. Tshilejilu, ntatu mikole  idi mua kujuka bikala mamu mujike utekemena ne: muanende wa balume ambula majitu a mfumu wa nzubu anyi wangata muanende wa bakaji bu mulunda wa kukuatshila malu, womekela muana eu wa bakaji bujitu bua malu a pa muoyo. Kuenza nunku ki nkuakanyine to, kudi ne lunsuya, ne pamu’apa kudi mua kukondakaja lungenyi lua muana.

¹² Ujadikile bana bebe ne: bu muudi muledi, neubakube​—ki mbuobu badi ne bua kukukuba to. (Fuanyikija ne 2 Kolinto 12:14.) Imue misangu, udi mua kukengela imue mibelu anyi dikuatshisha. Udikebe kudi bakulu bena nkristo anyi pamu’apa kudi bakaji bena nkristo bapie, ki nkudi bana bebe bakese to.​—Tito 2:3.

13. Ndutatu kayi pa bidi bitangila dibela ludi mamu mujike mua kuakama?

¹³ Muntu mulume udi mua kupeta lutatu lukese bua  kuangatshibua bu mufidi wa mibelu ya nsongo, kadi muntu mukaji udi mua kuikala ne lutatu lunene pa bualu ebu. Mukaji mujike umue udi wamba ne: “Bana banyi ba balume badi ne mubidi wa buntu bulume ne mêyi a buntu bulume. Imue misangu mbipepele bua kumueneka bu mupangila dipangadika ne muena butekete pa kudifuanyikija nabu.” Kabidi, utshidi mua kuikala unyingalala bua lufu lua muena dibaka nebe munangibue, peshi pamu’apa udi mua kuikala udiumvua mupiile anyi ne tshiji bua dikoseka dia dibaka. Binuikala bonso ne bukenji bua kudi mbulamatadi bua kukobelela bana, udi mua kutshina se: muanebe kalu kutamba kulamata muena dibaka nebe wa kale. Nsombelu ya mushindu’eu idi mua kuvuija difila dia mibelu mitshintshikila bu bualu bukole.

14. Mmunyi mudi baledi bajike mua kulama mmuenenu wa nkatshinkatshi pa dibela?

¹⁴ Bible udi wamba ne: “nsongalume mulengulula [mulekela kakuyi mikalu, NW] udi ufuisha mamuende bundu.” (Nsumuinu 29:15, MMM) Udi ne diambuluisha dia Yehowa Nzambi mu dienza mêyi-makaji ne diakolesha mu dîku, nunku kudilekeledi ku didipiisha, kanyinganyinga, peshi buôwa. (Nsumuinu 1:8) Kunyangi mêyi-maludiki a mu Bible nansha musangu umue. (Nsumuinu 13:24) Teta mua kuikala ne butshintshikidi, kuyi ushintuluka, ne muena dîsu dikole. Kunyima, bana bavule nebandamune ku madikolela ebe. Nansha nanku, newangate majinga a bana bebe ne mushinga. Tatu umue mujike udi wamba ne: “Dibela dianyi divua ne bua kuikala dituyisha bualu mamuabu uvua mujimine. Ndi yukila nabu padiku kupeteka mushindu. Tudi ne ‘bikondo bia dikuatshilangana malu a pa muoyo’ patudi tulamba biakudia bia dilolo. Dîba adi ke didibu bushuwa bankuatshila malu abu.”

15. Ntshinyi tshidi muledi mushipe dibaka ne bua kuepuka padiye wakula bua muena dibaka nende wa kale?

¹⁵ Biwikala mushipe dibaka, kakuena tshintu tshimpe tshiwapeta mu diupula lumu lua muena dibaka nebe wa kale. Ditandangana dia baledi ditu dibungamija bana ne ndekelu wa bionso nedikepeshe kanemu kabu kunudi nuenu bonso. Nunku, epuka kuamba mêyi adi atapa bu  aa: “Udi anu bu tatuebe!” Nansha bikala muena dibaka nebe wa kale mukuenzele bubi kayi, utshidi anu muledi wa muanebe, udi ukengela dinanga, ditabalela, ne dibela bia baledi bonso babidi. b

16. Mmalongolola kayi a mu nyuma adi ne bua kuikala tshitupa tshia dibela tshia pa tshibidilu mu dîku dia muledi umuepele?

¹⁶ Anu bu muvuabi biamba mu nshapita mishale, dibela didi dikonga dikela ne dishidimuna, ki ng’anu dinyoka to. Ntatu mivule idi mua kuepukibua ku diambuluisha dia programe muimpe wa dikela dia mu nyuma. (Filipoi 3:16) Dibuela dia pa tshibidilu mu bisangilu bia bena nkristo didi ne mushinga mukole. (Ebelu 10:24, 25) Mbia muomumue bua dilonga dia Bible dia mu dîku lumingu luonso. Bulelela, ki mbipepele bua kulombola dilonga edi pa tshibidilu to. “Kunyima kua dituku dijima dia mudimu, udi musue kudiolola bushuwa,” ke mudi mamu kampanda muena ditabalela wamba. “Kadi ndi ndidilongolola mu lungenyi bua kulonga ne muananyi wa bakaji, mujadike ne: mbualu budi ne bua kuenjibua. Muana eu bushuwa udi  upetela disanka ku dilonga dietu dia mu dîku!”

17. Ntshinyi tshitudi mua kulongela ku dishidimunyibua dilenga dia Timote, muinende wa Paulo?

¹⁷ Muinende wa mupostolo Paulo Timote uvua, kabiyi mpata, mupete dikela diende mu mêyi-maludiki a mu Bible kudi mamuende ne kakuende mukaji​—kadi kabiena bimueneka ne nkudi tatuende to. Pabi, mmuena nkristo wa kuanyina kayipu uvua Timote mulue! (Bienzedi 16:1, 2; 2 Timote 1:5; 3:14, 15) Udi pebe mua kutekemena bipeta biakane biwikala udikolesha bua kukolesha bana “mu mibelu ne manyoka pamue ne buludiki bua lungenyi bia Yehowa.”​—Efeso 6:4, NW.

18, 19. (a) Mmunyi mudi bunkaya mua kumueneka kudi muledi mujike? (b) Mmubelu kayi udi mufidibue bua kuambuluisha bua kukontolola majinga a ku mubidi?

¹⁸ Muledi mujike umue wakasambana ne: “Pandi mpingana ku nzubu ne mmona bimanu binayi ebi ne nangananga kunyima kua bana bamane kulala, bunkaya budi bushuwa bumvuila.” Eyowa, bunkaya butu misangu mivule lutatu lutambe bunene lutu muledi mujike wakama. Bitu bia ku tshifukilu bua kujinga bikole bu-nyana bua musangelu ne disuangana dia mu dibaka. Kadi muntu udi ne bua kuteta kujikija lutatu elu mu mishindu yonso anyi? Mu matuku a mupostolo Paulo, bamue bakamba batshivua bansongakaji bakalekela “majinga abu a diangatangana  alua pankatshi pabu ne Kristo.” (1 Timote 5:11, 12, NW) Kulekelela majinga a ku mubidi abuitshidija bipatshila bia mu nyuma nekuikala mua kupatula bipeta bibi.​—1 Timote 5:6.

¹⁹ Mulume muena nkristo kampanda wakamba ne: “Majinga a diangatangana adi makole menemene, kadi udi mua kuakontolola. Padi lungenyi lukuvuila mu tshieledi tshia lungenyi, kuena ne bua kuimanyinapu. Udi ne tshia kulutukuna. Bidi kabidi biambuluisha bua kuela meji bua muanebe.” Dîyi dia Nzambi didi dibela ne: “Nufuishe bitupa bia mubidi wenu pa bidi bitangila lukuka lua masandi.” (Kolosai 3:5, NW) Biwikala udikolesha bua kufuisha lukuka lua biakudia, neubale bibejibeji bidi ne foto ya biakudia bisheme, peshi neutantshile bantu badi dîba dionso bakula bua biakudia anyi? Nansha kakese! Mbia muomumue pa bidi bitangila majinga a ku mubidi.

20. (a) Nnjiwu kayi idi mialamine aba badi batantshila bantu bakena bena kuitabuja? (b) Mmunyi mudi bajike mu siekele wa kumpala ne lelu’eu baluangana ne bunkaya?

²⁰ Bamue bena nkristo bakaditua mu ditantshilangana ne bantu bakena bena kuitabuja. (1 Kolinto 7:39) Dienza nunku diakajikija lutatu luabu anyi? Tòo. Mukaji muena nkristo uvua mushipe dibaka udi udimuija ne: “Kudi tshintu kampanda tshibi kupita kuikala mujike. Nkusedibua kudi muntu ukena mukumbanyine!” Kabiyi mpata, bakamba bena nkristo ba mu siekele wa kumpala bavua bapetangana ne bikondo bia bunkaya, kadi bavua ne meji bavua ne bivule bia kuenza ‘pa kuakidila benyi, kuowesha bansantu mâyi ku makasa, ne kuambuluisha aba bavua mu dikenga.’ (1 Timote 5:10, NW) Bia muomumue bena nkristo ba lulamatu lelu’eu bavua bindile bidimu bivule bua kupeta muena dibaka mutshinyi wa Nzambi bavua bikale ne bivule bia kuenza. Muena nkristo mukamba wa bidimu 68 wakatuadija kukumbula bakamba bakuabu dîba dionso divuaye udiumvua ne bunkaya. Wakamba ne: “Ndi mumona ne: pa kuenza makumbula aa, kukumbaja midimu ya ku nzubu ne kutabalela makanda anyi a mu nyuma, tshiena ne dîba dia kusomba nkayanyi.” Kulongesha bakuabu pa bidi bitangila Bukalenge bua Nzambi mmudimu  muimpe wa dikuatshisha dia pa buadi.​—Matayo 28:19, 20.

21. Mmu mushindu kayi udi disambila ne ditantshilangana dimpe mua kuambuluisha bua kutshimuna bunkaya?

²¹ Mu mushindu muanyishibue, kakuena diondapibua dia tshishima ku bunkaya. Kadi budi mua kutantamenyibua ku dikuatshisha dia bukole bufume kudi Yehowa. Bukole ebu budi bulua padi muena nkristo “unanukila mu kusengelela ne mu kulomba . . . butuku ne munya.” (1 Timote 5:5) Milombo mmisengelelu ya muoyo mujima, eyowa, nditendekena bua diambuluisha, pamu’apa ne mbila mikole  ne binsonji. (Fuanyikija ne Ebelu 5:7.) Dipongoluela Yehowa mutshima webe “butuku ne munya” didi bushuwa mua kuambuluisha. Kabidi, ditantshilangana dilenga didi mua kuambuluisha bua kuuja muaba mushale mutupu udi ukebesha bunkaya. Ku diambuluisha dia ditantshilangana dilenga, muntu kampanda udi mua kupeta “diyi dimpe” dia dikankamija bu edi didi ditela mu Nsumuinu 12:25 (MMM).

22. Nngenyi kayi yambuluisha padi bunkaya butundubuka bimue bikondo?

²² Bikala bunkaya butundubuka imue misangu​—bu muikalabi pamu’apa mua kuenzeka—​uvuluke ne: muntu nansha umue kêna ne nsombelu mupange ntatu. Bushuwa, “nsangilu mujima wa bana benu” udi ukenga mu mushindu umue anyi mukuabu. (1 Petelo 5:9, NW) Epuka kuimanyina pa malu a kale. (Muambi 7:10) Utangile ku malu malengele audi mupete. Kupita bionso, ikala mupangadije bua kulama muoyo webe mutoke ne kusankisha mutshima wa Yehowa.​—Nsumuinu 27:11.

23. Mbujitu kayi budi bena nkristo nabu kudi baledi bajike bena mu tshisumbu nabu?

²³ Dikuatshisha ne diambuluisha bia bena nkristo nebe kabiena kutua mushinga. Yakobo 1:27 (NW) udi wamba ne: “Ntendelelu udi mukezuke ne kayi katoba ku mêsu kua Nzambi ne Tatu, ng’eu: kuambuluisha bana ba nshiya ne bakaji bakamba mu makenga abo.” Eyowa, bena nkristo mbenzejibue bua kuambuluisha mêku a muledi umuepele. Ngimue mishindu kayi mikuatshishi idi diambuluisha dine edi mua kufidibua?

24. Mmu mishindu kayi idi mêku a baledi bajike mua kuambuluishibua?

²⁴ Bintu bia ku mubidi bidi mua kufidibua. Bible udi wamba ne: ‘Bikala muntu ne bintu bia pa buloba, ne yeye udi utangila muan’abo ubikengela, ne yeye udi ukanda luse luende kudiye, munyi mudi mua kuikala dinanga dia Nzambi munda muende?’ (1 Yone 3:17) Muaku wa tshiena-Greke mukudimuna ne: “utangila” udi umvuija, ki ng’anu  ditapa dîsu mu mpukapuka, kadi ndituishila mêsu ku budisuile. Ebi bidi bileja ne: muena nkristo muena bulenga udi mua kuibidilangana diambedi ne nsombelu wa mu dîku kampanda ne makengela adi. Pamu’apa badi bakengela mfranga. Bamue badi mua kukengela diambuluisha bua kuakaja nzubu. Peshi badi mua kuanyisha dibikidibua patupu bua kudia biakudia anyi didisanga bua kujikija lutetuku.

25. Mmunyi mudi bena nkristo mua kuleja luse kudi baledi bajike?

²⁵ Kusakidila apu, 1 Petelo 3:8 udi wamba ne: ‘Nuikale buonso buenu ne mutshima umue, nusambangana, nunangangana ne bana benu ba mu Kristo, nuikale ne mitshima ya luse.’ Muledi mujike umue muena bana basambombo wakamba ne: “Bitu binkolela ne imue misangu ntu muzengele. Kadi, diakamue dîba adi umue wa ku bana betu ba balume anyi ba bakaji udi ungambila ne: ‘Joan, udi wenza mudimu muimpe. Tshiwapeta ku mudimu eu netshikale tshia mushinga.’ Kumanya patupu ne: bakuabu badi bela meji buebe ne badi baditatshisha buebe kudi kuambuluisha.” Bakaji bakulumpe bena nkristo badi mua kuikala ne dikuatshisha dia pa buadi pa kuambuluisha bakaji bapuekele badi baledi bajike, pa kubateleja padibu ne malu adi mua kuikala kaayi mimpe bua kuyukidilangenapu ne muntu mulume.

26. Mmunyi mudi balume bena nkristo bapie mua kuambuluisha bana bakena batatuabu?

²⁶ Bantu balume bena nkristo badi mua kuambuluisha mu mishindu mikuabu. Muntu muakane Yobo wakamba ne: ‘Ngakusungila . . . muana wa nshiya ne mukuabu yonso uvua kayi ne dikuatshisha.’ (Yobo 29:12) Bia muomumue bamue balume bena nkristo lelu’eu badi baleja ditabalela diakane bua bana bakena ne batatuabu ne baleja “dinanga dia mu mutshima mutoke” dilelela, kabayi ne bipatshila bikuabu. (1 Timote 1:5) Kabayi balengulula abu mêku mine, badi imue misangu mua kulongolola bua kuenza mudimu wa buambi pamue ne bana ba mushind’eu ne badi kabidi mua kubabikila bua kubuelabu mu dilonga  dia mu dîku peshi mu didiolola pamue. Bulenga bua mushindu’eu budi mua kukuba bimpe menemene muana ukena tatuende ku njila wa buntomboji.

27. Baledi bajike badi mua kuikala bajadike bua kupeta dikuatshisha kayi?

²⁷ Bushuwa, ndekelu wa bionso, baledi bajike badi ne bua ‘kudiambuila bujitu buabu’ bua mudimu wabu. (Galatia 6:5) Nansha nanku, badi mua kulejibua dinanga kudi bana babu ba balume ne ba bakaji bena nkristo ne dia kudi Yehowa Nzambi yeye muine. Bible udi wamba bua bualu buende ne: ‘Udi ukuatshisha bana ba nshiya ne bakaji ba mu lufuila.’ (Musambu 146:9) Ne dikuatshisha Diende dia dinanga, mêku a muledi umuepele adi mua kulubuluka!