1, 2. Чь пьрс гәрәке бьдьнә хԝә, чахе зәԝащеда чәтьнайи пешда тен?

 САЛА 1988-да Лучиа йа кӧ жь Италйайе йә кʹәтьбу депресийе a. Чьмки паши дәһ сала, зәԝаща ԝе бьн ԛәзийеда бу. Әԝе гәләк щар дьхԝәст ԝәки әԝ у мере хԝә диса һәв бен, ле тьштәк дәрнәдькʹәт. Лучиа жь ԝи чу, чьмки хәйсәтда әԝана һәв нәдьһатьн. У әԝе гәрәке дӧ ԛизед хԝә тʹәне мәзьн кьра. Чахе Лучиа әԝи ԝәʹдәйи тинә бира хԝә, әԝ дьбежә: «Әз сәд сәләфи баԝәр бум, ԝәки зәԝаща мә нькарә бе хԝәйкьрьне».

² Һәрге зәԝаща ԝәда жи проблем һәнә, һуне фәʹм бькьн, Лучиайе чь сәр хԝә тʹәхмин дькьр. Дьԛәԝьмә зәԝаща ԝә рʹасти чәтьнайа те, ләма жи һун дьфькьрьн, гәло зәԝаща ԝә, ԝе бе хԝәйкьрьне. Һәрге әԝ йәк ӧса нә, һәр кәс жь ԝә гәрәке дьшьрмиш бә сәр ԝе пьрсе: Гәло әз гӧһ дьдьмә һәр ширәтед керһати жь Кʹьтеба Пироз, кʹижан кӧ Хԝәде дьдә бона бәхтәԝарийа малбәте? (Зәбур 119:105).

3. Ча һәвԛәтандьн һʹӧкӧм дьбә сәр әԝед кӧ һәв дьԛәтьн у сәр малбәта ԝан?

³ Чахе ортʹа жьн у мер шәрʹ-дәʹԝ пешда тен, ԝи чахи әԝана дьфькьрьн, кӧ һәвԛәтандьн әԝ сафикьрьна һәр чәтьнайе йә. Рʹаст ә һьнә ԝәлатада һәвԛәтандьн гәләк бәлабуйи йә, ле жь леколинкьрьнәке те хане, ԝәки гәләк жьн у мер ахьрийеда пʹошман дьбьн, сәва сафикьрьна хԝә. Дьһа зәʹф әԝ  мәрьв нәхԝәш дькʹәвьн, кʹижан сәва һәвԛәтандьне бәрхԝә дькʹәвьн, нә кӧ әԝ мәрьв йед кӧ зәԝаще хԝә хԝәй дькьн. Һәвԛәтандьна де-бава дькарә сәр зарʹа жи хьраб һʹӧкӧм бә. Зарʹ дькарьн гәләк сал бәрхԝә кʹәвьн у хԝә һесир у мәʹрьм тʹәхмин кьн. Дьле де-баве ԝан у һәвалед ԝан жи дькарә бешә бона ԝан, йед кӧ һәв дьԛәтьн. Ле Хԝәде йе кӧ зәԝащ саз кьрийә, ча дьньһерʹә сәр ԝе йәке?

4. Чаԝа дькарьн чәтьнайед нава малбәтеда сафи кьн?

⁴ Сәред дәрбазбуйида дьһатә готьне, ԝәки нета Хԝәде дәрһәԛа малбәте әԝ бу кӧ зәԝаща ԝан һʹәта-һʹәтайе бә (Дәстпебун 2:24). Ле чьрʹа һаԛас һәвԛәтандьн һәнә? Әԝ йәк ньшкева наԛәԝьмә. Бона ԝе йәке тʹьме мәʹни һәнә. Чәтьнайед бьчʹук нава малбәтеда дькарьн ӧса мәзьн бьн, ԝәки чәтьн бә сафи кьн. Ле һәрге ԝәʹдәда бь аликʹарийа ширәтед жь  Кʹьтеба Пироз ԝан чәтьнайа сафи кьн, ԝе бькарьбьн хԝә жь һәвԛәтандьне хԝәй кьн.

5. Мер у жьн бона кʹижан дәрәща реали гәрәке һазьр бьн?

⁵ Щарна ортʹа жьн у мерда чәтьнайи дькарьн пешда бен жь бо ԝе йәке, чахе йәк жь ԝан дьхԝазә ԝәки ә чахе ԝи ӧса бә, чаԝа чʹирокада йә. Кʹьтебед дәрһәԛа романе, журнал у филмед ӧса сәр мәрьва һʹӧкӧм дькьн, ԝәки әԝана дәстпедькьн, сәва тьштед романтик бьфькьрьн, чь кӧ жь әʹмьре реали дур ә. Чахе әԝ йәк найе сери, мәрьв һʹәсаб дькә, ԝәки һатә хапандьне у ләма жи дьбә йәки һерс. Ле дӧ мәрьвед нә беԛьсур ча дькарьн зәԝащеда бәхтәԝар бьн? Сәва кӧ һәләԛәтийа баш зәԝащеда хԝәй кьн, лазьм ә ԛәԝате бьдьнә хәбате.

6. а) Кʹьтеба Пирозда чь те готьне дәрһәԛа зәԝаще? б) Жь бо кʹижан һьнә мәʹнийа малбәтеда дькарә чәтьнайи пешда бен?

⁶ Кʹьтеба Пироз, кʹьтебәкә керһати йә. Ԝе кʹьтебеда те готьне, ԝәки зәԝащ шабуне тинә, ле ӧса жи ԝедәреда те готьне, ԝәки әԝед кӧ дьзәԝьщьн «ԝе рʹасти охьрмед гьран бен» (1 Корьнтʹи 7:28). Ле чаԝа ида һатьбу готьне жьн у мер беԛьсур ниньн у дькарьн шашийа бькьн. Әԝана жь һәв щӧдә дьбьн алийе фькьрада у ширәткьрьнеда. Щарна дькарә чәтьнайи малбәтеда пешда бен жь бо пʹәра, зарʹа йан мәрьвед незик. Һәрге жьн-мер тʹәви һәв һьндьк ԝәʹдә дәрбаз дькьн, йан һәләԛәтийа сексуалда бал ԝана проблем һәнә, әԝ йәк жи дькарә чәтьнайа бинә. b Бе итʹбар нәминьн, чьмки ԝәʹдә лазьм ә сәва кӧ чәтьнайа сафи кьн! Әԝ мәрьв йед кӧ зәԝащеда ньн дькарьн проблемед хԝә ӧса сафи кьн, ԝәки ԝан һәрдӧрʹа жи хԝәш бе.

7, 8. Һәрге мер у жьн һәв фәʹм накьн, йан һәв беһӧрмәт дькьн, чаԝа ширәтед жь Кʹьтеба Пироз дькарьн ԝе йәкеда али ԝан бькьн?

⁷ Гәләкарʹа чәтьн ә хәбәр дьн дәрһәԛа кемаси у шашийед хԝә. Дәԝса ԝе йәке кӧ рʹастә-рʹаст бежьн: «Әз дьфькьрьм, тә мьн рʹаст фәʹм нәкьр», мәрьв дькарә бәрхԝә кʹәвә у һуки бькә муки. Һьнәк ӧса дьбежьн: «Тӧ тʹәне дәрһәԛа хԝә дьшьрмиш дьби», йане «Тӧ мьн ԛә һʹьз наки». Щарна мер йан жьн хԝә кәрʹ дькә, чьмки нахԝазә ԝәки шәрʹ-дәʹԝ пешда бе.

⁸ Дьһа фәрз ә гӧһ бьдьнә ширәтед жь Кʹьтеба Пироз, кʹидәре ӧса ньвисар ә: «Һәгәр һун һерс кʹәвьн, гӧна нәкьн, бьра рʹо сәр һерса ԝәрʹа нәчә ава» (Әфәси 4:26). Мер у жьне кӧ 60 сала бь шабуне тʹәвайи әʹмьр дәрбаз кьрьнә, жь ԝан пьрсин, кӧ чь али ԝан кьрийә, ԝәки зәԝаща ԝан бәхтәԝар ә. Мер дьбежә: «Фьрԛи тʹӧнә чәтьнайед мә мәзьн бьн йан бьчʹук, мә ӧса сафи кьрийә, ԝәки гәрәке хәԝ нәкʹәвә чʹәʹве мә һʹәта әм ԝан чәтьнайа сафи нәкьн».

9. а) Кʹьтеба Пироз дина мә дьдә сәр чь, чахе фькьред мер у жьн жь һәв щӧдә дьбьн? б) Сәва чь мер у жьнарʹа лазьм ә шькәстибун у мерхаси?

⁹ Чахе фькьред мер у жьн жь һәв щӧдә дьбьн, ԝи чахи һәр кәс жь ԝан гәрәке «бьһистьнеда сәрхԝә бә, ле хәбәрдан у һерскʹәтьнеда гьран бә» (Аԛуб 1:19). Һәрге әԝана гӧһ дьдьнә һәв, ԝе бькарьбьн фәʹм кьн ԝәки һәрдӧ жи гәрәке бахшандьне жь һәв бьхԝазьн (Аԛуб 5:16). Сәва кӧ бежьн, «Бьбахшинә мьн дьле тә ешанд», лазьм ә шькәстибун у мерхаси. Мер у жьн һәма бь ԝи щурʹәйи гәрәке чәтьнайед хԝә сафи кьн. Әԝ йәк ԝе али ԝан бькә нә кӧ тʹәне чәтьнайа сафи кьн, ле ӧса жи һьндава һәв һәстед романтик пешда биньн. Һәстед ԝи щурʹәйи ԝе шабуне ԝанарʹа бинә.

10. Кʹижан ширәта Паԝлос, дькарә керһати бә бона Мәсиһийед рʹожа иройин?

¹⁰ Кʹәнге Паԝлосе шанди бона щьвата Корьнтʹи нәʹмә дьньвисин, әԝи ширәт да ԝан, ԝәки дьһа баш ә бьзәԝьщьн нә кӧ «һәр щурʹә ԛавийе» бькьн (1 Корьнтʹи 7:2). Иро һʹале дьнйайе, жь һʹале Корьнтʹийа четьр нинә, ле дьһа хьраб ә. Чьмки тʹемед бенамусийе дәрһәԛа кʹижани мәрьвед ԝе дьне һеса хәбәр дьдьн, кʹьнщед гәләк вәкьри, кʹьтеб, журнал у филмед хьраб хԝәстьна нәрʹаст пешда тинә. Паԝлосе шанди ԝан Коринтʹийарʹа, йед кӧ ԝи һʹәлида бун гот: «Ԛәнщ ә кӧ әԝ бьзәԝьщьн-мер кьн, нә кӧ хԝәда бьшәԝьтьн» (1 Корьнтʹи 7:9).

11, 12. а) Дәйне мер у жьн һьндава һәвдӧда чь йә у ча әԝана әԝе йәке гәрәке биньн сери? б) Чахе жьн у мер борще хԝә нькарьн бьԛәдиньн, ча әԝана дькарьн әԝе йәке сафи кьн?

¹¹ Кʹьтеба Пироз тʹәмийе дьдә Мәсиһийа, йед кӧ зәԝащеда ньн: «Мер бьра дәйне жьне бьде, жьн жи дәйне мер» (1 Корьнтʹи 7:3). Әԝ рʹез дьдә кʹьфше дәрһәԛа дайине, нә кӧ стандьне. Һәләԛәтийа сексуал ортʹа мер у жьн, дькарә рʹасти жи бәхтәԝарийе бинә, һәрге һәр кәс жь ԝан бона кʹара йед дьн дьфькьрә. Мәсәлә, Кʹьтеба Пирозда тʹәми те дайине бона мера, ԝәки әԝана һьндава жьна хԝә «бь фәʹмдарийе» бьн (1 Пәтрус 3:7). Әԝ ширәт илаһи дькарьн бьдьн хәбате чахе хәбәрдан дьчә дәрһәԛа борще мер у жьна. Һәрге мер һьндава жьна хԝә ӧса бь фәʹмдари у бь һʹьзкьрьн нибә, ԝи чахи жьн ԝе шабуне нәстинә жь ве һәләԛәтийа тʹәви мере хԝә.

¹² Ԝе һәбьн ԝәхте ӧса, кӧ мер у жьн борще хԝә нькарьбьн бьԛәдиньн. Мәсәлә, һәр мәһ ԝәхтәки ӧса һәйә, кӧ жьн нькарә борще хԝә бьԛәдинә, йан жи чахе гәләк ԝәстийайи йә. (Бәрамбәр кьн Ԛануна  Кʹаһинтийе 18:19.) Ӧса жи мер, чахе проблемед ԝи сәр хәбате һәнә у әԝ гәләк ԝәстийа йә, ԝи чахи әԝ нькарә борще хԝә бьԛәдинә. Чахе ԝәʹдәки ӧса те, кӧ сәр һьнә ԝәхт борще хԝәйи сексуал нькарьн бьԛәдиньн, мер у жьн гәрәке тʹәви һәв хәбәр дьн у «бь һәврʹа» рʹази бьн (1 Корьнтʹи 7:5). Әԝ йәк ԝе нәһелә әԝана тьштед нәрʹаст бьфькьрьн. Ле һәрге жьн йан мер бе мәʹни, нахԝазьн борще хԝәйи сексуал биньн сери, ԝанарʹа ԝе чәтьн бә хԝә бьгьрьн чахе рʹасти щерʹьбандьне бен. Ԝи чахи чәтьнайи нава малбәтеда дькарә пешда бе.

13. Мәсиһи чь дькарьн бькьн сәва кӧ фькьред хԝә тʹәмьз хԝәй кьн?

¹³ Һәр Мәсиһи гәрәке хԝә жь порнографийе хԝәй кә, кʹижан хԝәстьнед нәрʹаст у нәтʹәбийәти пешда тиньн (Колоси 3:5). Ӧса жи мәрьв гәрәке фькьр у кьред хԝә контрол кә, кʹәнге мер тʹәви жьн хәбәр дьдә, йан жьн тʹәви мер. Иса пешда гот: «Кʹи бь тәме хьраб жьнәке бьньһерʹә, әԝи дьле хԝәда иди тʹәви ԝе зьнекʹари кьр» (Мәтта 5:28). Мер у жьн ԝе бькарьбьн хԝә жь һәләԛәтийа сексуал хԝәйи кьн у бенамусийе нәкьн, һәрге гӧһ бьдьнә ширәтед жь Кʹьтеба Пироз. Әԝана дькарьн шабуне бьстиньн жь һәләԛәтийа незик тʹәви жьн йан мере хԝә, у ԛимәт кьн әԝе пʹешкʹеше йа кӧ сазкʹаре зәԝаще Йаһоԝа ԝанарʹа дайә (Мәтʹәлок 5:15-19).

14. Чь дәрәщед чәтьн дькарьн һәбьн у чьрʹа?

¹⁴ Гәләк баш ә чахе Мәсиһи дькарьн сафи кьн ԝан чәтьнайа йед кӧ зәԝаща ԝанда пешда тен. Ле щарна нә һәр тьшт һеса те сафикьрьне. Чьмки мәрьв нәԛәданди нә у дьнйа хьрабда дьжин, кʹижан кӧ бьн сәрԝертийа Шәйтʹанда йә. Ләма жи гәләк щар мер у  жьн жь һәв дьԛәтьн (1 Йуһʹәнна 5:19). Мәсиһи чь гәрәке бькә ԝе дәрәща чәтьнда?

15. а) Кʹижан мәʹнийа тʹәк ньвисар ә Кʹьтеба Пирозда, йа кӧ изьне дьдә Мәсиһийа һәв бьԛәтьн у малбәта тʹәзә саз кьн? б) Чьрʹа һьнәк сафи дькьн бьбахшиньн бенамусийа жьн йан мере хԝә?

¹⁵ Чаԝа кӧ сәре 2-да һатьбу готьне, тʹәне мәʹник һәйә, ԝәки мер у жьн һәв бьԛәтьн у щарʹа дӧда бьзәԝьщьн, әԝ һәйә ԛави c (Мәтта 19:9). Һәрге избаткьрьнед тә һәнә у тӧ зани, ԝәки мер йан жьна тә бенамуси кьрийә, демәк тӧ бәр сафикьрьнәкә чәтьн сәкьни йи. Жь һәв бьԛәтьн йан на? Әԝ сафикьрьна шәхси йә. Һьнә Мәсиһи сафи кьрьн бьбахшиньнә мер йан жьна хԝә, йе кӧ бь дьл у щан гӧне хԝә дьдә рʹуйе хԝә у ахьрийеда зәԝаща ԝан диса жи бәхтәԝар дьбә. Һәнә йед ӧса жи кʹижан кӧ тʹәне бона зарʹа сафи дькьн һәв нәԛәтьн.

16. а) Жь бо кʹижан мәʹнийа һьнәк сафи дькьн жь һәв бьԛәтьн? б) Чьрʹа тʹӧ кәс гәрәке сущдар нәкә ԝи йан ԝе мәрьви, йе кӧ сафи дькә бьԛәтә жь жьн йан мере хԝә, кʹижан кӧ ԛави кьрийә?

¹⁶ Һәрге жьн йан мер ԛави кьрийә, дьбәк жь ԝе йәке зарʹа беԛануни те буйине, йан жи жь бо ԛавикьрьне, нәхԝәшийед гьран дькарә дәрбази ԝе йан ԝи бә. Йан дьбәк жи лазьм ә зарʹа хԝәй кьн жь де йан баве бенамус. Ча те кʹьфше, лазьм ә гәләк тьшт һьлдьнә һʹәсаб, пешийа кӧ сафи кьн бьԛәтьн йан на. Ле һәрге һун пеһʹәсийанә дәрһәԛа бенамусийа жьн йан мере хԝә у бәрдәԝам дькьн тʹәв дькʹәвьнә һәләԛәтийа сексуал, әԝ йәк те һʹәсабе, ԝәки ԝә бахшандийә у дьхԝазьн зәԝаща хԝә хԝәй кьн. Ԝи чахи ида мәʹнийа ԝә йә һәвԛәтандьне тʹӧнә йә, йа кӧ сәр һʹиме Кʹьтеба Пироз изьне дьдә зәԝаща тʹәзә саз кьн. Тʹӧ кәс гәрәке нәкʹәвә нав шьхӧле тә, у тʹӧ кәс гәрәке тә сущдар нәкә сәва  сафикьрьна тә. Әԝ сафикьрьна тә йә чьмки тӧ гәрәке тʹәви ԝи (ԝе) бьжийи. «Һәр кәсе хӧрща хԝә һьлгьрә» (Галати 6:5).

17. Һәрге бенамуси нәһатийә кьрьне у мер-жьн жь һәв башԛә дьбьн йан һәв дьԛәтьн, ль гора Кʹьтеба Пироз ԝанарʹа чь изьн найе дайине бькьн?

¹⁷ Ле гәло тьштәки ӧса дьԛәԝьмә ԝәки жьн у мер жь һәв башԛә бьн йан жь һәв бьԛәтьн, бе мәʹнийа бенамусийе? Бәле, ле ԝи чахи Мәсиһи нькарә щара дӧда мер кә йан бьзәԝьщә (Мәтта 5:32). Рʹаст ә Кʹьтеба Пироз изьне дьдә ԝәки жь һәв башԛә бьжин, ле ԝедәре ӧса жи те готьне «бьра мер нәкә йан жи мере хԝәрʹа ль һәв бе» (1 Корьнтʹи 7:11). Кʹижан дәрәщада мер у жьн дькарьн жь һәв башԛә бьжин?

18, 19. Кʹижан дәрәщада мер йан жьн дькарьн сафи кьн жь һәв башԛә бьжин?

¹⁸ Малбәт дькарә бькʹәвә бьн кемасийа материйали жь бо ԝе йәке кӧ малхе мале йәки тʹәмбәл ә йан хәйсәт һʹӧнӧред ԝийи хьраб һәнә. d Дьԛәԝьмә, әԝ пʹәре малбәте хәрщ дькә сәр наркотикайе у ичʹке. Кʹьтеба Пирозда те готьне: «Һәгәр мәрьвәк бона . . . мала хԝә хәм накә, әԝи баԝәри инкʹар кьрийә у жь нәбаԝәра жи хьрабтьр ә» (1 Тимотʹейо 5:8). Һәрге мәрьв нахԝазә бе гӧһастьне, сәрда жи пʹәре жьна хԝә хәрщ дькә сәр хԝәстьнед хԝә, һьнге жьн дькарә сафи кә жь ви башԛә бә, сәва бәхтәԝарийа хԝә у зарʹед хԝә.

¹⁹ Ԝи чахи жи дькарьн жь һәв башԛә бьн, чахе мер берʹәʹм ә у жьна хԝә һәртʹьм ӧса дькʹӧтә, ԝәки сьһʹәт-ԛәԝата ԝе у әʹмьре ԝе дькʹәвә бьн зийане. Йан чахе  мер һәртʹьм зоре жьна хԝә дькә, пешбәри ԛануна Хԝәде һәрʹә, жь бо чь жи рʹӧһʹанийа ԝе сьст дьбә, һьнге әԝ дькарә сафи кә башԛә бьжи. Әԝ мәрьвед кӧ алийе рʹӧһʹанида зийане дькʹәвьн дькарьн сафи кьн «гӧрʹа Хԝәде бькьн, нә кӧ йа мәрьва», демәк жь һәв башԛә бьн (Кʹаред Шандийа 5:29).

20. а) Чь дькарьн һәвал у рʹуспи бькьн, ле чьда әԝана гәрәке фәсал бьн? б) Чьрʹа жьна Мәсиһи принсипед Кʹьтеба Пироз дәрһәԛа һәвԛәтандьне у башԛәжитьне бе мәʹни гәрәке нәдә хәбате?

²⁰ Чахе жьн рʹасти зӧлмийа мере хԝә те, изьна тӧ кәси тʹӧнә зоре ԝе бькә сәва әԝ жь ԝи бьԛәтә йан тʹәви ԝи бьминә. Рʹаст ә һәвал у рʹуспийед щерʹьбанди дькарьн ширәтед сәр һʹиме Кʹьтеба Пироз бьдьнә ԝе, ле әԝана гәрәке фәсал бьн. Чьмки әԝана бь тʹәмами ньзаньн чь бь рʹастийе малбәтеда дьԛәԝьмә ортʹа мер у жьнда. Әԝ йәк тʹәне Йаһоԝа занә. Һәрге жьна Мәсиһи принсипед Кʹьтеба Пироз дьхԝазә бьдә хәбате сәва кӧ бе мәʹни жь мере хԝә бьԛәтә, бь ԝе йәке әԝ дьдә кʹьфше ԝәки ԛәдьре сазкʹаре малбәте Йаһоԝа нагьрә. Ле һәрге әʹмьре ԝе мала ԝеда бьн зийанеда йә, әԝ сафи дькә башԛә бә, тʹӧ кәс гәрәке ԝе сущдар нәкә. Әԝе йәке әм дькарьн бежьн дәрһәԛа мере Мәсиһи жи, йе кӧ дьхԝазә жь жьна хԝә башԛә бә. «Әм һʹәмуйе жи ль бәр диԝана Хԝәде бьсәкьньн» (Рʹомайи 14:10).

21. Кʹижан мәсәлә дьдә кʹьфше, ԝәки ширәтед жь Кʹьтеба Пироз али малбәта дькә?

²¹ Лучиа дәрһәԛа кʹижани жоре һатьбу готьне, се мәһ шунда паши ԝе йәке ча жь мере хԝә чу, рʹасти Шәʹдед Йаһоԝа һат у дәстпекьр Кʹьтеба Пироз һин бә. Әԝ гьли дькә: «Әз гәләк әʹщебмайи мам, чахе әз пеһʹәсийам, ԝәки Кʹьтеба Пирозда ширәтед керһати һәнә, сәва сафикьрьна проблемед мьн. Һʹәфтек бу  ча мьн һинбуна Кʹьтеба Пироз дәстпекьрьбу, мьн ида дьхԝәст әз у мере хԝә һәв бем. Иро әз дькарьн бежьм кӧ Йаһоԝа занә, ча али ԝан малбәта бькә, чәтьнайед кʹижана кӧ һәнә. Чьмки әԝ һин дькә, ча жьн у мер гәрәке ԛәдьре һәвдӧ бьгьрьн. Әԝ йәк рʹаст нинә кӧ һьнәк дьбежьн, ԝәки Шәʹдед Йаһоԝа жьн у мера һәв дьԛәтиньн. Чьмки дәрәща мьнда әԝ йәк щурʹәки майин бу». Лучиа һин бу ширәтед жь Кʹьтеба Пироз әʹмьре хԝәда бьдә хәбате.

22. Чьда мер у жьн дькарьн баԝәр бьн?

²² Зәԝащ гәрәке кʹәрәм бә, нә кӧ баре гьран бә. Йаһоԝа бона зәԝаще ширәтед ԛимәт жь Хәбәра хԝә дайә мә, у әԝе ширәте әм нькарьн бәрамбәри тӧ ширәтәкә дьн бькьн. Кʹьтеба Пироз нәсәрԝахта сәрԝахт дькә (Зәбур 19:7-11). Хәбәра Хԝәде зәԝаще хԝәй дькә у аликʹарийе дьдә ԝан малбәта, чәтьнайед кʹижана һәнә. Мер у жьн гәрәке бь тʹәмами баԝәрийа хԝә ԝан ширәта биньн, йед кӧ Йаһоԝа Хԝәде дьдә малбәта. Чьмки әԝ ширәт рʹасти жи керһати нә!