1, 2. Шәйтʹан ча дьхԝәст бь ԛәзийа у нәхԝәшийе амьнийа Ибо бьшкенә?

 ИБО дькарьн һʹәсаб кьн ча мәрьвәки хԝәйе малбәта бәхтәԝар. Кʹьтеба Пирозда дәрһәԛа ԝи ӧса те готьне «жь һʹәмуйа лаԝед Рʹожһьлате, әԝ зьлам, йе һәри мәзьн бу». Дәһә зарʹед Ибо һәбун, һʹәфт кӧрʹ у се ԛиз. Хенщи ве йәке, әԝ епʹещә дәԝләти бу, у дькарьбу малбәта хԝә ча лазьм ә хԝәй кьра. Йа лапә фәрз әԝ бу, кӧ Ибо борщдари һьлдьда сәр хԝә, ԝәки али зарʹед хԝә бькә, сәва әԝана бәр чʹәʹве Йаһоԝа тʹәмьз бьминьн. Бь сайа ԝе йәке малбәта ԝи ԛәԝи у бәхтәԝар бу (Ибо 1:1-5).

² Жийина Ибойә хԝәш, бәр чʹәʹве Шәйтʹан, йе кӧ дьжмьне Йаһоԝа Хԝәде йә, вәшарти нибу. Әԝ дьжмьне кӧ тʹьме мәщала дьгәрʹә, ԝәки амьнийа хьзмәткʹаре Хԝәде бьшкенә, һʹӧщӧми сәр Ибо кьр у малбәта Ибойә бәхтәԝар кʹӧта кьр. Паше жи әԝ дәрбази сәр Ибо бу, «жь пәʹнийа льнган, һʹәта сәре ԝи бь ԛӧнеред хьрабва ль Ибо хьст». Шәйтʹан дьхԝәст бь ԝан ԛәзийа у нәхԝәшийе амьнийа Ибо бьшкенә (Ибо 2:6, 7).

3. Нәхԝәшийа Ибо чь щурʹәйи бу?

³ Кʹьтеба Пирозда наве нәхԝәшийа Ибо найе готьне, ле те гьликьрьне әԝ нәхԝәши чь щурʹәйи бу. Демәк тʹәмамийа бәдәна Ибо кӧрм кʹәтьбуне, чʹәрме ԝи ԛалчʹьк дьда у дьпʹьзьри. Жь һьлма дәве ԝи  мәрьв ащьз дьбу, у бина гәни жь ԝи дьһат. Ибо гәләк дьчәрчьри у дьналийа (Ибо 7:5; 19:17; 30:17, 30). Ви щәфе гьранда әԝ нава халийеда рʹуньштьбу, кӧдӧрәки жь щерʹ һьлдабу у хԝә дьхӧранд (Ибо 2:8). Һʹале Ибо зӧлма гьран бу!

4. Чь чәтьнайи щара малбәтада пешда тен?

⁴ Ԝәйе хԝә ча тʹәхмин кьра, һәрге бькʹәтана дәрәщәкә ӧса чәтьн? Ньһа Шәйтʹан хьзмәткʹаред Хԝәде бь нәхԝәшийа начәрчьринә, чаԝа сәре Ибо кьр. Ле гәләк мәʹнийед дьн жи һәнә, жь бо чь мәрьв дькарә нәхԝәш кʹәвә. Мәсәлә, ԛьсуртийа мәрьва, стресед рʹожа иройин у жийина хьраб. Ләма жи әм гәрәке һазьр бьн, чьмки кәсәк жь нәфәре мә жи дькарә нәхԝәш кʹәвә. Рʹаст ә әм мьԛати сьһʹәт-ԛәԝата хԝә дьбьн, ле йәкә диса нәхԝәш дькʹәвьн. Һьнәк гьран нәхԝәш дькʹәвьн у мина Ибо дьчәрчьрьн. Чахе малда кәсәк нәхԝәш дькʹәвә чәтьнайед мәзьн дькарьн пешда бен. Ԝәрә ньһа әм бьньһерʹьн, Хәбәра Хԝәде ча аликʹарийе дьдә, ԝәки пешийа нәхԝәшийе бьгьрьн, кʹижан кӧ бәреда дьжмьне инсанәте йә (Ԝаиз 9:11; 2 Тимотʹейо 3:16).

5. Чахе малбәтеда кәсәк ԝәʹдәки кьн нәхԝәш дькʹәвә, нәфәре мале гәрәке чь бькьн?

⁵ Чахе мәрьв һини жийина хԝә дьбә у ньшкәва әʹмьре ԝи те гӧһастьне, ԝирʹа чәтьн дьбә. Илаһи һьнге чәтьн ә, чахе мәʹнийа гӧһастьне әв ә, кӧ нәфәрәки мале, нәхԝәше гьран ә у нәхԝәши дьреж дькʹшинә. Һәрге нәхԝәши дьреж накʹшинә жи, йәкә лазьм ә малбәтеда гӧһастьна бькьн. Гәрәке һьнә тьшт жь хԝә кем кьн у бона йе нәхԝәш чь лазьм ә, гәрәке бькьн. Дьбәкә нәфәред малерʹа лазьм бе дәнге хԝә  нәкьн, сәва йе нәхԝәш ащьз нәбә. Дьбәк әԝана ӧса жи мәщбур бьн һьнә шьхӧле хԝә бьһельн. Һьнә малбәтада зарʹ бона хушк-бьред хԝә, йан де-бавед хԝәйә нәхԝәш бәрхԝә дькʹәвьн. Дьбәк лазьм бә зарʹарʹа бежьн, ԝәки әԝана һе зедә дина хԝә бьдьнә йед нәхԝәш (Колоси 3:12). Һәрге нәхԝәши ԝәʹдәлу йә жи, ԝи чахи жи нәфәред мале гәрәке һазьр бьн, сәва али йе нәхԝәш бькьн чьда кӧ әԝ һʹәԝщә йә. У малбәтеда һәр кәс гәрәке баԝәр бә, ԝәки һәрге әԝ нәхԝәш кʹәвә, ӧса жи ԝе али ԝи бькьн (Мәтта 7:12).

6. Нәфәред малбәте дькарьн бькʹәвьнә чь һʹали, чахе кәсәк жь мәрьве ԝан нәхԝәш дькʹәвә бь нәхԝәшийа гьран у дьреж?

⁶ Ле ча бькьн һәрге нәхԝәши гьран ә у дьреж дькʹьшинә, у лазьм ә малбәтеда гӧһастьна бькьн? Мәсәлә һәрге малда кәсәк инвалит (ньвишкан) буйә, нәхԝәшийа ԝи Алтсгеймера йә, йан нәхԝәшикә дьн? Йан жи һәрге нәхԝәшийа кәсәки пьсихики йә чаԝа шизофрәни? Һьнге мәрьв дәстпедькә бәрхԝә кʹәвә, сәва мәрьвед хԝәйә нәхԝәш, чьмки дьвинә ча әԝ дьчәрчьрә. Ле щарна, әԝана дьлтәнг дьбьн, чьмки нәхԝәшийа мәрьвед незик, әʹмьре ԝан дьгӧһезә у азайа ԝан кем дькә. Жь ԝан кәсәк дьбәкә бинтәнг бә у бежә: «Чьрʹа әв йәк һәма һатә сәре мьн?»

7. Жьна Ибо ча хԝә да кʹьфше чахе мере ԝе нәхԝәш бу, у әԝе дәрһәԛа чь бир кьрьбу?

 ⁷ Дьбәкә фькьред ӧса һатьбун һʹьше жьна Ибо жи. Биньнә бира хԝә, әԝе пешийа нәхԝәшийа мере хԝә чьԛас дәрʹде гьран дит. Һʹәму зарʹед ԝе һәврʹа мьрьн, паше жи ԛәзийа пәй һәврʹа дьһатьн. Әв һʹәму тьшт бунә сәбәб, кӧ әԝе хԝә ӧнда кьрьбу. У ахьрийеда мере ԝейи сәрхԝә у хәбатчи, бәр чʹәʹве ԝе ԛьдум кʹәтьбу у жь нәхԝәшийа гьран дьналийа. Жьна Ибо тьштәки лапи фәрз бир кьрьбу. Әԝ һәбу һәләԛәтийа ԝе у мере ԝе тʹәви Йаһоԝа. Кʹьтеба Пироз дьбежә: «У жьна ԝи готә ԝи: ‹Тӧ һәла һе хԝә беԛӧсуртийа хԝәва дьгьри! Ньфьрʹа Хԝәде бькә у бьмьрә›» (Ибо 2:9, ДТʹ).

8. Чахе малбәтеда кәсәк бь нәхԝәшийа гьран нәхԝәш дькʹәвә, кʹижан рʹез дькарә али нәфәра бькә, ԝәки рʹаст бьньһерʹьн сәр ве дәрәща тʹәзә?

⁸ Гәләк щар мәрьв дьлтәнг дьбьн у һерс дькʹәвьн, жь бо фькьред ӧса, мәсәлә, чьма бона нәхԝәшийа мәрьвәки, лазьмә жийина хԝә бь тʹәмами бьгӧһезьн. Ле һәрге Мәсиһи бькʹәвә дәрәщәкә ӧса, әԝ гәрәке фәʹм бькә, ԝәки әв йәк бона ԝи мәщал ә кӧ, һʹьзкьрьна хԝәйә һʹәлал бьдә кʹьфше. Һʹьзкьрьна рʹаст «сәбьр дькә, һʹьзкьрьн дьлованийе дькә . . . фәйда [кʹара] хԝә нагәрʹә . . . жь һәр тьшти баԝәр дькә, һевийа ԝе жь һәр тьшти һәйә, ль һәр тьшти сәбьр дькә» (1 Корьнтʹи 13:4-7, ИМ). Изьн нәдьн ԝәки фькьред хьраб сәр ԝә һʹӧкӧм кьн, ле ӧса бькьн ԝәки һун ԝан фькьра контрол кьн (Мәтʹәлок 3:21).

9. Кʹижан гьли дькарьн али малбәте бькьн, ԝәки әԝана рʹӧһʹанида сьст нәбьн у дьлтәнг нәбьн?

⁹ Чахе малда кәсәк нәхԝәше гьран ә, чь гәрәке бькьн, ԝәки һәләԛәтийа малбәте тʹәви Хԝәде сьст нәбә у малбәт дьлтәнг нәбә? Бона һәр нәхԝәшийе,  хәмкьрьн у ԛәнщкьрьна башԛә лазьм ә. Ләма жи ԝе нәрʹаст бә һәрге ве кʹьтебеда ширәта бьдьн, дәрһәԛа ԝе йәке ча мьԛати йед нәхԝәш бьн у бь чь методи ԝана ԛәнщ кьн. Йаһоԝа рʹӧһʹанида «йе тәԝийайи дьдә сәкьнандьне» (Зәбур 145:14). Даԝьд Пʹадша ньвисийә: «Хԝәзи ль ԝи кӧ хәм дькә бона йе кʹәсиб, рʹожед тәнгасийеда Хӧдане ԝи хьлаз кә. Хӧдане ԝи хԝәй кә у әʹмьр бьде. . . . Хӧдане нәхԝәшийеда щи-ньвина ԝи бе рʹәʹме» (Зәбур 41:1-3). Йаһоԝа хьзмәткʹаред хԝә рʹӧһʹанида хԝәй дькә, илаһи ԝи чахе гава әԝана дьлтәнг дьбьн у бәрхԝә дькʹәвьн (2 Корьнтʹи 4:7). Гәләк мәрьв, малед кʹижанада нәхԝәше гьран һәнә, ԛайил ьн тʹәви гьлийед зәбурбеж: «Хӧдан мьн гәләк тәнгаси кʹьшандьн, ԝәкә хәбәра Хԝә рʹӧһʹ бьдә бәр мьн» (Зәбур 119:107).

10, 11. а) Чахе малда нәхԝәше гьран һәйә, чь фәрз ә бькьн? б) Кʹӧлфәтәкә Мәсиһи ча тәйах кьр, чахе малхе ԝе нәхԝәше гьран бу?

¹⁰ Мәтʹәлокәкә жь Кʹьтеба Пироз дьбежә: «Рʹӧһʹе мерьв ль нәхԝәшийа сәбьр дькә, ле рʹӧһʹе бьриндар кʹи дькарә тәйах кә?» (Мәтʹәлок 18:14). Чахе малда кәсәк дькʹәвә стресе, әв йәк сәр тʹәмамийа нәфәре мале жи һʹӧкӧм дьбә. Демәк «дьле рʹьһʹәт жийина бәдәне йә» (Мәтʹәлок 14:30). Чахе малда нәфәрәк нәхԝәш ә, малбәт дькарә әԝе чәтьнайе һеса дәрбаз кә, һәрге һәр кʹәс алийе хԝәда һазьр ә тьштәки бькә. (Бәрамбәр кьн Мәтʹәлок 17:22.)

¹¹ Кʹӧлфәтәкә Мәсиһи рʹасти чәтьнайед гьран һат, чахе шәш сал паши меркьрьна ԝе, параличе мере ԝе хьст. Әԝ хушк тинә бира хԝә: «Жь бо ве йәке зьмане малхе мьн гьран бу, у хәбәрдана ԝи нәдьһатә фәʹмкьрьне, гәләк ԛәԝат у сәбьр лазьм бу, ԝәки фәʹм  кьн, әԝ чь дьхԝазә бежә». Ле һәла бьдьн бәр чʹәʹве хԝә, мере ԝе хԝәха чьԛас чәрчьри у чь һʹалида бу. Гәло ԝана чь дькьр, сәва тәйах кьн? Рʹаст ә әԝана гәләк дур дьжитьн жь ода щьвате, ле әԝе хушке һʹәму тьшт дькьр, ԝәки тʹәви мере хԝә рʹӧһʹанида ԛәԝи бьминьн. Әԝе ӧса дькьр, ԝәки һаш тʹәшкиләта Хԝәде һәбә у бәрдәԝам дькьр, хԝарьна рʹӧһʹани дьстинә жь «Бьрʹща Ԛәрәԝьлийе» у «Һʹьшйар бьн!» Әԝан һʹәму тьшта ԛәԝат дьда ԝе, ләма әԝе карьбу малхе хԝәйи һʹьзкьри чар сала хԝәй кә, һʹәта мьрьна ԝи.

12. Чаԝа жь мәсәла Ибо те кʹьфше, мәрьвед нәхԝәш чьда дькарьн али нәфәред мала хԝә бькьн?

¹² Рʹаст ә Ибо нәхԝәше гьран бу, ле йәкә әԝ ԛәԝи ма. Әԝи жьна хԝә пьрси: «Ма әм ԛәнщийа Хԝәде ԛәбул бькьн у хьрабийе ԛәбул нәкьн?» (Ибо 2:10). Әʹщебмайи нәминьн жь готьнед Аԛуб дәрһәԛа Ибо, ԝәки сәбьркьрьн у тәйахкьрьна Ибо, мәсәләкә гәләк баш ә бона мә! Аԛуб 5:11-да ньвисар ә: «Ԝә бона сәбьра Ибо бьһистийә у ԝә дит, Хӧдан ахьрийа ԝи чаԝа хер кьр. Хӧдан чьԛаси исаф у рʹәʹм ә!» Ӧса жи иро, чахе йед нәхԝәш бәр еша хԝә тәйах дькә, бь ве йәке али нәфәред мала хԝә дькә, ԝәки ньһерʹандьна баш хԝәй кьн.

13. Чахе мала мәда нәхԝәше гьран һәйә, әм чь гәрәке нәкьн?

¹³ Әԝ мәрьв мала кʹеда нәхԝәше гьран һәбуйә, дьбежьн ԝәки серида ԝанарʹа чәтьн бу. Әԝана ӧса жи дьбежьн ԝәки гәләк тьшт гьредайи йә ԝе йәкева, кӧ ча әм дьньһерʹьн сәр ԝе дәрәще. Серида дьбәкә чәтьн бә әʹмьре малбәте бьгӧһезьн, йан жи ӧса бькьн кӧ һʹал пʹак бә. Ле һәрге мәрьв ԛәԝате хәрщ кә, ԝе бькарьбә һини дәрәща тʹәзә бә. Һьн жи фәрз ә дәрәща хԝә бәрамбәри дәрәща ԝан мәрьва нәкьн,  малед кʹижанада нәхԝәш тʹӧнәнә, ӧса жи нәфькьрьн, кӧ әʹмьре ԝан мәрьва дьһа һеса йә, у ԝәки «әԝа нәрʹасти йә!» Бь рʹастийе тʹӧ кәс ньзанә, чь бар сәр мьле мәрьвед дьнә. Һәр Мәсиһи бәрдьлийе дьстиньн жь гьлийед Иса: «Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә» (Мәтта 11:28).

14. Бәре әʹԝльн чь гәрәке бькьн чахе малда кәсәк нәхԝәше гьран ә?

¹⁴ Һәрге малбәтеда кәсәк нәхԝәшийа гьран кʹәтийә ԝе баш бә биньн бира хԝә әван гьлийед жь бина бәр Хԝәде: «Мәрәм у тʹьвдир . . . бь сайа гәләк ширәткʹара әԝ тенә сери» (Мәтʹәлок 15:22). Ԝе чьԛас баш бә, һәрге малбәт тʹоп бә у тʹәвайи шеԝьр кьн дәрһәԛа ԝан пьрса, кʹижан жь бо нәхԝәшийе пешда һатьнә. У әԝ шеԝьркьрьн ԝе керһати бә, һәрге бь дӧа у пе рʹебәрийа Хәбәра Хԝәде бе кьрьне (Зәбур 25:4). Дәрһәԛа чь малбәтеда дькарьн хәбәр дьн? Лазьм ә дәрһәԛа ԛәнщкьрьне, хәрща у гӧһастьнед әʹмьре малбәте сафикьрьна бькьн. Мәсәлә, кʹе ԝе бәр йе нәхԝәш һәрʹә-бе? Йед майин чь аликʹарийе дькарьн бьдьн? Әԝ сафикьрьнед тʹәзә ԝе ча һʹӧкӧм бьн сәр һәр нәфәрәки мале? Ча аликʹарийе бьдьнә ԝан, кʹе бәр йед нәхԝәш дьчә-те, бона рʹӧһʹанийа ԝи у һʹәԝщед ԝийә дьн?

15. Ча Йаһоԝа али ԝан малбәта дькә, кʹижанада нәхԝәше гьран һәйә?

¹⁵ Һәрге әм Йаһоԝарʹа дӧа бькьн сәва рʹебәрийа мә бькә, бьфькьрьн сәр Хәбәра ԝи у бь мерхаси ԝе рʹеда һәрʹьн, кʹижан Кʹьтеба Пироз нишани мә дькә, әме гәләк щар кʹәрәмед ӧса бьстиньн кӧ әм ԛә һивийе жи нибун. Рʹаст ә щара нәхԝәши ԛәнщ набә, ле чахе әм диса жи баԝәрийа хԝә Йаһоԝа тиньн, әԝ йәк ԝе  бона мә кʹар бә (Зәбур 55:22). Зәбурбеж ньвисийә: «Һʹӧба Тәйә амьн Хӧдан, әз ԛәдим кьрьм. Дәма дәрд-кӧл дьле мьнда зедә дьбьн, барьстанийед Тә нәфса мьн ша дькьн». (Зәбур 94:18, 19; ӧса жи бьньһерʹә Зәбур 63:6-8.)

16, 17. Гава де-бав зарʹед хԝәрʹа шьровәдькьн дәрһәԛа йед нәхԝәш, әԝана гәрәке дина хԝә бьдьнә сәр чь?

¹⁶ Чахе кәсәк жь нәфәред мале нәхԝәшийа гьран дькʹәвә, зарʹед ԝе мале дькарьн рʹасти чәтьнайа бен. Фәрз ә, де-бав али зарʹа бькьн, ԝәки әԝана һʹале малбәте фәʹм кьн у бьзаньбьн ча дькарьн аликʹарийе бьдьн. Чахе малда йәк жь зарʹа нәхԝәш дькʹәвә, зарʹед дьн бьдьнә баԝәркьрьне, ԝәки һун нә кӧ тʹәне бона йед нәхԝәш хәм дькьн, ле бона ԝан жи. Гәрәке дина де-бава сәр зарʹа бә, ԝәки әԝана һәврʹа нәкʹәвьнә һʹӧщәте у һәв нәдьнә хәйидандьне. Илаһи ԝәʹде чәтьнайа, де-бав дькарьн али зарʹед хԝә бькьн, ԝәки әԝана һәврʹа гәләк незик бьн у һәв һʹьз бькьн.

¹⁷ Чахе де-бав зарʹарʹа бь зьмане һеса, нә кӧ бь зьмане дохторийе шьровәдькьн, ԝи чахи зарʹарʹа ԝе һеса бә һʹале йед нәхԝәш фәʹм бькьн. Демәк ԝанарʹа әʹйан кьн, кӧ йе нәхԝәш чь сәр хԝә тʹәхмин дькә. У чахе әԝана бьвиньн, ԝәки хушк йан бьре ԝани нәхԝәш нькарә гәләк тьшт бькә, ле әԝана дькарьн, ԝи чахи әԝана ԝе һе зедә һазьр бьн йед нәхԝәш «һʹьз бькьн» у «рʹәʹм» бьн һьндава ԝан (1 Пәтрус 3:8).

18. Ча дькарьн али зарʹед мәзьн бькьн, ԝәки әԝана фәʹм кьн чь чәтьнайи малбәтеда пешда һатьнә, жь бо нәхԝәшийе у әԝ фәʹмкьрьн чь кʹаре дькарә ԝанарʹа бинә?

¹⁸ Зарʹед мәзьнрʹа гәрәке шьровәкьн, ԝәки һʹале малбәте чәтьн буйә у лазьм ә, ԝәки һәр кәс һазьр бә тьштәки жь хԝә кем кә. Дьбәкә жь бо хәрще дәрмана  у ԛәнщкьрьна йе нәхԝәш, де-бав нькарьбьн зарʹарʹа һаԛас тьшта бькʹьрʹьн, чьԛас әԝана бьхԝазьн. Ле гәло әԝана ԝе сәва ԝе йәке бьхәйидьн у бәрхԝә кʹәвьн? Йан ԝе һʹале малбәте фәʹм кьн, у һазьр бьн жь хԝә кем кьн? Гәләк тьшт гьредайи йә ԝе йәкева, кӧ әԝ пьрс ча те шеԝьркьрьне у ньһерʹандьна нәфәре малбәте чь щурʹәйи йә. Бь рʹастийе гәләк малбәтада нәхԝәшийа нәфәрәки али зарʹа кьрийә кӧ ӧса бькьн, чаԝа Паԝлос ширәте дьдә: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә. Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Филипи 2:3, 4).

19, 20. а) Чахе малда нәфәрәк нәхԝәш дькʹәвә, малхе мале чь борщдарийе һьлдьдә сәр хԝә? б) Рʹаст ә Кʹьтеба Пироз кʹьтеба дохторийе нинә, ле әԝ чь рʹебәрийе дьдә дәрһәԛа пьрсед ԛәнщкьрьне?

¹⁹ Мәсиһи нарʹәвьн жь ԝан щурʹе ԛәнщкьрьна, кʹижан мьԛабьли ԛанунед Хԝәде ниньн. Чахе малда кәсәк нәхԝәш дькʹәвә, нәфәре мале дьхԝазьн тьштәки бькьн, ԝәки еша ԝи кем бә. Ле щара готьна һʹәкима һәв нагьрә, ләма жи лазьм ә фәсал бьн. Хенщи ԝе йәке ван салед пашԝәхтийеда ньшкева нәхԝәшийед тʹәзә у чәтьнайед сьһʹәт-ԛәԝатева гьредайи пешда тен. У бона гәләк жь ԝан нәхԝәшийа һе метʹодед ԛәнщкьрьне нәдитьнә. Ле щара жи чәтьн ә тедәрхьн әԝ чь нәхԝәши йә. Ԝан дәрәщада Мәсиһи чь гәрәке бькә?

²⁰ Рʹаст ә ньвискʹарәки Кʹьтеба Пироз дохтор буйә, у Паԝлос дәрһәԛа тьштед дохторийе ширәтед керһати дайә һәвале хԝә Тимотʹейо, ле Кʹьтеба Пироз нә кʹьтеба дохторийе йә. Әԝ кʹьтеб рʹебәрийе дьдә бона әʹмьре бь намуси у рʹӧһʹани (Колоси 4:14; 1 Тимотʹейо  5:23). Ләма жи малхе мале гәрәке хԝәха сафикьрьнед билани бькә, бона метʹодед ԛәнщкьрьне. Дьԛәԝьмә әԝ сафи кә ньһерʹандьна чәнд һʹәкима пебьһʹәсә. (Бәрамбәр кьн Мәтʹәлок 18:17.) Фәʹмдари йә, малхе мале дьхԝазә аликʹарийа баш бьдә нәфәре хԝәйә нәхԝәш, ләма жи әԝ аликʹарийа һʹәкимед баш у щерʹьбанди дьгәрʹә. Һьнә мәрьв щурʹед ԛәнщкьрьнед нәбәлабуйи дьжберьн. Әԝ сафикьрьн жи сәр хԝәстьна малбәте йә. Ле чахе Мәсиһи пьрсед дәрһәԛа сьһʹәт-ԛәԝате сафи дькьн, Хәбәра Хԝәде ԝи чахи жи бәрдәԝам дькә бьбә «чʹьра гавед» ԝан у «рʹонайа шьвәрʹийед» ԝан (Зәбур 119:105). Әԝана бәрдәԝам дькьн пәй рʹебәрийа Кʹьтеба Пироз дьчьн (Ишайа 55:8, 9). Ләма жи әԝана хԝә дур дьгьрьн жь ԝан щурʹед ԛәнщкьрьне, кʹижан гьредайи нә  сербазийева у мьԛабьли принсипед Йаһоԝа нә (Зәбур 36:9; Кʹаред Шандийа 15:28, 29; Әʹйанти 21:8).

21, 22. Кʹӧлфәтәкә жь Асийайе ча фькьри сәр принсипа жь Кʹьтеба Пʹироз у чьрʹа сафикьрьна ԝе рʹаст бу дәрәща ԝеда?

²¹ Ԝәрә бьньһерʹьн сәрһатийа кʹӧлфәтәкә жь Асийайе. Әԝ кʹӧлфәт тʹәви Шәʹдед Йаһоԝа һинбуна Кʹьтеба Пироз дәстпедькә, у паши һьнә ԝәʹдә, жерʹа ԛизәк бу жь ԝәʹде хԝә зутьр, кʹаша кʹижане 1 470 гьрам бу. Кӧләкә чьԛас гьран кʹәтә дьле ԝе кʹӧлфәте чахе жь һʹәкима пеһʹәсийа, ԝәки зарʹ ԝе рʹаст мәзьн нәбә у тʹӧ щар рʹе нәчә. Һʹәкима ширәт да ԝе, ԝәки зарʹе тʹәсмили щийе зарʹед бехԝәйи бькә. Ле малхе ԝе ньзаньбу чь бькә. Әԝе кʹӧлфәте дькарьбу жь кʹе аликʹари бьхԝәста?

²² Әԝ гьли дькә: «Һатә бира мьн, ԝәки Кʹьтеба Пирозда ньвисар ә: ‹Әԝләд пʹешкʹешед Хӧдан ьн, бәре зька дайина Ԝи йә›» (Зәбур 127:3). Әԝе сафи кьр, ве «пʹешкʹеше» бьвә мал, мьԛати ԝе бә у хԝәй кә. Серида гәләк чәтьн бу ԝе дайка щаһьлрʹа. Ле һәвалед ԝейә Шәʹде Йаһоԝа аликʹари дьданә ԝе, ләма жи әԝе карьбу бь щурʹәки мәхсус әԝе зарʹе хԝәй кә. Паши 12 сала әԝ ԛизьк ида дьчу сәр щьвата у бь шабуне һәвалти дькьр тʹәви зарʹед ԝәкә хԝә. Әԝ де дьбежә: «Әз чьԛас рʹази мә, ԝәки принсипед жь Кʹьтеба Пироз али мьн кьрьн сафикьрьна рʹаст бькьм. Кʹьтеба Пироз али мьн кьр, ԝәки исафа мьн тʹәмьз бьминә бәр Хԝәде у әз хьлаз кьрьм жь ԝе сафикьрьне, бона кʹижане әзе пʹошман бума у тʹәмамийа әʹмьре хԝә бьчәрчьрийама».

23. Кʹьтеба Пироз чь бәрдьлийе дьдә мәрьвед нәхԝәш у йед кӧ ԝан хԝәй дькьн?

²³ Зутьрәке әме жь һʹәму нәхԝәшийа хьлаз бьн.  Ишайа пʹехәмбәр ньвисийә дәрһәԛа ԝи ԝәʹдәйи чахе тʹӧ кәс ԝе нәбежә: «Әз нәхԝәш ьм» (Ишайа 33:24). Әва соза ԝе дьнйа тʹәзәда бе сери, кʹижан кӧ гәләк незик ә. Ле һʹәта һатьна ԝе рʹоже, әм гәрәке сәбьр кьн нәхԝәшийа у мьрьне. Әм гәләк ша нә, ԝәки Кʹьтеба Пироз али мә дькә у рʹебәрийе мә дькә. Нормед жь Кʹьтеба Пироз, кʹижан кӧ дәрһәԛа рʹабун-рʹуньштьне һатьнә лекьрьне, найенә гӧһастьне, у гәләк ԛимәттьр ьн жь фькьред мәрьвед гӧнәкʹар. Мәрьвед билан ԝе рʹази бьн тʹәви гьлийед зәбурбеж: «Һинкьрьна Хӧдан кʹамьл ә, мерьв әԝ нуйәжийин дькә. . . . Ԛанунед Хӧдан рʹаст ьн, дьле мерьв ша дькьн. . . . Ԛьраред Хӧдан һәԛ ьн, тʹәмамийа хԝәва әԝ рʹаст ьн» (Зәбур 19:7, 9, 11).