1. Чь щурʹә чәтьнайед вәшарти малбәтеда дькарьн һәбьн?

 ҺӘРГЕ әʹрәбәкә кәвьн рʹьнд бьшон у бьбрьԛиньн, рʹува ԝе ӧса бе хане те бежи әʹрәба тʹәзә йә. Ле һьндӧрʹда һʹәсне ԝе ида жәнг гьртьнә. Әԝ мәсәлә дькарьн бәрамбәри һьнә малбәта бькьн. Һьнә малбәтада те бежи шабун һәйә, ле бь рʹастийе дәрд у еш дьле ԝанда нә. Малбәтеда дькарә тьштед ӧса бьԛәԝьмә чь кӧ әʹдьлайа малбәте хьраб дькә. Дӧ чәтьнайи чь кӧ дькарә хьраб сәр малбәте һʹӧкӧм бә, әԝ һәйә гәләк ичʹкәвәхԝарьн у зӧлмкʹари.

2. а) Ньһерʹандьна Кʹьтеба Пироз сәр ичʹкәвәхԝарьне чь щурʹәйи йә? б) Чь те һʹәсабе гәләк ичʹкәвәхԝарьн?

² Кʹьтеба Пироз ԛәдәхә накә ԝәки мәрьв ичʹкә вәхԝә, ле ԛәдәхә дькә кʹәнге мәрьв гәләк ичʹкә вәдьхԝә (Мәтʹәлок 23:20, 21; 1 Корьнтʹи 6:9, 10; 1 Тимотʹейо 5:23; Тито 2:2, 3). Гәләк ичʹке вәхԝьн у һʹәвәк ичʹке вәхԝьн әԝ ԝәк һәв нинә. Чахе мәрьв һини ичʹке дьбә, әԝ ида ичʹкева те гьредане у һәртʹьм дьхԝазә вәхԝә, чьԛас һәбә ԝе һаԛас жи вәхԝә. Сәд һʹәйф, ле чаԝа мәрьвед мәзьн ӧса жи зарʹ дькарьн һине ичʹке бьн.

3, 4. Һәрге мер гәләк ичʹке вәдьхԝә, әԝ йәк ча дькарә сәр жьн у зарʹа һʹӧкӧм бә?

³ Сәва гәләк ичʹкәвәхԝарьне әʹдьлайи нава малбәтеда найе хԝәйкьрьне, Хәбәра Хԝәде жи ве йәке дьбежә (Ԛануна Дӧщари 21:18-21). Һәр кәс малда зийане дькʹәвә. Жьн бәрхԝә дькʹәвә у дьшьрмиш дьбә чь  бькә, ԝәки мере ԝе ичʹке бьтʹәрькинә у бе гӧһастьне a. Ләма жи дьԛәԝьмә әԝ ичʹкә у пʹәре ԝи жь ԝи вәдьшерә у ԝи һелан дькә ԝәки һʹьзкьрна һьндава малбәте у Хԝәде бьдә кʹьфше. Ле әԝ диса жи пәй ичʹке дьчә. Чахе жьн дьвинә ԝәки тьштәк али мере ԝе накә, жьн дьлтәнг дьбә у һʹәсаб дькә ԝәки тьштәки нькарә бькә. Дьԛәԝьмә жь бо ԝе йәке, тьрс, һерсбун, хԝә сущдаркьрьн у бәрхԝәкʹәтьн бал ԝе пешда бе.

⁴ Чахе де йан бав һʹьз дькә гәләк ичʹке вәхԝә, әԝ йәк гәләк хьраб сәр зарʹед ԝан һʹӧкӧм дьбә. Чьмки щарна де-бав һьндава зарʹа гәләк беʹрәʹм ьн, йан зарʹ тенә хьрабкьрьне алийе сексуалида. Щарна зарʹ дькарьн хԝә нәһәԛ һʹәсаб кьн, сәва ԝе йәке кӧ де йан баве ԝан гәләк ичʹке вәдьхԝьн. Әԝана баԝәрийа хԝә һьндава мәрьва ӧнда дькьн, чьмки дьбиньн ԝәки гәләк ичʹкә вәхԝарьн, чь пәй хԝә тинә. Зарʹ шәрм дькьн гьли кьн дәрһәԛа ԝе йәке, чь кӧ малбәта ԝанда дьԛәԝьмә. Әԝана һәр тьшт дьле хԝәда хԝәй дькьн у әԝ йәк сәр сьһʹәт-ԛәԝата ԝан һʹӧкӧм дьбә (Мәтʹәлок 17:22). Әԝ зарʹ чахе мәзьн дьбьн, дьчәрчьрьн жь бо ԝе йәке кӧ сәр хԝә баԝәр ниньн.

5. Чаԝа мәрьве хԝә бьдьнә сәкьнандьне, жь гәләк ичʹкәвәхԝарьне у чьрʹа әԝ йәк чәтьн ә?

⁵ Гәләк мәрьвед зандар дьбежьн, һәрге мәрьв ида һине ичʹке буйә, чәтьн ә ԝи бьдьнә сәкьнандьне ԝәки ԛә вәнәхԝә. Ле сәва кӧ хԝә хԝәйи кьн жь гәләк ичʹкәвәхԝарьне, гәрәке ԛә ичʹке вәнәхԝьн. (Бәрамбәр кьн Мәтта 5:29.) Бь готьн гәләк һеса йә бежьн, али ԝи мәрьви бькьн кʹе гәләк ичʹке вәдьхԝә, ле чәтьн ә әԝ йәк бькьн, илаһи һьнге, чахе мәрьв һʹәсаб  накә кӧ һини ичʹкә буйә. Ле һәрге нәфәред мала ԝи ԝирʹа бьдьнә кʹьфше, кӧ гәләк ичʹкәвәхԝарьн зийане дьдә нәфәра, дьԛәԝьмә ԝи чахи әԝ ичʹке бьтʹәркинә. Һʹәкимәки зандар дәрһәԛа ԝан малбәта ӧса дьбежә: «Әз һʹәсаб дькьм ԝәки бона һәр кәса нава малбәтеда, дьһа баш ә бь хирәт шьхӧле хԝәйи һәр рʹожи бькьн. Чьмки әԝе кӧ ичʹке вәдьхԝә, ԝе тʹәхмин кә кӧ чьԛас әԝ жь малбәта хԝә щӧдә дьбә».

6. Жь кʹӧ дькарьн бьстиньн ширәтед лапә баш, бона ԝан малбәта, кʹидәре мәрьв гәләк ичʹкә вәдьхԝә?

⁶ Һәрге малбәта ԝәда һәйә әԝ мәрьв йе кӧ һʹьз дькә гәләк ичʹкә вәхԝә, ширәтед жь Кʹьтеба Пироз ԝе али ԝә бькьн рʹаст бьжин (Ишайа 48:17; 2 Тимотʹейо 3:16, 17). Ԝәрен шеԝьр кьн дәрһәԛа ԝан принсипа, йед кӧ ԝе али малбәте бькьн, сафи кьн чь бькьн чахе мәрьв гәләк ичʹкә вәдьхԝә.

7. Кʹе йә нәһәԛ һәрге кәсәк малбәтеда һʹьз дькә гәләк ичʹке вәхԝә?

⁷ Бона һәр тьшти хԝә сущдар нәкьн. Кʹьтеба Пирозда те готьне ԝәки «һәр кәсе хӧрща хԝә һьлгьрә» у «һәр кәсе бона хԝә щабе ль бәр Хԝәде бьдә» (Галати 6:5; Рʹомайи 14:12). Щарна ӧса дьԛәԝьмә, ԝәки әԝе кӧ ичʹке вәдьхԝә, һәр кәсе малбәта хԝәда нәһәԛ дькә. Мәсәлә әԝ дькарә ӧса бежә: «Һәрге һун һьндава мьн баш буна мьне ичʹке вәнәхԝара». Чахе мәрьвед дьн ԝе йәкеда пьштгьрийа ԝи дькьн, бь ԝе йәке әԝана дәст пьшта ԝи дьхьн у һелан дькьн ԝәки әԝ бәрдәԝам кә ичʹке вәхԝә. Ле әԝ, йед кӧ дькʹәвьнә бьн һʹӧкӧме мәрьве дьн у әԝед кӧ ичʹке вәдьхԝә, ԝе хԝәха щаба хԝә бьдә сәва кьред хԝә. (Бәрамбәр кьн Филипи 2:12.)

8. Чь гәрәке бькьн ԝәки әԝ мәрьв йе кӧ һини ичʹке буйә, сәр хԝә тʹәхмин кә ахьрийа вәхԝарьна хԝә?

⁸ Нәфькьрьн ԝәки һун һәр гав гәрәке, һәр тьшти бькьн дәԝса ԝи мәрьви йе кӧ һʹьз дькә гәләк ичʹке вәхԝә. Кʹьтеба Пирозда һәйә мәсәләк дәрһәԛа ԝи мәрьви, кӧ  һәртʹьм хԝә дькә нава ԛәзийе, әԝ мәсәлә әм дькарьн бәрамбәри ԝи мәрьви бькьн йе кӧ һʹьз дькә гәләк ичʹке вәхԝә. «Һәрге тӧ бьди хатьр, те диса бьԝәкʹьлини» (Мәтʹәлок 19:19). Изьн бьдьн ԝи мәрьви йе кӧ һини ичʹке буйә, сәр хԝә тʹәхмин кә ахьрийа вәхԝарьна хԝә. Бьра әԝ хԝәха паши ичʹкәвәхԝарьне пәй хԝә тʹәмьз кә. Ӧса жи бьра хԝәха мәзьне хәбатерʹа тʹеле хә у шьровәкә чьрʹа әԝ нәчу хәбате.

9, 10. Нәфәред ԝан малбәта кʹидәре мәрьв гәләк ичʹке вәдьхԝә, чьрʹа гәрәке аликʹарийе бьхԝазә у жь кʹе?

⁹ Аликʹарийе жь йед дьн ԛәбул кьн. Мәтʹәлок 17:17-да те готьне: «Һәвал һәр гав һʹьз дькә, бьра буйә бона рʹожа охьрме гьран». Гәләк чәтьн ә чахе малда, кәсәк гәләк ичʹкә вәдьхԝә. Аликʹари ԝәрʹа лазьм ә. Шәрм нәкә, аликʹарийа һәвалед хԝә ԛәбул кә (Мәтʹәлок 18:24). Һуне ширәтед керһати бькарьбьн бьстиньн жь ԝан мәрьва, һʹале кʹижана мина йа ԝә йә, йан жи әԝана фәʹм дькьн дәрәща ԝә. Ле фәсал бьн. Дьле хԝә ԝи мәрьвирʹа вәкьн, кʹе хәбәрдана ԝә йед дьненарʹа гьли нәкә (Мәтʹәлок 11:13).

¹⁰ Һин бьн баԝәрийа хԝә рʹуспийед щьвате биньн. Аликʹарийа лапә мәзьн рʹуспийед щьвате дькарьн бьдьнә мә. Әԝ мере щерʹьбанди Хәбәра Хԝәде гәләк рʹьнд заньн. Чьмки ширәтед жь Кʹьтеба Пироз әʹмьре хԝәда данә хәбате. Әԝана бь рʹастийе дькарьн бона мә бьбьн мина чʹийа, кӧ мә жь ба вәдьшерьн у мина сийа зьнара мәзьн (Ишайа 32:2). Рʹуспийед щьвате нә кӧ тʹәне щьвате бь тʹәмами жь һʹӧкӧмтийа хьраб хԝәй дькьн, ле шәхси бона ԝан жи хәм дькьн, кʹе рʹасти чәтьнайа те. Аликʹарийа ԝан ԛәбул кьн.

11, 12. Кʹе у ча дькарә али ԝан малбәта бькә, кʹидәре мәрьв гәләк ичʹке вәдьхԝә?

¹¹ Фәрз әԝ ә ԝәки ԛәԝате жь Йаһоԝа бьгәри. Кʹьтеба Пироз мә дьл гәрм дькә, бь хәбәред ӧса:  «Хӧдан незики дьлшкәстийа йә у мʹәрьм-бәләнгаза дьдәбьринә» (Зәбур 34:18). Һәрге һун дьлтәнг дьбьн сәва ԝе йәке кӧ мәрьвәк жь малбәта ԝә гәләк ичʹке вәдьхԝә, бир нәкьн ԝәки Хԝәде незик ә. Әԝ занә ԝәки һун чьԛас һʹаләки гьранда ньн (1 Пәтрус 5:6, 7).

¹² Баԝәрийа һьндава ньвисаред Кʹьтеба Пироз, ԝе али ԝә бькә, чәтьнайед хԝә тәйах кьн (Зәбур 130:3, 4; Мәтта 6:25-34; 1 Йуһʹәнна 3:19, 20). Һәрге әм Кʹьтеба Пироз һин дьбьн у ширәтед жь ԝе кʹьтебе әʹмьре хԝәда дьдьн хәбате, әме рʹӧһʹе Хԝәдейи Пироз бьстиньн. Әԝ рʹӧһʹ «зорайийа ԛәԝате» дьдә мә, сәва кӧ әм рʹож бь рʹож чәтьнайада сәбьр кьн (2 Корьнтʹи 4:7). b

13. Чь щурʹә чәтьнайед тʹәзә нава малбәтеда дькарьн пешда бен?

 ¹³ Жь бо гәләк ичʹкәвәхԝарьне дькарә чәтьнайед тʹәзә нава малбәтеда пешда бен. Мәсәлә, зӧлмкʹари нава малбәтеда.

14. Зӧлмкʹари чь чах дәстпебу у нава малбәтада чь иро дьԛәԝьмә?

¹⁴ Тʹәрихийа дьнйайеда зӧлмкʹарийа пешийе ԝи чахи ԛәԝьми, чахе Ԛайин бьре хԝә Һабил кӧшт (Дәстпебун 4:8). Жь ԝи ԝәʹдәйида зӧлмкʹари һатә бәлакьрьне нава малбәтада. Мер жьна хԝә дькʹӧтә, жьн дьгьһижә мере хԝә, де-бав зарʹед хԝәйи бьчʹук берʹәʹмти дькʹӧтьн у зарʹед мәзьн гәләк берʹәʹм ьн һьндава де-баве хԝәйә әʹмьрда мәзьн.

15. Чаԝа зӧлмкʹари сәр тʹәмамийа малбәте һʹӧкӧм дькә?

¹⁵ Зӧлмкʹарийа һьндава нәфәред мале ешәкә гьран дькә дьле мәрьва. Әԝ еш жь бьринед бәдәне һе ԛәԝи йә. Жьнәк мере кʹижане кӧ ле дькʹӧтә, гьли дькә: «Һәртʹьм әз дьхәбьтим сәр ԝе йәке, кӧ хԝә сущдар нәкьм у шәрм нәкьм. Шәбәԛе чахе әз һʹьшйар дьбьм, әз дьхԝазьм ԝәки әԝ һʹәму тьшт хәԝн бә». Әԝ зарʹ йед кӧ нава малбәтеда зӧлмкʹарийе дьвиньн, йан сәр хԝә тʹәхмин дькьн, ахьрийеда хԝәха дькарьн бьбьнә мәрьвнә зӧлм һьндава малбәта хԝәда.

16, 17. Диса чь щурʹә зӧлмкʹари һәйә у әԝ йәк малбәтеда ча сәр һәр кәси һʹӧкӧм дьбә?

¹⁶ Зӧлмкарʹийа нава малбәтеда, нә кӧ тʹәне әԝ ә чахе зийана бәдәне дьстини. Ле гәләк щар зӧлми дькарә жь бо хәбәрдана зийандар бә. Мәтʹәлок 12:18-да ньвисар ә: «Хәбәра мина шур мерьв бьриндар дькьн». Нава ԝе зӧлмкʹарийеда йа кӧ «бьриндар» дькә, ӧса жи дькʹәвьнә хәбәред нәпʹак, ԛарʹә-ԛарʹ, ԛәрфкьрьн, беһӧрмәткьрьн у тьрсандьн. Мәрьвед дор бәр нькарьн бьвиньн дьле мәйи бьриндар, чьмки әԝ дәхмә дьлда дьминә.

 ¹⁷ Илаһи сәр зарʹа, әԝ йәк хьраб һʹӧкӧм дьбә. Чахе сәр зарʹа һәртʹьм дькьнә ԛарʹә-ԛарʹ, беһӧрмәт дькьн у сәр дькʹәньн, ԝи чахи зарʹ хԝә беһӧрмәткьри һʹәсаб дькә. Рʹаст ә һәр зарʹәкирʹа ширәткьрьн лазьм ә, ле Кʹьтеба Пироз тʹәмийе дьдә бава: «Бавно, һерса зарʹед хԝә рʹанәкьн, ԝәки әԝ бәр хԝә нәкʹәвьн» (Колоси 3:21).

18. Зӧлмкʹари жь кʹӧ дькарә пешда бе у Кʹьтеба Пирозда чь те готьне дәрһәԛа ԝе йәке ча жь хԝә дур хьн?

¹⁸ Зӧлмкʹари дьлда у һʹьшда пешда те у һʹьше мә, мә һелан дькә әԝе йәке бькьн (Аԛуб 1:14, 15). Сәва кӧ зӧлмкʹарийе нәкьн, мәрьв гәрәке дәрберʹа әԝе йәке жь һʹьше хԝә тʹәмьз кә (Рʹомайи 12:2). Гәло әԝ йәк чәтьн ә әм бькьн? На. Чьмки ԛәԝата Хәбәра Хԝәде ӧса ԛәԝи йә, кӧ дькарә мәрьва бьгӧһезә. Әԝ дькарә фькьред нәпʹак у гәләк хьраб жь дьле мә тʹәмьз кә (2 Корьнтʹи 10:4; Ибрани 4:12). Занәбуна жь Кʹьтеба Пироз али мәрьва дькә хԝә бьгӧһезьн у бьбьнә мәрьвнә ну (Әфәси 4:22-24; Колоси 3:8-10).

19. Жьн у мер гәрәке һьндава һәвда чаԝа бьн?

¹⁹ Һәләԛәтийа ортʹа жьн у мер. Һьнә мәрьв дьбежьн, һәрге мер жьна хԝә нәкʹӧтә, жьн ԝе ԛәдьре сәрԝертийа ԝи нәгьрә. Ле Хәбәра Хԝәде әԝе йәке ԛәбул накә. Ль ԝьр ӧса те готьне: «Мер жьна хԝә һʹьз бькә, чаԝа бәдәна хԝә. Йе кӧ жьна хԝә һʹьз дькә, әԝ хԝә һʹьз дькә» (Әфәси 5:28). Хенщи ԝе йәке Хәбәра Хԝәдеда те готьне, ԝәки мер гәрәке «чаԝа ԛьсьме сьст ԛәдьре ԝан бьгьрьн» (1 Пәтрус 3:7). Жьнарʹа жи тʹәми те дайине мере «хԝә һʹьз бькьн» у ԛәдьре ԝи бьгьрьн (Тито 2:4; Әфәси 5:33). Һәрге мер бь гьлийа жьна хԝә беһӧрмәт дькә, йан дькʹӧтә, әԝ нькарә бежә  ԝәки әԝ ԛәдьре ԝе дьгьрә. Ӧса жи жьн һәрге сәр мере хԝә дькә ԛажини, ле беһӧрмәт дькә, әԝ нькарә бежә, ԝәки әԝ мере хԝә һʹьз дькә у ԛәдьре ԝи дьгьрә.

20. Бәр кʹе де у бав щабдар ьн, у чьрʹа әԝана гәрәке гәләк жь зарʹед хԝә дәʹԝа нәкьн?

²⁰ Һʹәлал у рʹаст бьн һьндава зарʹа. Зарʹ һʹәԝще һʹьзкьрьн у хәмкьрьна де-баве хԝә нә, әԝана һежайи ԝе йәке нә. Хәбәра Хԝәдеда те готьне, ԝәки зарʹ «пʹешкʹешед Хӧдан ьн» у «дайина Ԝи» нә (Зәбур 127:3). Де у бав, сәва ԝе пʹешкʹеше бәр Йаһоԝа щабдар ьн. Кʹьтеба Пирозда те готьне, ԝәки «ахмахти дьле» зарʹада нә (1 Корьнтʹи 13:11; Мәтʹәлок 22:15). Де-бав гәрәке әʹщебмайи нәминьн, кʹәнге дьвиньн кӧ зарʹа ԝан тьштәкә нәрʹаст дькә. Әԝана гәрәке бир нәкьн, ԝәки зарʹа ԝан һе бьчʹук ә. Ләма жи жь зарʹа гәрәке һаԛас дәʹԝа бькьн, чьԛас кӧ әԝ дькарә бькә. (Бьньһерʹә Дәстпебун 33:12-14.)

21. Зарʹ һьндава де-баве хԝә гәрәке чь щурʹәйи бьн, ԝәки Хԝәде хԝәш бен?

²¹ Һәләԛәтийа зарʹа тʹәви де-бава, чахе әԝана әʹмьрда мәзьн ьн. Ԛануна Кʹаһинтийе 19:32-да те готьне: «Ль бәр йе пʹорʹсьпи рʹабә у ԛәдьре әʹмьре мәзьн бьгьрә». Хәбәра Хԝәде һин дькә, ԝәки ԛәдьре мәзьна бьгьрьн. Әԝ йәк дькарә һаԛас жи нә һеса бә. Чьмки щарна де-бавед әʹмьрда мәзьн гәләк тьшт дәʹԝа дькьн, нәхԝәш дькʹәвьн, ԛӧдуме ԝан нагьрә зу-зу рʹе һәрʹьн, йан жи чәтьн сәр гьлийава дьчьн. Ле диса жи зарʹарʹа ширәт те дайине «дәйне де у баве хԝә вәгәрʹиньн» (1 Тимотʹейо 5:4). Әԝ йәк те һʹәсабе ԝәки һьндава ԝан гәрәке бь ԛәдьр бьн у ԝана ԛимәт кьн, ӧса жи алийе материйалида аликʹарийе бьдьнә ԝан.

22. Чь дькарә али мәрьва бькә һерса хԝә бьгьрьн?

²² Зу һерс нәкʹәвә. Мәтʹәлок 29:11-да те готьне: «Ахмах  һʹәму һерса хԝә дьдә дәр, ле йе сәрԝахт хԝәда зәфт дькә». Ле мәрьв ча дькарә һерса хԝә бьгьрә? Дәԝса ԝе йәке кӧ дьлтәнг бьн, ԝе баш бә перʹа-перʹа сафи кьн ԝан чәтьнайа (Әфәси 4:26, 27). Чахе тӧ тʹәхмин дьки, ԝәки нькари һерса хԝә бьгьри, ԝе баш бә ԝе дәме рʹаби у һәрʹи. Дӧа бькә у жь Хԝәде рʹӧһʹе ԝийи пироз бьхԝазә, сәва кӧ зу һерс нәкʹәви (Галати 5:22, 23). Жь мал дәре, йан тьштәки дьнва мьжул бә, чьмки әԝ йәк ԝе али тә бькә ԝәки һерса хԝә бьтәмьрини (Мәтʹәлок 17:14, 27). Бьхәбьтә кӧ «хԝәйисәбьр» би (Мәтʹәлок 14:29).

23. Чь дькарә бьԛәԝьмә һәрге Мәсиһи һерса хԝә нагьрә?

²³ Кʹьтеба Пирозда ӧса жи те готьне дәрһәԛа «нәйарти, шәрʹ-дәʹԝ . . . һерскʹәтьн». Әԝ һәр тьшт Хԝәде хԝәш найе у «йед ван тьшта дькьн, Пʹадшатийа Хԝәде ԝар набьн» (Галати 5:19-21). Һәрге Мәсиһи нькарә һерса хԝә бьгьрә, у гәләк сәрт у берʹәм ә һьндава жьн-мер йан зарʹед хԝәда, әԝ дькарә жь щьвате бе дәрхьстьне, һәрге гӧне хԝә нәдә рʹуйе хԝә. (Бәрамбәр кьн 2 Йуһʹәнна 9, 10.) Ӧса щьват ԝе тʹәмьз бьминә жь ԝан мәрьва кʹе тьштед нәрʹаст дькә (1 Корьнтʹи 5:6, 7; Галати 5:9).

24. а) Жьн чь дькарә бькә, чахе мере ԝе ле дькʹӧтә у найе гӧһастьне? б) Һәвал у рʹуспи чь дькарьн бькьн, у чь гәрәке нәкьн?

²⁴ Һәрге мере Мәсиһи жьна хԝә дькʹӧтә у найе гӧһастьне, жьн чь дькарә бькә? Һьнә жьн сафи дькьн мере хԝә нәһельн. Йед дьн сафи дькьн мере хԝә бьһельн, чьмки дьвиньн ԝәки әԝ йәк хьраб һʹӧкӧм дьбә сәр сьһʹәт-ԛәԝата ԝан, рʹӧһʹанийа ԝан у әʹмьре ԝан. Һәрге әԝ Мәсиһи йе кӧ зийане кʹәтийә, сафи дькә һәрʹә, әԝ сафикьрьна ԝе йә бәр Йаһоԝа (1 Корьнтʹи 7:10, 11). Һәвал, мәрьвед незик у рʹуспийед щьвате,  дькарьн бь дьле тʹәмьз аликʹари у ширәта бьдьнә ԝан мәрьва йед кӧ зийане кʹәтьнә. Ле әԝана гәрәке фәсал бьн, ԝәки зоре ԝан нәкьн у дәԝса ԝан сафи нәкьн, кӧ әԝана чь бькьн. Чьмки әԝ йәк сафикьрьна ԝанә шәхси йә (Рʹомайи 14:4; Галати 6:5).

25. Ньһерʹандьна Йаһоԝа һьндава малбәте чь щурʹәйи йә?

²⁵ Чахе Йаһоԝа Адәм у Һеԝа чекьр, әԝи нәдьхԝәст, ԝәки малбәтеда мәрьвнә ӧса һәбьн, йед кӧ гәләк ичʹкә вәдьхԝьн у зӧлмкʹарийе дькьн (Әфәси 3:14, 15).  Малбәтеда гәрәке һʹьзкьрьн у әʹдьлайи һәбуйа. Малбәтеда гәрәке бона һәвдӧ хәм бькьрана, ча алийе рʹӧһʹанида ӧса жи тьштед майин да. Ле жь бо гӧнәкьрьне һʹале малбәте чьԛас чу хьраб бу. (Бәрамбәр кьн Ԝаиз 8:9.)

26. Чь ахьри һивийа ԝан мәрьва йә, кʹижан кӧ ӧса дьжин, чаԝа Йаһоԝа хԝәш те?

²⁶ Йаһоԝа нета хԝә һьндава малбәте нәгӧһастийә. Әԝ соз дьдә, ԝәки ԝе әʹмьре һʹәта-һʹәтайе бьдә мә. «Әԝе жь чʹәʹвед ԝан һʹәму һесьред ԝан паԛьж кә у . . . еш-ешук» ԝе бьдә һьлдане (Әʹйанти 21:4). Ԝи чахи, чәтьнайед ӧса ча гәләк ичʹкәвәхԝарьн, зӧлмкʹари у гәләк тьштед дьн, йед кӧ зийане малбәтерʹа тиньн, ԝе бенә биркьрьне. Мәрьв ԝе бькʹәньн нә бона ԝе йәке кӧ дьхԝазьн кӧл-дәрдед дьле хԝә вәшерʹьн, ле ԝе бь дьл у щан ша бьн, чьмки ԝе «әʹрде ԝар бьн» (Зәбур 37:11).