1, 2. Pe a fesagai se faaipoipoga ma ni mafatiaga, o le ā le fesili e ao ona fesiligia?

I LE 1988, sa matuā mafatia ai se fafine Italia e suafa ia Lusia. * Ina ua mavae le sefulu tausaga talu ona faaipoipo ae toe faamutaina loa. O le tele o taimi, sa ia taumafai ai e faia se toe faaleleiga ma lana tane, peitai na lē taitai ona aogā. Ona la tetea ai lea talu ai le lē mafai ona la malilie faatasi, ma i le taimi nei ua ia fesagai ai ma lona tausia aʻe toatasi o lana fanau teine e toalua. I le toe tepa atu i na taimi, ua manatua ai e Lusia faapea: “Sa ou mautinoa lava e leai se mea e mafaia ona laveaia la ma faaipoipoga.”

² Pe afai o loo iai ni ou faafitauli tau i le faaipoipoga, atonu o le a mafai ona e malamalama i le tulaga o Lusia. Atonu ua āfatia lau faaipoipoga ma atonu o loo e tau mānatu pe mafai pea ona laveaia. Pe afai o le tulaga lena ua iai, o le a e iloaina la le aogā o le iloiloina o lenei fesili: Faamata ea o oʻu usitaia fautuaga lelei uma ua aumaia e le Atua i le Tusi Paia ina ia faataulau manuia ai faaipoipoga?​—Salamo 119:105.

3. A o oo ina taatele talagā faaipoipoga, o le ā le uiga faaalia ua taʻua mai o loo iai i le toatele o tagata ua tatala a latou faaipoipoga faapea ma o latou aiga?

³ Pe a faifai tetele aʻe lagona tiga i le va o le tane ma le avā, e foliga mai o le gaoioiga lava e sili ona faigofie, o le faamuta loa o le faaipoipoga. Peitai, a o tofo le tele o atunuu i se faatelega maoaʻe o aiga malepelepe, ae ua faaalia i suesuega talu ai nei e faapea, o le pasene tele o tamaloloa ma fafine ua tatala a latou faaipoipoga, o loo matuā  faanoanoa i le tulaga malepe ua iai. O nisi o i latou nei ua sili atu le tele o faafitauli o le soifua maloloina, e lē gata i le tino a o le mafaufau foi o loo mafatia ai, nai lo o i latou o loo faaauau pea a latou faaipoipoga. E tele ni tausaga e fesagai ai le fanau ma lagona fenuminumiai ma le lē fiafia ona o le talagā faaipoipoga ua fai. Ua mafatia foi mātua ma uo a le aiga lea ua malepe. Ae faapefea le silafaga a le Atua, o Lē na Amataina le faaipoipoga, i le tulaga ua tulai mai?

4. E ao faapefea ona taulimaina faafitauli i se faaipoipoga?

⁴ E pei ona taʻua i mataupu ua mavae atu, sa fuafuaina e le Atua ina ia tatau ona avea le faaipoipoga o se fusi mo le olaga atoa. (Kenese 2:24) Aisea la ua malepelepe ai le tele o faaipoipoga? E lē o se mea e tupu faafuasei. E masani lava, e iai ni faailoilo e taʻu mai ai. O nai faafitauli iti lava i se faaipoipoga e mafai ona tutupu tele aʻe seia oo ina foliga mai ua lē mafai ona foia. Peitai pe afai e vave ona taulimaina nei faafitauli e ala i le fesoasoani a le Tusi Paia, ona mafai lea ona alofia le tele o faaipoipoga malepelepe.

5. O le ā le tulaga saʻo e tatau ona fesagaia i so o se faaipoipoga lava?

⁵ O se itu e taʻitaʻia atu ai i nisi taimi i faafitauli o faamoemoega e lē tusa ai ma vaaiga saʻo a se tasi o paaga faaipoipo po o laua uma foi. O tusifaitau i tala o faigauo faaleituaiga, o mekasini lauiloa, o polokalame o televise, ma tifaga e mafai ona fafau aʻe ai ni faamoemoega ma ni moomooga e matuā ese mamao lava mai le tulaga moni o le olaga. Pe a lē faataunuuina la nei moomooga, e mafai ona oo i se tagata lagona ua olegiaina o ia, ua lē faamalieina, e oo foi ina matuā ita. E ui lava i lea, pe mafai ea e ni tagata lē lelei atoatoa se toalua ona la mauaina se fiafiaga sili i le faaipoipoga? E manaomia ai ni gaoioiga ina ia ausia se faiā manuia.

6. (a) O le ā le vaaiga paleni lelei e faatatau i faaipoipoga ua aumaia e le Tusi Paia? (e) O ā nisi o mafuaaga mo ni feeseeseaiga i le faaipoipoga?

⁶ E aogā le Tusi Paia. Ua ia taʻu maia le olioli e maua i le faaipoipoga, ae ua lapatai mai foi e faapea, o i latou e faaipoipo o le a oo i ai “puapuaga i le tino.” (1 Korinito 7:28) E pei ona sa taʻua muamua, e lē lelei atoatoa uma paaga e toalua ma e lolo uma atu i le agasala. O le fausaga tau i le mafaufau ma faalogona, ma le auala na tausi aʻe ai paaga taitoatasi e eseese uma. O nisi taimi e lē malilie faatasi ai ulugalii e faatatau i tupe, i tamaiti, ma o latou tauaiga. O le lē lava o taimi e faifaimea faatasi ai ma faafitauli i feusuaiga faaleituaiga e mafai foi ona avea ma puna o feteenaiga. * E tele se taimi e alu i le tau faaleleia o na mataupu, ae ia loto tetele! O le toatele lava o ulugalii faaipoipo ua mafai ona latou fesagaia na faafitauli ma galulue vavalalata ina ia maua ni vaifofo ua la malilie uma i ai.

7, 8. Pe afai o iai ni lagona tiga po o ni lē femalamalamaaʻi i le va o paaga faaipoipo, o le ā le auala faale-Tusi Paia e taulimaina ai?

⁷ Ua iloa e le toatele le faigata ona toafilemu a o latou talanoaina lagona tiga, ni lē femalamalamaaʻi, po o ni lē  taulau o le tagata lava ia. Nai lo le taʻu saʻo atu: “Ou te lē o malamalama,” atonu o le a loto vaivai se paaga ma faamamafa naʻuā ai le faafitauli. E toatele o le a faapea mai: “E te manatu lava oe mo lou lelei,” po o le, “E te lē o alofa mai ia te au.” Ona o le lē manao o le isi paaga e faia se fefinauaiga, atonu o le ia lē tali atu ai.

⁸ O le auala e sili ona lelei e uia o le utagia lea o le fautuaga a le Tusi Paia e faapea: “A outou ita, aua le agasala ai; aua neʻi goto le la o ita pea outou.” (Efeso 4:26) Ina ua aulia e se tasi ulugalii o loo fiafia le la faaipoipoga, le lona 60 o tausaga talu ona la faaipoipo, sa fesiligia ai i le pogai o le taulau manuia o le la faaipoipoga. Na faapea mai le tane: “Na ma iloaina le aogā o le muai foia o o ma feeseeseaiga, e tusa lava po o ni mea laiti, a o ma lei momoe.”

9. (a) O le ā ua taʻua i le Tusi Paia e faapea, o le vaega tāua lea o fesootaiga? (e) O le ā e manaomia e paaga faaipoipo ona fai, e tusa lava pe manaomia ai le lototele ma le lotomaulalo?

⁹ Pe a lē malilie faatasi le tane ma le avā i se mea, e manaomia e i laua uma ona “faataalise ona faalogologo, ia faagesegese ona tautala atu, ia faagesegese ona ita.” (Iakopo 1:19) Pe a uma ona faalogologo lelei atu, o le a mafai ai e paaga uma e toalua ona iloa le manaoga ina ia faatoese atu. (Iakopo 5:16) O le faapea atu ma le faamaoni, “Ia e malie ona o loʻu faatiga i lou loto,” e manaomia ai le lotomaulalo ma le lototele. Ae peitai, o le taulimaina o feeseeseaiga i lenei auala o le a matuā aogā i le fesoasoani atu i se ulugalii faaipoipo, e lē gata i le foiaina o o la faafitauli, ae atiina aʻe ai foi le māfana ma le vavalalata lea o le a atili faateleina ai le fiafia o le tasi i le mafuta mai o le isi.

10. O le ā le puipuiga na fautuaina e Paulo i Kerisiano i Korinito atonu e faatatauina foi i se Kerisiano i aso nei?

¹⁰ Ina ua tusi atu le aposetolo o Paulo i Kerisiano i Korinito, sa ia fautuaina ai le lelei ona faaipoipo ʻona o le faateteleina  o le faitaaga.’ (1 Korinito 7:2) Ua tutusa lava le leaga o le lalolagi i aso nei ma le tulaga o Korinito anamua, pe ua sili atu foi i aso nei. O mataupu i amioga lē mamā ua pei o le meanoa i talanoaga a tagata o le lalolagi, le auala lē onomea o loo latou laei ai, ma tala e faaosooso ai i amioga lē mamā ua faamatilatila mai i mekasini ma tusi, o televise, ma tifaga, ua tuufaatasia uma ina ia uunaia ai faanaunauga i feusuaiga lē mamā. Na taʻu atu e le aposetolo o Paulo i uso Korinito sa ola aʻe ai i se siomaga talitutusa, e faapea: “E sili le faaipoipo i lo le mu i le manao.”​—1 Korinito 7:9.

11, 12. (a) O le ā le mea e tatau i le tane ma le avā ona avatu e le tasi i le isi, ma i le ā le agaga e tatau ona faatinoina ai? (e) E faapefea ona taulimaina le tulaga, pe afai e tatau ona lē faia feusuaiga faaleulugalii mo sina taimi?

¹¹ O lea la, ua poloai mai le Tusi Paia i Kerisiano faaipoipo e faapea: “Ia avatu e le tane i le avā le agalelei e tatau ai, ia faapea foi le avā i le tane.” (1 Korinito 7:3) Seʻi mātau mai, o loo faamamafa le foai atu​—ae lē o le tauanau faamalosi. O faiā vavalalata faaletino i le faaipoipoga e faamalieina moni ai pe afai e manatu mamafa uma paaga mo le lelei o i laua uma. Mo se faaaoaoga, ua poloaiina e le Tusi Paia tane ina ia feutagai ma a latou avā “ma le poto.” (1 Peteru 3:7) Ua patino le moni o lenei manatu i le foai atu ma le mauaina mai o le agalelei e tatau ai i le faaipoipoga. Pe afai e lē o tausia le avā i se uiga agalelei, atonu o le a faafaigata ai ia te ia ona olioli i lenei vala o le faaipoipoga.

¹² E iai taimi atonu o le a faafitia ai e paaga faaipoipo le tuuina atu e le tasi i le isi o le agalelei e tatau ai i le faaipoipoga. Atonu e moni lenei i le tulaga o le avā i nisi o taimi o le masina, po o ni taimi foi na te lagona ai le matuā vaivai. (Faatusatusa i le Levitiko 18:19.) Atonu e faapea foi ona moni i le tulaga o le tane pe afai o loo fesagai o ia ma se faafitauli matuia i le galuega ma lagona ai le matuā mou atu o ona faalogona. O ni tulaga faapena e lē faia ai  feusuaiga faaleulugalii mo sina taimi, e sili atu ona lelei le taulimaina pe afai e talanoaina saʻo e paaga le tulaga o loo iai ma malilie ai i le “loto gatasi.” (1 Korinito 7:5) O lenei faiga o le a taofia ai paaga uma mai le faia o ni faaiuga sese. Peitai, afai ua lē faamalieina ma le loto i ai e se avā lana tane po ua lē tuuina atu foi ma le loto i ai e se tane le agalelei e tatau ai i le faaipoipoga i se ala agaalofa, atonu o le a tuua ai le isi paaga i se tulaga o tofotofoga. I se tulaga faapena, e mafai ona tutupu aʻe ai faafitauli i se faaipoipoga.

13. E mafai faapefea ona galulue Kerisiano ina ia tausia pea le mamā o o latou mafaufauga?

¹³ I le pei o Kerisiano uma lava, e ao i auauna faaipoipo a le Atua ona alofia tusiata o faiga faaleituaiga lē mamā, lea e mafai ona tutupu aʻe ai faanaunauga lē mamā ma le lē faalenatura. (Kolose 3:5) E ao foi ona latou leoleomalu i o latou mafaufauga ma gaoioiga pe a feutagai ma tagata uma o le isi ituaiga. Na lapatai mai Iesu: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28) I le faatatauina o fautuaga a le Tusi Paia e uiga i feusuaiga, e ao ai i ulugalii ona mafai ona la alofia le paʻūū atu i le tofotofoga ma faia le mulilua. E mafai ona la olioli pea i faiā māfana ma le fiafia i le faaipoipoga, lea e faapelepeleina ai feusuaiga e avea o se meaalofa mamā mai Lē na Amataina le faaipoipoga, o Ieova lea.​—Faataoto 5:15-19.

14. O le ā le tulaga faanoanoa e oo mai i nisi taimi? Aisea?

¹⁴ E fiafia lava, talu ai o le tele o faaipoipoga faa-Kerisiano, e mafai ona latou taulimaina so o se faafitauli e mapuna aʻe. Peitai i nisi taimi, ua lē o le tulaga lena. Talu ai le lē lelei atoatoa o tagata ma o loo nonofo i latou i se lalolagi agasala o loo pulea e Satani, ua tau malepe ai nisi faaipoipoga. (1 Ioane 5:19) E ao faapefea i Kerisiano ona feutagai ma se tulaga faapena e tofotofoina ai?

15. (a) O le ā le faavae faale-Tusi Paia e tasi mo le tatalaina o se faaipoipoga faatasi ai ma se faamoemoe o le toe faaipoipo atu? (e) Aisea ua teena ai e isi le faia o se talagā faaipoipoga ma se paaga faaipoipo ua lē faamaoni?

 ¹⁵ E pei ona taʻua i le Mataupu e 2 o lenei tusi, ua na o le mulilua lava le faavae faale-Tusi Paia mo le tatalaina o se faaipoipoga faatasi ai ma se faamoemoe o le toe faaipoipo atu. * (Mataio 19:9) Pe afai ua ia te oe ni faamaoniga maʻoti ua lē faamaoni lau paaga faaipoipo, ona e fesagai lea ma se filifiliga faigata. Pe o le a faaauau ai pea lau faaipoipoga po o le a tatala? E leai ni tulafono. O nisi Kerisiano ua latou matuā faamagaloina se paaga ua salamō moni ma ua oo ina toe sologa lelei ai le faaipoipoga lea ua faasaoina. O isi ua latou teena le faia o se talagā faaipoipoga ona o le manatu mo le lelei o le fanau.

16. (a) O ā nisi o vala ua uunaia ai nisi e tatalaina faaipoipoga ma a latou paaga ua faimea sese? (e) Pe a faia e le paaga e lē o agasala se faaiuga ina ia tatala pe lē tatalaina foi lana faaipoipoga, aisea e lē tatau ai i se tasi ona faitioina le faaiuga a lea paaga?

¹⁶ Ae i le isi itu, o le gaoioiga agasala atonu e iu ai i se maʻito po o se faamaʻi pipisi mai feusuaiga lē mamā. Pe atonu e manaomia ona puipuia le fanau mai se matua na ia faaleagaina i latou i faiga faaleituaiga. E manino, e tele mea e iloiloina a o lei faia se filifiliga. Peitai, pe afai ua e iloa le lē faamaoni o lau paaga faaipoipo ae mulimuli ane ua e toe faia ni feusuaiga ma ia, e faaalia atu ai la ua e faamagaloina lau paaga ma ua iai sou faanaunauga ina ia faaauau pea le lua faaipoipoga. Ua lē toe iai la ni faavae mo se talagā faaipoipoga faatasi ai ma le faamoemoe faale-Tusi Paia o le toe faaipoipo atu. E lē tatau ona iai se tasi e isuisu ane fua ma taumafai e aiā i lau faaiuga, e lē tatau foi ona iai so o se tasi e faitioina lau faaiuga ua e faia. O oe lava o le a faafesagaia āuga o le mea ua e filifilia. “E taitasi ma ave i lana lava avega.”​—Kalatia 6:5.

17. Pe afai e lei faia le mulilua, ae o ā tapulaa ua faataatitia e le Tusi Paia e faia ai se teteaga po o se talagā faaipoipoga?

¹⁷ Pe iai ea ni tulaga e ono talafeagai ai se teteaga pe atonu foi e tatala ai le faaipoipoga ma se paaga faaipoipo e tusa lava pe lei faia e lena paaga le mulilua? Ioe, peitai i lena tulaga, ua lē saʻoloto ai se Kerisiano e toe saili atu i se isi tagata i le manatu e toe faaipoipo atu i ai. (Mataio 5:32) E ui lava e faatagaina e le Tusi Paia lena teteaga, ae ua faamanino mai ai e faapea, o lē ua alu ese mai e tatau ona “nofo fua pea ia, pe toe lelei ma lana [paaga].” (1 Korinito 7:11) O ā nisi o tulaga matuia e mafai ona talafeagai ai le faia o se teteaga?

18, 19. O ā nisi o tulaga matuia atonu e taʻitaʻia atu ai se paaga ina ia iloiloina le tatau o se teteaga faaletulafono po o se talagā faaipoipoga, e ui lava o le a leai se faamoemoe mo se toe faaipoipo?

¹⁸ Atonu ua matitiva le aiga ona o le matuā paie ma ni masaniga leaga o loo faia e le tane. * Atonu na te faaaogā le tupemaua a le aiga e pelētupe ai pe faaaogā foi ina ia faaauau ai pea le puleaina o ia e fualaau faasaina po o le ava malosi. Ua taʻua e le Tusi Paia: “Afai e le tausi e se tasi . . . i e mau ma ia, ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8) Pe afai e musu lena tamaloa e suia ona ala, atonu ua oo lava ina faatupe ana amioga leaga e ala i le faaaogā ai o tupe o loo suʻe mai e lana avā, e mafai la e le avā ona filifili e puipuia lona lelei ma le lelei o lana fanau e ala i le faia o se teteaga faaletulafono.

¹⁹ O lena gaoioiga faaletulafono e mafai foi ona mafaufauina pe afai ua matuā sauā se tasi i lana paaga, atonu i le fasi faalausosoo o lena paaga ma ua oo ai ina lamatia le soifua maloloina po o lona ola foi. E lē gata i lea, pe afai e taumafai pea lava pea se paaga e faamalosia lana paaga  faaipoipo e solia poloaiga a le Atua i nisi o mea, e mafai foi la e le paaga o loo faamataʻuina ona mafaufau i se teteaga, ae maise lava pe afai ua oo atu le mataupu i le tulaga ua lamatia ai le ola faaleagaga. Atonu e mafai e le paaga lea o loo pagatia ona faia se faaiuga e faapea, e na o le pau le auala e ʻanaana ai i le Atua nai lo le anaana i tagata’ o le faia lea o se teteaga faaletulafono.​—Galuega 5:29.

20. (a) I le tulaga o se aiga ua malepe, o le ā e mafai e uo taʻumatuaina ma toeaina ona ofo atu, ae o le ā e lē tatau ona latou ofo atu? (e) E lē tatau i ē faaipoipo ona faaaogā faavae faale-Tusi Paia mo teteaga ma talagā faaipoipoga e fai ma faamolemolega mo le faia o le ā?

²⁰ I tulaga uma lava e fai ai e paaga ni faiga leaga matuia, e leai se tasi e tatau ona soona uunai atu fua i le paaga e lē o agasala, i le pe faia se teteaga po o le nonofo faatasi pea. E ui lava e mafai e uo taʻumatuaina ma toeaina ona ofo atu se lagolagosua ma ni fautuaga faale-Tusi Paia, ae e lē mafai e i latou nei ona iloa auiliiliga uma o mea o loo tutupu i le va o le tane ma le avā. E na o Ieova o loo silafia le itu lena. Ioe, o le a lē ava se avā Kerisiano i le faatulagaga faalefaaipoipoga a le Atua pe afai na te faaaogā ni faamolemolega vaivai e sola ese ai mai le faaipoipoga. Ae afai e tupu aʻe se tulaga ua matuā lamatia ai, e leai se tasi e tatau ona faitioina o ia pe afai ua ia filifili e tetea. O le mea tonu foi lena e mafai ona fai atu ai e faatatau i se tane Kerisiano ua saili atu mo se teteaga. “Tatou te laulaututū uma lava i luma o le nofoa faamasino o Keriso [“le Atua,” NW].”​—Roma 14:10.

21. O le ā le mea na tupu e faaalia ai e aogā fautuaga a le Tusi Paia mo faaipoipoga?

²¹ I le tolu o masina talu ona teteʻa Lusia lea na muai taʻua, ma lana tane, ae fetaui atu loa o ia i Molimau a Ieova ma amata ai ona suesueina le Tusi Paia ma i latou. Ua ia faamatala mai e faapea: “Sa matuā faateʻia aʻu, ona sa aumaia uma e le Tusi Paia vaifofo aogā i loʻu faafitauli. Ina ua mavae le vaiaso e tasi talu ona ou suesue, ae ou manao vave loa ina ia ma toe faalelei ma laʻu tane. I aso nei, e  mafai ona ou faapea atu, e silafia lelei e Ieova le auala e faasaoina ai faaipoipoga o loo iai i tulaga faigata auā o ana aʻoaʻoga ua fesoasoani lea i paaga ina ia latou iloa ai le auala e faaaloalo atu ai le tasi i le isi. Ua lē moni le manatu, e pei ona maumauai i ai nisi e faapea, e faamalepeina e Molimau a Ieova aiga. I loʻu ia tulaga, o le matuā tuufaafeagai lava.” Sa oo ina iloa e Lusia le tatau ona ia faatatauina mataupu silisili o le Tusi Paia i lona olaga.

22. O le ā e ao i ulugalii faaipoipo uma ona mautinoa i ai?

²² E lē faapea e na o Lusia ua oo i lea tulaga manuia. E ao ona avea le faaipoipoga o se faamanuiaga, ae e lē o se avega mamafa. I lena tulaga, ua saunia ai e Ieova le puna e silisili ona lelei mo fautuaga tau i faaipoipoga​—o lana Afioga tautele lea. E mafai e le Tusi Paia ona “faapotoina ai le ua faigofie.” (Salamo 19:7-11) Ua ia faasaoina le tele o faaipoipoga sa tau malepe ma ua faaleleia ai le tele o isi faaipoipoga sa iai ni o latou faafitauli matuia. Tau ina ia maua e ulugalii faaipoipo uma le mautinoa atoatoa i fautuaga tau i faaipoipoga ua saunia mai e Ieova le Atua. E aogā moni lava!