An Laog kan Libro

An sarong tawo na sa kaenot-enote minalaog sa sarong libreriya tibaad mataranta sa kadakoldakol na libro. Alagad paagi sa kadikit na esplikasyon kun paano inareglar an mga libro, madali niang manodan kun paano hahanapon an mga bagay. Kaagid kaiyan, an paghanap sa Biblia mas pasil kun nasasabotan nindo kun paano inareglar an mga laog kaiyan.

AN TERMINONG “Biblia” kinua sa termino sa Griego na bi·bliʹa, na nangahulogan “mga karasutsong papiro” o “mga libro.”¹ An Biblia sa katunayan sarong koleksion—sarong libreriya—nin 66 na indibiduwal na libro, na luminawig nin mga 1,600 na taon an pagsurat, poon 1513 B.C.E. sagkod mga 98 C.E.

An enot na 39 libro, na mga tres-kuartos kan laog kan Biblia, inaapod na Hebreong Kasuratan, ta iyan sa kadaklan isinurat sa lenguaheng iyan. An mga librong ini sa pankagabsan mababanga sa tolong grupo: (1) Makasaysayan, Genesis sagkod Ester, 17 libro; (2) Poetiko, Job sagkod Awit ni Salomon, 5 libro; asin (3) Makahula, Isaias sagkod Malaquias, 17 libro. An Hebreong Kasuratan mapadapit sa enot na kasaysayan kan daga asin nin katawohan patin sa kasaysayan kan suanoy na nasyon nin Israel poon sa kapinonan kaiyan sagkod sa ikalimang siglo B.C.E.

An natatadang 27 libro inaapod na Kristianong Griegong Kasuratan, ta iyan isinurat sa Griego, an internasyonal na lenguahe kaidto. Sa pundamental an mga iyan inareglar sono sa tema: (1) an 5 makasaysayan na libro—an mga Ebanghelyo asin Mga Gibo, (2) an 21 surat, asin (3) an Kapahayagan. An Kristianong Griegong Kasuratan nagkokonsentrar sa mga katokdoan asin aktibidad ni Jesu-Cristo asin kan saiyang mga disipulo kan enot na siglo C.E.