1, 2. Na faaaogā faapefea e Satani mala ma maʻi e taumafai e lepeti ai le faamaoni o Iopu?

E MAUTINOA lava le faitaulia o Iopu ia i latou o ē sa olioli i ni soifuaga fiafia faaleaiga. Ua taʻua o ia e le Tusi Paia o le “sa sili . . . i tagata uma lava i sasae.” E toafitu ona atalii ma afafine e toatolu, o le aofaiga atoa e toasefulu le fanau. Sa tamaoaiga foi o ia i mea e saunia lelei ai le tausiga o lona aiga. O le itu e sili ona tāua, sa ia taʻimua i gaoioiga faaleagaga ma sa manatu mamafa i le tulaga o lana fanau i luma o le silafaga a Ieova. O nei mea uma na iu ai i ni faiā faaleaiga e vavalalata ma fiafia.​—Iopu 1:1-5.

² Sa lei misi i le vaai a Satani, o le fili sili o Ieova le Atua, le tulaga o Iopu. O Satani, o lē o loo sailiili pea mo ni auala e lepeti ai le faamaoni o auauna a le Atua, na ia osofaia Iopu e ala i le faaleagaina o lona aiga fiafia. Ona ia “faaoo [lea] ia Iopu le maʻi papala leaga, e gata ae i ona alofivae, e gata ifo i lona tumuai.” Sa faapea ona faamoemoe ai Satani e faaaogā mala ma maʻi e lepeti ai le faamaoni o Iopu.​—Iopu 2:6, 7.

3. O ā āuga o le maʻi o Iopu?

³ E lē o taʻu manino mai e le Tusi Paia po o le ā le maʻi tonu na aafia ai Iopu. Ae o loo ia taʻu maia ia i tatou ona āuga na oo i ai. Sa lilofia lona tino atoa i ilo, ma sa mafoʻefoʻe lona paʻu ma ua pala. Sa aati le leaga o le mānava a Iopu, ma lona tino na manogi leaga foi. Na matuā gāoi o ia i le tiga. (Iopu 7:5; 19:17; 30:17, 30) Sa nofo ma le tiga Iopu i le efuefu ma valu lona tino i le  taʻegaipu omea. (Iopu 2:8) O se vaaiga sa matuā faamomoiloto lava!

4. O le ā le mea e oo i aiga taitasi mai lea taimi i lea taimi?

⁴ E faapeī ou uiga pe ana faapea e te aafia i se maʻi leaga faapena? I aso nei, e lē faaoo mai ai e Satani i auauna a le Atua se maʻi e pei o lea sa ia faia ia Iopu. Peitai ane, ona o le lē lelei atoatoa faaletagata, o mafatiaga o le olaga i aso taitasi, ma le siosiomaga ua faaleagaina o loo tatou ola ai, ua na ona tatou faatalitalia ai lava e iai taimi, e oo ai ina maʻi se tasi o le aiga. E ui lava i auala tau puipuiga atonu o loo tatou faatinoina, ae ua oo uma lava ia i tatou maʻi, e ui e toaitiiti nisi o le a matuā mafatia e pei o le mafatia lea na oo i ai Iopu. Pe a aafia o tatou auaiga i maʻi, o se matuā luʻi moni lava e mafai ona oo mai ai. Seʻi o tatou vāai la pe faapefea e le Tusi Paia ona fesoasoani ia i tatou ina ia foia ai lenei fili ua faaauau pea ona iai i tagata.​—Failauga 9:11; 2 Timoteo 3:16.

5. O ā uiga e masani ona faaalia e tagata o le aiga i ni tulaga o ni maʻi e lē umi?

⁵ O le lē faataunuuina o le gasologa masani o le olaga, e tusa lava po o le ā le pogai, e masani ona faigata, ma ua sili ona moni lenei itu pe afai e faapogaia le lē faataunuuina ona o se maʻi faaumiumi. E oo foi i se maʻi mo sina taimi puupuu e manaomia ai lava ni fetuutuunaiga, le uiga o le faapalepale atu, ma le agaga faataulagaina. O tagata o le aiga ia o loo malolosi atonu e tatau ona latou fifilemu ina ia mafai ona maua ai e lē o loo maʻi se malologa. Atonu o le a tatau ona latou taofia nisi o gaoioiga. Ae, i le tele o aiga, e oo lava i fanau laiti latou te lagona le alofa mo se tamaitiiti po o se matua o loo maʻi, e ui atonu i nisi taimi e tatau ai ona faamanatu atu ia i latou ina ia iai le uiga magafagafa. (Kolose 3:12) I le tulaga o se maʻi e  lē umi, e masani ona nofo sauni le aiga e faia ni mea o manaomia. Auā, o le a faamoemoe tagata uma o le aiga latou te fia mauaina le tausiga lava lea pe a oo foi ina mamaʻi i latou.​—Mataio 7:12.

6. O ā uiga faaalia e vaaia i nisi taimi pe a taia se tasi o le aiga i se maʻi matuia, ma faaumiumi?

⁶ Ae faapefea, pe afai e matuia tele le maʻi ma e tugā ma faaumiumi ona faalavelavea ai? Mo se faaaoaoga, e faapefea pe afai ua taia se tasi o le aiga i le maʻi e pē atoa ai le tino po o se vaega o le tino (stroke), pe ua aafia i le maʻi ua afaina ai neura ma māfua ai le faaleagaina o le faiʻai, (Alzheimer’s disease), pe ua faavaivaia le malosi e nisi lava faamaʻi? Ae faapefea pe afai ua aafia se tasi o le aiga i se maʻi o le mafaufau, e pei o le lē toe sologa lelei o mafaufauga (schizophrenia)? O le uluai uiga faaalia lava e masani ona iai, o le tigaalofa​—o le faanoanoa lea ona ua matuā mafatia sē e pele i le loto. Ae peitai, o le tigaalofa atonu e sosoo mai ai ma isi uiga faaalia. A o iloa e tagata o le aiga le matuā aafia ai o i latou ma ua itiiti foi so latou saʻolotoga e toe maua ona o le maʻi o le tagata e toatasi, e ono oo ai ina latou lagona le lē fiafia. O le a latou tau mānatu ai faapea: “Aisea ua tatau ai ona tupu lenei mea ia te au?”

7. O ā uiga na faaalia e le avā a Iopu i lona maʻi, ma o le ā e foliga mai na galo i lenei fafine?

⁷ E foliga mai o se lagona faapena na oo i le mafaufau  o le avā a Iopu. Ia manatua, ua uma ona mafatia le fafine ina ua feoti lana fanau. Ina ua tutupu na mea, e mautinoa sa faasolosolo ai ona ia lagona le loto tiga. Mulimuli lava, a o ia vaai atu i lana tane o lē sa malosi ma galue mataalia i le taimi muamua ua aafia i se maʻi tigā, ma le inosia, e foliga mai na galo ia te ia le vala tupito lea e sili atu ona tāua nai lo mala uma lava​—o le faiā lea sa iai ia i laua ma lana tane agaʻi i le Atua. Ua faapea mai le Tusi Paia: “Ona fai mai lea o lana avā [le avā a Iopu] ia te ia, Ua e taofi mau pea ea i lau amiotonu? ina faifai ia e oe o le Atua, ma e oti ai.”​—Iopu 2:9.

8. Pe a maʻi tigaina se tasi o le aiga, o le ā le mau o le a fesoasoani i isi tagata o le aiga ina ia tausia ai pea se vaaiga saʻo?

⁸ E toatele e lagona le musu, e oo ina feita, pe a faafuasei ona suia o latou olaga ona o le maʻi o se isi. Peitai, e tatau i se Kerisiano o lē o loo fetuutuunai ona mafaufauga i le tulaga ua iai, ona ia iloaina o lenei mea ua aumaia ai ia te ia se avanoa e faataʻitaʻia ai le moni aʻiaʻi o lona alofa. O le alofa moni “e onosai . . . e agamalu . . . [ma] e le sailia e ia ana lava mea . . . e ufiufi i mea uma, e talitonu i mea uma, e faamoemoe i mea uma, e onosai i mea uma.” (1 Korinito 13:4-7, LT ) O lea la, nai lo le faatagaina o faalogona sese e pulea i tatou, e manaomia ona faia le mea sili tatou te mafaia ina ia tatou puleaina ai na faalogona.​—Faataoto 3:21.

9. O ā faamautinoaga e mafai ona fesoasoani i se aiga i le itu faaleagaga ma faalogona pe a maʻi tigaina se tasi o i latou?

⁹ O le ā e mafai ona faia ina ia puipuimalu ai le lelei faaleagaga ma faalogona o se aiga pe a maʻi tigaina se tasi o i latou? O le mea moni, e tofu lava maʻi taitasi ma lona tausiga ma togafitiga faapitoa e faia i ai, ma o le a lē talafeagai i lenei lomiga ona faasino atu ai so o se togafitiga faafomaʻi po o ni togafitiga e faia i le aiga o lē o loo maʻi. Peitai ane, i le itu faaleagaga, o Ieova o loo ia “faatusaʻoina o e ua faanoʻunoʻu uma lava.” (Salamo 145:14) Na tusi le tupu o Tavita: “Amuia le tagata ua  manatua le ua mativa; e faasaoina o ia e Ieova i le aso vale. E tausia o ia e Ieova ma faaolaina; . . . E lagolago ane Ieova ia te ia i le taotoga o lona maʻi.” (Salamo 41:1-3) E faaolaina e Ieova ana auauna i le itu faaleagaga, e oo foi pe a tofotofoina i o latou faalogona e sili atu nai lo le malosi latou te gafatia. (2 Korinito 4:7) E toatele tagata o aiga o loo fesagai ma maʻi tigaina i o latou aiga, ua latou toe faaleo mai upu a le faisalamo e faapea: “Ua matuā puapuagaina aʻu; Ieova e, ia e faaolaola mai ia te au e tusa ma lau afioga.”​—Salamo 119:107.

10, 11. (a) O le ā e matuā tāua pe afai e fia taulau manuia se aiga i le tausia o se maʻi? (e) Na faapefea e se tasi fafine ona taulau i le tausia o le maʻi o lana tane?

¹⁰ Ua faapea mai se faataoto a le Tusi Paia: “O le loto o le tagata, na te faatoatoa ai lona maʻi; a o le loto faanoanoa, o ai se na te lavā onosai?” (Faataoto 18:14) O tulaga mafatia e mafai ona aafia ai loto o se aiga faapea ma “le loto o le tagata.” Peitai, o “le loto lelei, o le ola lea o le tino.” (Faataoto 14:30) O le taulau manuia o le aiga i le tausia o se maʻi tigaina pe lē taulau foi, e faalagolago atu se vaega tele i uiga, po o le ituaiga o loto o loo faaalia mai e ona tagata.​—Faatusatusa i le Faataoto 17:22.

¹¹ Sa taumafai se tasi fafine Kerisiano e onosaia le vaai atu ua faaleagaina lana tane i le pē o le tino ae faatoʻā ono tausaga talu ona la faaipoipo. Na ia taʻua mai: “Sa matuā aafia leaga le tautala a loʻu toalua, ma na toetoe lava lē toe mafai ona ma talanoa. Sa matuā tetele lagona tiga o le taumafai e malamalama atu i mea sa ia taumafai e tautala mai ai.” Seʻi vaai faalemafaufau foi, i le tiga ma lagona faalii atonu na oo i le tane. O le ā na faia e le ulugalii? E ui lava ina mamao lo la aiga mai le faapotopotoga Kerisiano, ae na faia taumafaiga malolosi a le tuafafine ina ia tumau ai pea le  malosi faaleagaga e ala i le mauaina o faamatalaga fou uma o loo aumaia e le faalapotopotoga, faapea ma le faaauau ona mauaina meaʻai faaleagaga i mekasini o Le Olomatamata ma le Ala Mai! O lenei itu na ia maua ai le malosi faaleagaga e tausia ai si ana tane seia oo lava ina maliu i le fa tausaga mulimuli ane.

12. E pei ona vaaia i le tulaga o Iopu, o le ā le fesoasoani e faia e le tagata maʻi i nisi taimi?

¹² I le tulaga o Iopu, o ia, le tagata maʻi, o lē na tumau i le malosi faaleagaga. Na ia fesili atu i lana avā: “Ua tatou talia mea lelei mai le Atua, a e tatou te le talia ea ma mea leaga?” (Iopu 2:10) E lētioa ona mulimuli ane sii mai e le soo o Iakopo le tulaga o Iopu e fai ma faaaoaoga mataina o le onosai ma le faapalepale! I le Iakopo 5:11 tatou te faitau i ai e faapea: “Ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.” E faapena foi i aso nei, i le tele o tulaga, o uiga lototele o le tagata maʻi o le aiga ua fesoasoani i isi o le auaiga e tausisia ai se vaaiga saʻo.

13. O ā faatusatusaga e lē tatau ona faia e se aiga o loo fetaiai ma maʻi tigaina?

¹³ O le toatele o ē ua fetaiai ma maʻi i le aiga e ioe mai, e muamua lava o se tulaga masani i tagata o le aiga le faafaigata ona fesagai ma le tulaga moni ua iai. Ua latou taʻua foi le matuā tāua o le auala e vaai ai se tasi i le tulaga ua tulai mai. O suiga ma fetuunaiga i le faasologa masani a le aiga i mea e fai atonu e faafaigata i le amataga. Peitai, afai e faia moni e le tagata se taumafaiga, e mafai lava ona ia faamasani atu i se tulaga fou ua iai. O le faia faapea, e tāua ai lo tatou lē faatusatusaina o o tatou tulaga ia i latou o ē e lē o iai se tagata maʻi i o latou aiga, i le mafaufau faapea o loo sili atu ona faigofie o latou olaga ma ua ʻlē o fetaui lena mea!’ E mautinoa, e leai se tasi na te iloa moni po o ā avega mamafa o loo  tatau ona onosaia e isi tagata. Ua maua e Kerisiano uma faamafanafanaga i fetalaiga a Iesu e faapea: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou.”​—Mataio 11:28.

14. E mafai faapefea ona faatulaga mea e ao ona faamuamua?

¹⁴ Pe a fetaiai ma se maʻi tigaina, o le a lelei mo se aiga ona manatua upu faagaeeina nei: “E faatumauina i le toatele o faipule.” (Faataoto 15:22) Faamata e mafai e tagata o le aiga ona potopoto faatasi ma talanoa le tulaga ua faapogaia e le maʻi? E mautinoa lava le talafeagai ona faia faapea faatasi ma le tatalo ma ia saili atu i le Afioga a le Atua mo taʻiala. (Salamo 25:4) O ā mea e ao ona iloiloina i lena talanoaga? E iai filifiliga e tatau ona faia e faatatau i togafitiga faafomaʻi, o tulaga tau tupe, ma le tulaga o le aiga. O ai o le a tausimaʻi? E faapefea ona felagolagomai le aiga i le lagolagoina o lena tausiga? O le a faapefea i fuafuaga ua fai ona aafia ai tagata taitoatasi o le aiga? O le a faapefea ona tausia manaoga faaleagaga ma isi manaoga o le tagata o loo tausimaʻi?

15. O le ā le lagolagosua e saunia e Ieova mo aiga o loo fetaiai ma maʻi tigaina?

¹⁵ O le tatalo faatauanau mo le taʻitaʻiga a Ieova, le mafaufau loloto i lana Afioga, ma le mulimuli atu ma le lototele i le ala ua faaalia mai i le Tusi Paia, e masani ona iu ai i faamanuiaga sa tatou lei faatalitalia. E lē o taimi uma lava o le a toe foi ai i le lelei le maʻi o se tasi o le aiga. Peitai ane, o le faalagolago atu ia Ieova e taʻitaʻiina atu ai pea i iuga e sili ona lelei i so o se tulaga. (Salamo 55:22) Na tusi mai le faisalamo e faapea: “Ona taofi ae lea o aʻu e lou alofa, Ieova e. O le tele o manatunatu i loʻu loto ua fiafia ai loʻu agaga ona o faamafanafanaga mai ia te oe.”​—Salamo 94:18, 19; tagai foi i le Salamo 63:6-8.

16, 17. O ā manatu e mafai ona faia pe a talanoaina ma lau fanau laiti le maʻi o se tamaitiiti?

¹⁶ O maʻi tigaina e mafai ona faapogaia ai faafitauli mo tamaiti i le aiga. E tāua le fesoasoani atu o mātua i le fanau ina ia malamalama i manaoga ua mapuna aʻe ma po o ā mea latou te ono faia e fesoasoani ai. Pe afai o lē o loo maʻi o se tamaitiiti, e tatau ona fesoasoani atu i le fanau ina ia malamalama, o le uaʻi atu ma le tausiga lea o le a tele ina maua e le tamaitiiti o loo maʻi, e lē faapea ai ua itiiti le alofa atu i isi tamaiti. Nai lo le faataga o lagona ita po o le tetee e tuputupu aʻe, e mafai e mātua ona fesoasoani i isi tamaiti ina ia fausia aʻe se faiā vavalalata o le tasi i le isi ma se alofa moni a o latou felagolagomai i le taulimaina o le tulaga ua faapogaia e le maʻi.

¹⁷ O le a masani ona sili atu le tali lelei mai o fanau laiti pe afai e faafiafia e mātua o latou faalogona, nai lo le avatu i ai o ni faamalamalamaga uumi pe faigata e faatatau i tulaga o le maʻi. O lea e mafai ai ona taʻu atu ia i latou ni nai manatu e tusa o le tulaga ua oo i le tagata maʻi o le aiga. Pe afai e iloa e le fanau o loo malolosi, le avea o le maʻi ma pogai ua lē toe mafai ai e lē ua aafia ona faia le tele o mea o loo latou manatu māmā i ai, e foliga mai la o le a tele atu ai so latou ʻalofa faaleuso’ ma “mutimuti vale i le alofa.”​—1 Peteru 3:8.

18. E mafai faapefea ona fesoasoani atu i le fanau matutua ina ia latou malamalama i faafitauli ua faapogaia e le maʻi, ma o le a aogā faapefea lenei mea ia i latou?

¹⁸ E tatau ona fesoasoani atu i le fanau matutua ina ia latou iloa ua tulai mai se tulaga faigata ma e manaomia ai ni faataulagaina e faia e tagata taitoatasi o le aiga. Ona o pili a fomaʻi ma tupe e totogi mo togafitiga e fai, atonu o le a lē faigofie ai mo mātua ona saunia mea mo isi tamaiti e pei ona latou mananao ai. Pe o le  a feita ea tamaiti i lenei mea ma lagona ai faapea ua tuulafoaia i latou? Po o le a latou malamalama ea i le tulaga ua iai ma loto malilie e faia ni faataulagaina ua manaomia? O le tele e faalagolago i le auala ua talanoaina ai le mataupu ma le agaga o loo iai i le aiga. O le mea moni, i le tele o aiga, o le maʻi o se tasi o le aiga ua fesoasoani lea i le aʻoaʻoina o le fanau ina ia usitaia le fautuaga a Paulo e faapea: “Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi ia te ia. Aua neʻi taitasi ma vaavaai i ana lava mea, a ia taitasi ma vaavaai i mea a isi.”​—Filipi 2:3, 4.

19, 20. (a) O ā tiute tauave e tauaveina e ulu o aiga pe a maʻi se tasi o le aiga? (e) E ui lava o le Tusi Paia e lē o se tusi faafomaʻi, ae i le ā le auala ua ia saunia ai taʻiala i le taulimaina o maʻi?

¹⁹ O Kerisiano o loo iai le vaaiga e paleni lelei latou te lē teena togafitiga faafomaʻi pe afai e lē o feteenai ma le tulafono a le Atua. Pe a maʻi se tasi o lo latou aiga, latou te naunautai e saili se fesoasoani ina ia mapu i ai le mafatiaga o lē o loo maʻi. Ae atonu o loo iai lava ni manatu faafomaʻi o loo iai ni feteenaiga, na e tatau ona iloiloina. E lē gata i lea, i tausaga e lei leva atu, na faafuasei ona aliaʻe mai ai ni faamaʻi ma ni maʻi ua fou mai, ma o le tele o nei faamaʻi, e lē o iai se togafitiga ua taliaina faalauaitele. E oo lava i faaiuga saʻo faafomaʻi e iai nisi taimi e faigata ai ona maua. O le ā la e tatau i se Kerisiano ona fai?

²⁰ E ui lava o se tasi o tusitala o le Tusi Paia o se fomaʻi, ma na ofo atu foi e le aposetolo o Paulo ni fautuaga aogā faafomaʻi i lana uo o Timoteo, ae peitai o le Tusi Paia o se taʻiala mo amioga tatau ma mea faaleagaga, ae e lē o se tusi faafomaʻi. (Kolose 4:14; 1 Timoteo 5:23) I mataupu la o togafitiga faafomaʻi, e tatau ai i ulu o aiga  Kerisiano ona faia a latou lava filifiliga e paleni lelei. Atonu latou te lagona e manaomia ona latou mauaina ni manatu faafomaʻi e sili atu nai lo le na o se manatu e tasi. (Faatusatusa i le Faataoto 18:17.) O le a mautinoa lo latou mananao e maua le fesoasoani e sili atu ona lelei mo le latou tagata maʻi, ma o le toatele e saili atu mo lenei fesoasoani i fomaʻi masani. O nisi e sili atu ia i latou isi togafitiga ia e sui aʻi togafitiga faafomaʻi. O lena foi itu o se filifiliga totino a le tagata lava ia. Ae pe a taulimaina faafitauli tau i le soifua maloloina, e lē solomuli ai Kerisiano mai le avea o le ʻafioga a le Atua ma sulu i o latou vae, ma le malamalama i o latou ala.’ (Salamo 119:105) Latou te usiusitai atu pea i taʻiala ua faataatitia mai i le Tusi Paia. (Isaia 55:8, 9) Ona latou teena ai lea o auala faatogafitiga na e fesootai atu i faiga faataulaitu, ma latou alofia togafitiga e solia ai  mataupu silisili o le Tusi Paia.​—Salamo 36:9; Galuega 15:28, 29; Faaaliga 21:8.

21, 22. Na faapefea ona faaaogā e se fafine mai Asia se mataupu silisili o le Tusi Paia, ma na faapefea i le filifiliga na ia faia ona faamaonia le saʻo i lona tulaga?

²¹ Seʻi manatu i le tulaga na oo i ai se fafine talavou mai Asia. A o lei leva talu ona ia aʻoaʻoina le Tusi Paia mai se suesuega na faia ma se tasi o Molimau a Ieova, ae fanau lē au loa lana pepe teine, e na o le tolu ma le kuata pauna (1,470 kalama) lona mamafa. Na nutimomoia le loto o le fafine ina ua taʻu atu e le fomaʻi ia te ia o le a matuā faaletonu le faiʻai o le pepe ma o le a lē taitai mafai ona savali. Na ia fautuaina le fafine ina ia avatu le pepe i se nofoaga e tausia ai tagata e lē lelei mafaufau. Sa lē mautonu lana tane i le mataupu. O ai sa mafai ona ia sulu atu i ai?

²² Ua faapea mai o ia: “Ou te manatua loʻu aʻoaʻoina mai le Tusi Paia e faapea, o ʻle fanau, o le tofi lea mai ia Ieova; o e ua fanau mai, o le taui lea mai ia te ia.’ ” (Salamo 127:3) Sa ia filifili loa e ave lenei “tofi” i le aiga ma tausi ia te ia. Sa tulaga faigata mea i le taimi muamua, ae ona o le fesoasoani atu a uo Kerisiano i le faapotopotoga o Molimau a Ieova i lena vaipanoa, na mafai ai e le fafine ona gafatia ma saunia mo le teineitiiti le lagolagosua faapitoa sa manaomia. I le sefululua tausaga mulimuli ane, ua amata ona ave le teineitiiti i sauniga i le Maota o le Malo ma olioli ai i le faauooga a isi talavou iina. Ua faapea mai le tinā: “Ou te matuā faafetai ona o mataupu silisili o le Tusi Paia na uunaia ai aʻu e faia le mea saʻo. Na fesoasoani mai le Tusi Paia ia te au ina ia tausisia se loto fuatia ifo mamā i luma o Ieova le Atua nai lo loʻu pagatia i le faanoanoa i loʻu olaga atoa.”

23. O le ā le faamafanafanaga ua aumaia e le Tusi Paia mo ē mamaʻi ma ē o loo tausia i latou?

²³ O le a lē faavavau ai pea ona ia i tatou maʻi. Na  faasino atu le perofeta o Isaia i luma i le taimi o le a “le fai mai foi se tasi ua mau ai, Ou te maʻi.” (Isaia 33:24) O lena folafolaga o le a faataunuuina i le lalolagi fou lea o loo vave lona fotuai mai. Peitai ane, a o lei oo atu i lena taimi, e tatau lava ona tatou faafesagaia le maʻi ma le oti. O se mea e faafiafiaina ai, ona o loo aumaia e le Afioga a le Atua ia i tatou taʻiala faapea ma fesoasoani. O tulafono autū i tulaga tau i amioga o loo saunia mai e le Tusi Paia e faavavau, ma e sili mamao atu nai lo manatu fesuisuiai o tagata lē lelei atoatoa. O lea la, o le tagata atamai e ioe o ia i le manatu o le faisalamo o lē na tusi mai e faapea: “E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie. . . . o faamasinoga foi a Ieova e moni ia ma tonu uma lava. . . . e tele foi le taui pe a tausi i ai.”​—Salamo 19:7, 9, 11..