Kapitel Tin

Suma Kan Opo Teige a Prins fu den Prins?

1, 2. Fu san ede a fisyun di Danièl ben kisi na ini a di fu dri yari fu a tiri fu Bèlsasar de prenspari gi wi?

FEIFITENTI NA SEIBI yari pasa kaba sensi a tempel fu Yehovah na ini Yerusalem kisi pori. Bèlsasar nanga en papa, Nabonidus, e tiri makandra a Gran Kownukondre Babilon, a di fu dri grontapumakti fu Bijbel profeititori. * Danièl, a profeiti fu Gado, de na ini katibo na Babilon. Èn na ini a „di fu dri yari fu a kownuwroko fu Kownu Bèlsasar”, Yehovah e seni wan fisyun gi Danièl di e tyari wan tu finifini tori kon na krin fu a meki di a tru anbegi ben o meki kon bun baka.​—Danièl 8:1.

² A profeiti fisyun di Danièl ben si ben abi furu krakti na en tapu èn de tumusi prenspari gi wi di e libi na ini „a ten fu a kaba”. Na engel Gabrièl e fruteri Danièl: „Luku, mi e meki yu kon sabi san sa pasa na a kabapisi fu a krutu, bika a de gi a fasti ten fu a kaba” (Danièl 8:16, 17, 19, 27). Fu dati ede, meki wi go poti prakseri nanga furu belangstelling, na san Danièl ben si èn san a wani taki gi wi na ini a ten disi.

WAN MANSKAPU DI ABI TU TUTU

3, 4. Sortu meti Danièl ben si e tanapu na fesi pe a watra fu a liba e waka, èn san a e prenki?

³ „Mi ben bigin si na ini a fisyun; èn a ben pasa taki di mi ben si, dati mi ben de na ini a paleisi Susan, di de na ini a distrikt Elam; èn mi ben bigin si na ini a fisyun, èn misrefi ben de na pe a watra fu na Ulailiba e waka” (Danièl 8:2).  Efu Danièl ben de trutru na ini Susan (Susa) — a mamafoto fu Elam, di ben de so wan 350 kilometer na owstusei fu Babilon — noso efu wan fisyun ben meki a firi taki a ben de na ini Susan, no skrifi.

⁴ Danièl e go doro: „Di mi ben opo mi ai, dan mi ben si èn ¡luku! wan manskapu ben tanapu na fesi pe a watra fu a liba e waka, èn a ben abi tu tutu” (Danièl 8:3a). A no e tan wan dangratori gi Danièl suma na a manskapu. Na engel Gabrièl e taki baka ten: „A manskapu di yu ben si, di ben abi den tu tutu, e prenki den kownu fu Medo-Persia” (Danièl 8:20). Den Mediasma ben kon fu den hei bergikontren na owstusei fu Asiria èn na ini a bigin den Persiasma moro furu no ben abi fasti tanpresi na ini a kontren di de na noordsei fu a Golf fu Persia. Ma di a Gran Kownukondre Medo-Persia ben kon bigi, dan den sma di ben libi na ini, ben kon kweki wan tumusi aparti lobi gi diri sani.

5. Fa a tutu di „ben opo kon baka ten” ben kon moro langa?

⁵ „Den tu tutu ben langa,” Danièl e fruteri, „ma a wán ben langa moro a trawan, èn a moro langawan ben de a wán di ben opo kon baka ten” (Danièl 8:3b). A moro langa tutu di ben opo kon baka ten e prenki den Persiasma, ala di a tra tutu e prenki den Mediasma. Na ini a bigin den Mediasma ben moro tranga. Ma na ini 550 b.G.T., Sirus, a tiriman fu Persia, ben wini Kownu Astiages fu Media makriki. Sirus ben tyari den gwenti nanga den wet fu den tu pipel kon makandra, ben  meki den kownukondre fu den kon de wán, èn ben meki den kontren di den ben e wini na ini feti kon moro furu. Sensi a ten dati a gran kownukondre ben kon tron wan tu-pisi grontapumakti.

A MANSKAPU ABI BIGIMEMRE

6, 7. Fa a ben du kon taki „no wan werdri meti ben kan tan tanapu na . . . fesi” a manskapu?

⁶ Danièl e go doro fu taki fu a manskapu èn e taki: „Mi ben si taki a manskapu ben buku go na westsei èn na noordsei èn na zuidsei, èn no wan werdri meti ben kan tan tanapu na en fesi, èn no wan sma no ben de di ben frulusu puru na en anu. Èn a ben du soleki fa a wani, èn a ben abi bigimemre.”​—Danièl 8:4.

⁷ Na ini a fisyun na fesi di Danièl ben kisi, den ben prenki Babilon nanga a werdri meti di ben opo kon fu a se èn di ben gersi wan lew èn di ben abi den frei fu wan aka (Danièl 7:4, 17). A ben kon na krin taki na agersi meti dati no ben man tanapu na fesi „a manskapu” fu a nyun fisyun disi. Babilon ben fadon ini na anu fu Sirus a Bigiwan na ini 539 b.G.T. Pikinmoro 50 yari baka dati, „no wan werdri meti” noso politiek tiri ben man opo teige a Gran Kownukondre Medo-Persia — a di fu fo grontapumakti fu Bijbel profeititori.

8, 9. (a) Fa „a manskapu” ben „buku go na westsei èn na noordsei èn na zuidsei”? (b) San a buku Ester e taki fu a sma di ben tron kownu baka Kownu Darius I fu Persia?

⁸ Ala di a Grontapumakti Medo-Persia e kon fu „pe son e opo” — na owstusei — a ben du san a ben wani èn ben e „buku go na westsei èn na noordsei èn na zuidsei” (Yesaya 46:11). Kownu Kambises II, di ben tron kownu baka Sirus a Bigiwan, ben teki Egipti abra. A sma di ben tron kownu baka en ben de Kownu Darius I fu Persia, di ben go na westsei èn ben abra a se pasi Bosporus na ini 513 b.G.T. èn ben go nanga tranga na ini a kontren fu Europa, Trasia, di a mamafoto fu en ben de Bisantium (now Istanbul). Na ini a yari 508 b.G.T., a ben poti Trasia na en ondro èn a ben teki Masedonia abra na ini 496 b.G.T. So bun, na a ten fu Darius, a „manskapu” di  ben agersi Medo-Persia, ben teki kontren na dri prenspari sei: na noordsei go na ini Babilon nanga Asiria, na westsei pasa go na ini Pikin Asia èn na zuidsei go na ini Egipti.

⁹ Bijbel e kotoigi taki a Gran Kownukondre Medo-Persia ben bigi, fu di a e taki fu a sma di ben tron kownu baka Darius, Serkses I, leki „na Ahasferos di ben e tiri wan hondro twenti na seibi distrikt leki kownu fu India te go miti Etiopia” (Ester 1:1). Ma a gran kownukondre disi ben o broko kindi gi wan trawan èn ini a tori disi, a fisyun fu Danièl e tyari wan tu span tori kon na krin, di musu tranga a bribi di wi abi na ini a profeiti wortu fu Gado.

A BOKOBOKO E BUKU A MANSKAPU TROWE

10. Sortu meti ben buku „a manskapu” trowe na ini a fisyun fu Danièl?

¹⁰ Prakseri fa Danièl ben skreki fu a sani di a e si now. A tori e taki: „Mi, fu mi sei, ben tan poti prakseri èn ¡luku! wan bokoboko ben kon fu pe son e dongo na tapu heri grontapu, èn a no ben e fasi grontapu. Èn ini a tori fu a bokoboko, wan tumusi aparti tutu ben de na mindri den ai fu en. Èn a ben tan kon te na a manskapu di ben abi den tu tutu, di mi ben si tanapu na fesi pe a watra fu a liba e waka; èn a ben lon kon na en tapu na ini en bigi atibron. Èn mi ben si taki a e kon bun krosibei na a manskapu, èn a ben bigin sori bita-ati gi en, èn a ben bigin buku a manskapu trowe èn broko den tu tutu fu en, èn a manskapu no ben abi krakti fu tanapu na en fesi. Dati meki a ben trowe en go na gron èn ben trapu en masi, èn a manskapu no ben abi wan sma fu frulusu en puru na ini en anu” (Danièl 8:5-7). San ala den sani disi wani taki?

11. (a) San na engel Gabrièl ben fruklari fu „a bokoboko di abi furu wiwiri” nanga en „bigi tutu”? (b) Suma a tumusi aparti tutu ben prenki?

¹¹ No Danièl, no wi leki leisiman abi fu rai san a fisyun disi wani taki. „Èn a bokoboko di abi furu wiwiri e prenki a kownu fu Grikikondre; èn a bigi tutu di ben de na mindri den ai fu en e prenki a fosi kownu”, na engel Gabrièl e fruteri Danièl (Danièl 8:21). Na ini 336 b.G.T., a lasti kownu fu a Gran Kownukondre Persia, Darius III (Kodomanus), ben poti leki kownu. Na ini a srefi yari dati, Aleksander ben tron kownu  na ini Masedonia. A historia e sori taki Aleksander a Bigiwan ben sori fu de a fosi „kownu fu Grikikondre” di den ben taki fu en na fesi. Aleksander ben hari go esi-esi èn ben bigin fu „pe son e dongo”, noso na westsei, na ini a yari 334 b.G.T. A ben teki kontren abra èn ben buku „a manskapu” trowe, neleki a „no ben e meri grontapu”. Grikikondre ben tyari a makti di Medo-Persia ben abi pikinmoro tu yarihondro, kon na wan kaba, èn na so fasi Grikikondre ben kon tron a di fu feifi grontapumakti di prenspari na ini Bijbel. ¡Disi de wan tumusi aparti kontru fu profeititori di komoto na Gado!

12. Fa „a bigi tutu” fu na agersi bokoboko ben „broko”, èn san ben de den fo tutu di ben opo kon na ini en presi?

¹² Ma a makti fu Aleksander no ben o tan langa. A fisyun e tyari kon na krin moro fara: „Èn a bokoboko, fu en sei, ben kon abi bigimemre; ma so esi leki a ben kon tranga, a bigi tutu ben broko, èn baka dati fo ben opo kon na ini a presi fu dati na wan tumusi aparti fasi, go na den fo winti fu hemel” (Danièl 8:8). Gabrièl e fruklari a profeititori èn e taki: „Taki a wán dati ben broko, so taki te fu kaba fo ben opo kon na ini en presi: fo kownukondre fu en nâsi sa opo kon, ma no nanga a krakti fu en” (Danièl 8:22). Soleki fa ben taki na fesi kaba, dan na a heimarki fu a libi fu en leki winiman, Aleksander ben „broko”, noso dede, di a ben abi 32 yari nomo. Èn te fu kaba a bigi gran kownukondre fu en ben prati na mindri fo fu den legre-edeman fu en.

 WAN DANGRA PIKIN TUTU

13. San ben opo kon fu wan fu den fo tutu, èn fa a ben handri?

¹³ A tra pisi fu a fisyun e taki fu moro leki 2200 yari èn a kontru fu en e doro te na ini a ten disi. Danièl e skrifi: „Èn fu wán fu den [den fo tutu], wan tra tutu, wan pikin wan ben komoto kon na doro, èn a ben tan kon moro bigi te na zuidsei èn te pe son e opo èn te na a Tumusi Moi sani. Èn a ben tan kon moro bigi te leki a ben doro a legre fu hemel srefi, so taki a ben meki taki son wan fu a legre èn son wan fu den stari fadon kon na grontapu, èn dan a ben trapu den masi. Èn srefi gi a Prins fu a legre a ben abi bigimemre, èn den ben puru a fasti marki di ben de doronomo, na en, èn a fasti presi fu en santapresi den ben naki trowe. Èn fu fowtu ede, den ben gi wan legre srefi abra safrisafri, makandra nanga a fasti marki di ben de doronomo; èn a ben tan trowe waarheid go na grontapu, èn a ben du wan sani èn a ben abi bun bakapisi.”​—Danièl 8:9-12.

14. San na engel Gabrièl ben taki fu den sani di na agersi pikin tutu ben du, èn san ben sa pasa nanga a tutu dati?

¹⁴ Fosi wi kan frustan san den wortu di skrifi na tapusei wani taki, dan wi musu poti prakseri na a engel fu Gado. Baka di na engel Gabrièl ben sori taki fo kownukondre fu a gran kownukondre fu Aleksander ben o kon na a makti, a e taki: „Na a kabapisi fu a kownukondre fu den, te den sma di pasa a wet e tyari den du fu den kon na wan kaba, dan wan kownu sa opo kon di abi wan ogri fesi èn di e frustan dipibere-tori. Èn a krakti fu en musu kon tranga, ma no nanga en eigi krakti. Èn na wan tumusi moi fasi a sa tyari pori kon, èn a sa sori fu abi bun bakapisi èn sa handri soifri. Èn trutru a sa tyari den maktiwan go na pori, so srefi a pipel di de den santawan. Èn akruderi na inzicht fu en, a sa meki bedrigifasi waka bun na ini en anu trutru. Èn na ini en ati a sa abi bigimemre, èn na ini wan ten pe sma no e broko den ede, a sa tyari furu sma go na ini pori. Èn a sa opo teige a Prins fu den prins, ma sondro anu den sa broko en.”​—Danièl 8:23-25.

15. San na engel ben taigi Danièl fu du ini a tori fu a fisyun?

¹⁵ „Yu, fu yu sei, kibri a fisyun,” na engel e fruteri Danièl,  „bika a de gi furu dei ete” (Danièl 8:26). A kontru fu a pisi disi fu a fisyun no ben o pasa gi „furu dei” èn Danièl ben musu „kibri a fisyun”. Soleki fa a sori, dan a ben tan de wan dangratori gi Danièl san a fisyun ben wani taki. Ma na a momenti disi den „furu dei” dati seiker musu kon na wan kaba. Dati meki wi e aksi wisrefi: ’San a historia fu grontapu e sori ini a tori fu a kontru fu a profeiti fisyun disi?’

A PIKIN TUTU E KON TRANGA NA INI KRAKTI

16. (a) Fu sortu agersi tutu a pikin tutu ben opo kon? (b) Fa Rome ben kon tron a di fu siksi grontapumakti fu Bijbel profeititori, ma fu san ede a no ben de na agersi pikin tutu?

¹⁶ Soleki fa a historia e sori, dan a pikin tutu ben opo kon fu wan fu den fo agersi tutu — a wan di ben de moro fara go na westsei. Disi ben de a Griki kownukondre fu Legre-edeman Kasander di ben tiri Masedonia nanga Grikikondre. Baka ten a kownukondre fu Legre-edeman Lisimakus, a kownu fu Trasia nanga Pikin Asia, ben teki a kownukondre disi abra. Na ini a di fu tu yarihondro bifo wi Gewoon Teri, Rome ben teki den westsei pisi disi fu a Griki kontren abra. Èn pikinmoro na ini a yari 30 b.G.T., Rome ben teki ala den Griki kownukondre abra èn ben meki ensrefi tron a di fu siksi grontapumakti fu Bijbel profeititori. Ma a Gran Kownukondre Rome no ben de a pikin tutu fu a fisyun fu Danièl, bika a gran kownukondre dati no ben tan te leki „a fasti ten fu a kaba”.​—Danièl 8:19.

17. (a) San Ingrisikondre ben abi fu du nanga a Gran Kownukondre Rome? (b) Fa a Gran Kownukondre Ingrisikondre abi fu du nanga a Griki kownukondre fu Masedonia nanga Grikikondre?

¹⁷ Dan suma na a „kownu [dati di lobi fu feti èn] . . . . di abi wan ogri fesi”, soleki fa historia e sori? Fu taki en leti, Ingrisikondre ben kon fu a noord-westsei pisi fu a Gran Kownukondre Rome. Te na a bigin pisi fu a di fu feifi yarihondro G.T., yu ben abi distrikt fu Rome na ini san de now Ingrisikondre. Baka wan pisi ten, a Gran Kownukondre Rome ben go na baka, ma a libimakandra fu Grikikondre nanga Rome ben tan abi krakti na ini Ingrisikondre èn na ini tra pisi fu Europa di ben de na ondro a makti fu Rome. „Di a Gran  Kownukondre Rome ben fadon,” na so a skrifiman fu puwema nanga buku, Octavio Paz fu Meksikow, di ben wini wan Nobelprijs, ben skrifi, „dan a Kerki ben kon na ini en presi.” A ben taki moro fara: „Den Kerki papa èn so srefi den sabiman di ben kon baka ten ben moksi Griki filosofia nanga Kresten leri.” Èn a filosofiaman nanga sabiman ini wiskunde, Bertrand Russell, fu a di fu 20 yarihondro ben taki: „A libimakandra fu den Westsei kondre di bigin na den Grikisma, abi en gron tapu filosofia gwenti nanga sabidensi gwenti di ben bigin na ini Mileite [a Griki foto na ini Pikin Asia], tu nanga afu dusun yari pasa kaba.” So bun, wi ben kan taki dati den rutu fu a kulturu fu a Gran Kownukondre Ingrisikondre ben kon fu a Griki kownukondre fu Masedonia nanga Grikikondre.

18. San na a pikin tutu di ben tron „wan kownu . . . di abi wan ogri fesi” na ini a „ten fu a kaba”? Fruklari dati.

¹⁸ Pikinmoro na ini a yari 1763, a Gran Kownukondre Ingrisikondre ben wini den tranga feanti fu en, Spanyorokondre nanga Fransikondre. Sensi a ten dati a ben sori ensrefi leki a basi fu den se èn a di fu seibi grontapumakti fu Bijbel profeititori. Srefi baka di den 13 Amerkan kolonie ben kon fri fu Ingrisikondre na ini 1776 fu seti den Verenigde Staten fu Amerkankondre, toku a Gran Kownukondre Ingrisikondre ben gro kon abi wan di fu fo pisi fu a doti fu grontapu èn wan di fu fo fu den sma na grontapu. A di fu seibi grontapumakti  ben kon kisi moro krakti srefi di den Verenigde Staten fu Amerkankondre ben wroko makandra nanga Ingrisikondre fu kon de a tu-pisi Anglo-Amerkan grontapumakti. Na ekonomia sei èn na srudati sei, a makti disi trutru ben kon tron „wan kownu . . .  di abi wan ogri fesi”. Fu dati ede a pikin tutu di ben kon tron wan ogri politiekmakti na ini a „ten fu a kaba”, de na Anglo-Amerkan Grontapumakti.

19. San na „a Tumusi Moi sani” di ben kari na ini a fisyun?

¹⁹ Danièl ben si taki a pikin tutu „ben tan kon moro bigi” go na „a Tumusi Moi sani” (Danièl 8:9). A Pramisi Kondre, di Yehovah ben gi a pipel fu en di a ben frukisi, ben moi so kefalek taki den ben kari en „a tumusi moi sani fu ala kondre”, dati wani taki, fu heri grontapu (Esekièl 20:6, 15). Iya, Ingrisikondre ben teki Yerusalem abra tapu 9 december 1917, èn na ini a yari 1920, a Folkubontu ben gi Ingrisikondre a frantiwortu fu Palestina, wan sani di ben tan te leki 14 mei 1948. Ma a fisyun abi profeititori na ini di abi furu agersi prenki. Èn „a Tumusi Moi sani” di ben kari na ini a fisyun no e prenki Yerusalem, ma a situwâsi fu a pipel di Gado e si leki santawan na grontapu na ini a ten fu a di fu seibi grontapumakti. Meki wi go luku fa na Anglo-Amerkan Grontapumakti e pruberi fu tapu skreki gi den santawan.

A „PRESI FU EN SANTAPRESI” BEN NAKI TROWE

20. Suma na „a legre fu hemel” nanga „den stari” di a pikin tutu e pruberi fu meki fadon?

²⁰ A pikin tutu „ben tan kon moro bigi te leki a ben doro a legre fu hemel srefi, so taki a ben meki taki son wan fu a legre èn son wan fu den stari fadon kon na grontapu”. Akruderi a fruklari fu na engel, dan „a legre fu hemel” nanga „den stari” di a pikin tutu e pruberi fu meki fadon, na „a pipel di de den santawan” (Danièl 8:10, 24). Den „santawan” disi na den Kresten di kisi salfu nanga santa yeye. Fu di den ben kon na ini wan matifasi nanga Gado nanga yepi fu a nyun frubontu di ben bigin wroko nanga yepi fu a brudu fu Yesus Krestes di ben lon, meki den kon santa, krin èn poti aparti fu du diniwroko gi Gado wawan (Hebrewsma 10:10; 13:20). Fu di  Yehovah ben poti den leki erfgenaam nanga en Manpikin na ini a hemel erfenis, meki a e si den leki den santa (Efeisesma 1:3, 11, 18-20). Dati meki na ini a fisyun fu Danièl „a legre fu hemel” e sori go na a fikapisi fu den 144.000 „santawan” di de na grontapu èn di sa tiri na hemel nanga a Pikin Skapu.​—Openbaring 14:1-5.

21. Suma de na ini wan „santapresi” di a di fu seibi grontapumakti e pruberi fu pori?

²¹ Na ini a ten disi den wan di tan abra fu den 144.000 na sma na grontapu di e teki presi gi a „hemel Yerusalem” — a Kownukondre fu Gado di yu kan teki gersi wan foto — nanga a tempel seti fu en (Hebrewsma 12:22, 28; 13:14). Na a fasi disi den de na ini wan „santapresi” di a di fu seibi grontapumakti e pruberi fu trapu nanga futu èn e pruberi fu pori (Danièl 8:13). Di Danièl ben e taki dati a santapresi dati de so srefi „a fasti presi fu [Yehovah] en santapresi”, a e taki: „Den ben puru a fasti marki di ben de doronomo, na en [Yehovah], èn a fasti presi fu en santapresi den ben naki trowe. Èn fu fowtu ede, den ben gi wan legre srefi abra safrisafri, makandra nanga a fasti marki di ben de doronomo; èn a ben tan trowe waarheid na gron, èn a ben du sani èn a ben abi bun bakapisi” (Danièl 8:11, 12). Fa disi ben kon tru?

22. Fa a di fu seibi grontapumakti ben du wan „fowtu” di warti fu taki fu en, na ini a di fu Tu Grontapufeti?

²² San den Kotoigi fu Yehovah ben ondrofeni na a ten fu a di fu Tu Grontapufeti? ¡Den ben kisi hebi frufolgu! A ben bigin na ini Nazi kondre nanga Fasis kondre. Ma syatu baka dati, ’waarheid ben e trowe na gron’ na ini a heri bigi kontren fu a ’pikin tutu di a krakti fu en ben kon tranga’. „A legre” fu  Kownukondre preikiman nanga a wroko fu den fu preiki „a bun nyunsu”, ben tapu na ini pikinmoro ala den kondre di ben de na ondro a makti fu Ingrisikondre (Markus 13:10). Di den nâsi disi ben teki den man di ben kan feti gi den, dan den ben weigri fu gi fri fu srudatiwroko na den Kotoigi fu Yehovah èn den no ben sori lespeki gi a poti di Gado ben poti den dinari fu En na wroko na wan theokrasia fasi. Den getrow futuboi fu Yehovah na ini Amerkankondre ben kisi fu du nanga grupu sma di ben du ogri nanga den èn ben e lagi den na difrenti sortu fasi. Fu taki en leti, a di fu seibi grontapumakti ben pruberi fu puru wan srakti-ofrandi fu prèise — „a froktu fu den mofobuba” — di a pipel fu Yehovah e tyari doronomo gi en leki „a fasti marki di ben de doronomo” fu na anbegi fu den (Hebrewsma 13:15). Na so fasi a grontapumakti dati ben du a „fowtu” fu go nanga tranga na ini a kontren di a Moro Hei Gado abi reti na tapu — „a fasti presi fu en santapresi”.

23. (a) Fa na Anglo-Amerkan Grontapumakti ben opo „teige a Prins fu den prins” na ini a di fu Tu Grontapufeti? (b) Suma na „a Prins fu den prins”?

²³ A pikin tutu ben abi bigimemre „gi a Prins fu a legre”, di a ben frufolgu „den santawan” na a ten fu a di fu Tu Grontapufeti. Noso soleki fa na engel Gabrièl e taki, a ben opo „teige a Prins fu den prins” (Danièl 8:11, 25). A titel „a Prins fu den prins” e gebroiki gi Yehovah Gado wawan. A Hebrew wortu sar, di vertaal nanga „prins”, abi fu du nanga wan werkwortu di wani taki „abi makti”. Boiti taki a e sori go na a manpikin fu wan kownu noso wan sma di kon fu wan kownu famiri, a wortu e gebroiki tu gi wan edeman noso wan prenspari sma. A buku Danièl e kari tra prins di de engel — fu eksempre Mikaèl. Gado na a Moro Prenspari Prins fu ala den sortu prins dati. (Danièl 10:13, 21; teki gersi Psalm 83:18.) ¿Ma wi kan prakseri taki iniwan sma ben kan opo teige Yehovah — a Prins fu den prins?

„A SANTAPRESI” BEN TYARI KON NA INI A YOISTI SITUWÂSI

24. Sortu dyaranti Danièl 8:14 e gi wi?

²⁴ ¡No wan sma kan opo teige a Prins fu den prins — no  srefi wan kownu di „abi wan ogri fesi” leki na Anglo-Amerkan Grontapumakti! A pruberi di a kownu disi pruberi fu pori a santapresi fu Gado no waka bun. Baka wan pisi ten fu „tu dusun dri hondro neti nanga mamanten”, a boskopuman di de wan engel e taki, „seiker den sa tyari a santapresi kon na ini en yoisti situwâsi” noso „sa opo kon leki winiman”.​—Danièl 8:13, 14; The New English Bible.

25. O langa a profeiti pisi ten fu 2300 dei de, èn nanga sortu sani di feni presi a musu abi fu du?

²⁵ Den 2300 dei de wan profeiti pisi ten. Dati meki wan profeiti yari fu 360 dei de ini a tori (Openbaring 11:2, 3; 12:6, 14). Fu dati ede den 2300 dei disi, ben sa de 6 yari, 4 mun nanga 20 dei. O ten a pisi ten disi ben de? We, na ini den yari 1930 te go miti 1939, a pipel fu Gado ben bigin ondrofeni moro frufolgu na ini difrenti kondre. Èn na ini a di fu Tu Grontapufeti, den Kotoigi fu Yehovah ben kisi ogri-ati frufolgu na ini den kondre fu a tu-pisi Anglo-Amerkan grontapumakti. Fu san ede? Bika den ben e hori nomonomo taki den ben sa „gi yesi na Gado leki tiriman moro leki na libisma” (Tori fu den Apostel 5:29). Fu dati ede den 2300 dei musu abi fu du nanga a feti disi. * Ma san wi kan taki fu a bigin nanga a kaba fu a profeiti pisi ten disi?

26. (a) Sensi o ten, a moro fruku ten, wi musu bigin teri den 2300 dei? (b) O ten a pisi ten fu 2300 dei ben kon na wan kaba?

²⁶ Efu „a santapresi” musu „tyari” noso meki kon bun baka leki fa a ben musu de, dan den 2300 dei musu bigin di a santapresi ben de fosi na ini a „yoisti situwâsi” akruderi a fasi fa Gado e si sani. A moro fruku pisi ten ben de 1 yuni 1938 di The Watchtower ben tyari pisi 1 fu na artikel „Organization” (Organisâsi) kon na doro. Pisi 2 ben kon na ini na uitgave fu 15 yuni 1938. Te wi e teri 2300 dei (6 yari, 4 mun nanga 20 dei na tapu a Hebrew kalender) fu 1 yuni noso 15 yuni 1938, dan dati e tyari  wi go na 8 oktober noso 22 oktober 1944. Na a fosi dei fu wan spesrutu konmakandra di ben hori na Pittsburgh, Pennsylvania, Amerkankondre, tapu 30 september nanga 1 oktober 1944, a presidenti fu a Waktitoren Genootschap ben taki fu a tori: „The Theocratic Alignment Today” (A theokrasia fasi fu si sani na ini a ten disi). Na a alayari konmakandra fu a korporâsi di ben hori 2 oktober, a handvest fu a Genootschap ben kenki nanga a marki fu tyari en kon moro krosibei na wan theokrasia seti soleki fa a wet ben sa gi pasi fu du dati. Di den ben tyari markitiki fu Bijbel, di den ben frustan moro krin, kon na doro, dan syatu baka dati sani ben orga moro bun na theokrasia fasi na ini den gemeente fu Yehovah Kotoigi.

27. Sortu buweisi ben de taki „a fasti marki di ben de doronomo” ben skotu na ini den yari fu a di fu Tu Grontapufeti di ben furu nanga frufolgu?

²⁷ Na ini a ten fu a di fu Tu Grontapufeti di ben bigin na ini 1939, a tyari di „a fasti marki di ben de doronomo” ben tyari leki ofrandi na a santapresi fu Gado, ben skotu srefisrefi fu frufolgu ede. Na ini 1938 a Waktitoren Genootschap ben abi 39 bijkantoro di ben luku a wroko fu den Kotoigi na heri grontapu, ma na a ten fu 1943, soso 21 bijkantoro ben de. A gro ini a nomru fu Kownukondre preikiman na ini a pisi ten dati no ben bigi tu.

28, 29. (a) Sortu sani ben feni presi na ini na organisâsi fu Yehovah di a di fu Tu Grontapufeti ben doro en kaba? (b) San wi kan taki fu den ogri-ati sani di a feanti ben pruberi fu du fu pori „a santapresi”?

²⁸ Soleki fa wi si kaba, dan na ini den lasti mun fu a di fu Tu Grontapufeti, den Kotoigi fu Yehovah ben sori a fasti bosroiti fu den baka fu gi glori na a tirimakti fu Gado, fu di den e dini en leki wan theokrasia organisâsi. A ben de nanga a sani dati na prakseri taki den ben bigin seti sani baka na ini 1944 ini a tori fu a wroko fu den èn fu a tiri strukturu fu den. Te yu luku en bun, dan The Watchtower fu 15 oktober 1944 ben abi wan artikel na ini di ben nen „Organized  for Final Work” (Orga gi a lasti wroko). Disi nanga tra artikel fu a srefi pisi ten di e taki fu a diniwroko, ben sori taki den 2300 dei ben kon na wan kaba èn taki „a santapresi” ben de na ini en „yoisti situwâsi” baka.

²⁹ Den ogri-ati sani di a feanti ben pruberi fu du fu pori a „santapresi”, no ben go doro kwetikweti. Iya, den „santawan” di ben tan abra na grontapu, makandra nanga den kompe fu den fu a „bigi ipi”, ben wini (Openbaring 7:9). Èn a santapresi, di de na ini en yoisti theokrasia situwâsi, e tan du santa diniwroko gi Yehovah now.

30. San sa pasa heri esi nanga a „kownu . . . di abi wan ogri fesi”?

³⁰ Na Anglo-Amerkan Grontapumakti abi en posisi te nanga now ete. „Ma sondro anu den sa broko en”, na engel Gabrièl ben taki (Danièl 8:25). Heri esi a di fu seibi grontapumakti disi fu Bijbel profeititori — a „kownu [disi] . . . di abi wan ogri fesi” — sa broko, no nanga yepi fu libisma anu, ma nanga krakti di hei moro di fu libisma, na Armagedon (Danièl 2:44; Openbaring 16:14, 16). ¡O prisiri a de fu sabi taki a soevereiniteit fu Yehovah Gado, a Prins fu den prins, sa kon regtfardiki na a ten dati!

[Futuwortu]

SAN YU BEN KON FRUSTAN?

• San den sani di e kon now e prenki?

„A manskapu” di abi „tu tutu”.

„A bokoboko di abi furu wiwiri” nanga en „bigi tutu”.

Den fo tutu di e opo kon na ini a presi fu „a bigi tutu”.

A pikin tutu di ben opo kon fu wan fu den fo tutu.

• Fa na Anglo-Amerkan Grontapumakti ben pruberi fu pori „a santapresi” na ini a di fu Tu Grontapufeti, èn a ben abi bun bakapisi?

[Aksi fu a tori disi]

[Karta/Prenki na tapu bladzijde 166]

(Efu yu wani si pe den sani disi skrifi, luku a buku)

Gran Kownukondre Medo-Persia

MASEDONIA

EGIPTI

Memfis

ETIOPIA

Yerusalem

Babilon

Ekbatana

Susa

Persepolis

INDIA

[Karta/Prenki na tapu bladzijde 169]

(Efu yu wani si pe den sani disi skrifi, luku a buku)

Gran Kownukondre Grikikondre

MASEDONIA

EGIPTI

Babilon

Indusliba

[Karta na tapu bladzijde 172]

(Efu yu wani si pe den sani disi skrifi, luku a buku)

Gran Kownukondre Rome

INGRISIKONDRE

ITALIAKONDRE

Rome

Yerusalem

EGIPTI

 [Prenki di e tapu heri bladzijde 164]

 [Prenki na tapu bladzijde 174]

Wan tu prenspari sma fu na Anglo-Amerkan Grontapumakti:

1. George Washington, fosi presidenti fu Amerkankondre (1789-1797)

2. Koningin Victoria fu Ingrisikondre (1837-1901)

3. Woodrow Wilson, presidenti fu Amerkankondre (1913-1921)

4. David Lloyd George, fosi minister fu Ingrisikondre (1916-1922)

5. Winston Churchill, fosi minister fu Ingrisikondre (1940-1945, 1951-1955)

6. Franklin D. Roosevelt, presidenti fu Amerkankondre (1933-1945)