Munat jilat kullaka:

¿Jiwasajj Diosar jakʼachassnati? Yaqhepajj akham sapjjewa: “Janiw Diosar kunjamatsa jakʼachasksnati, jupajj wali jayankiwa” sasa. Ukat yaqhepasti, “janiw Diosar jakʼachasiñatakejj askïktanti” sasaw sapjjaraki. Ukampis Bibliajj akham sistuwa: “Diosar jakʼachasipjjam, jupasti jumanakarojj jakʼachasirakiniwa” sasa (Santiago 4:8). Ukatjja, Diosajj yupaychirinakapar akham siwa: “Naya, juman Tatitu Diosamaw, jumarojj amparat wayjjarsma, irparaksma; nayaw saraksma: ‘Jan ajjsaramti, nayaw yanapaskäma’” sasa (Isaías 41:13).

Ukampis ¿kunjamatsa Diosar jakʼachassna? Kunapachatï mä amigompi wali sum apasiñ muntan ukhajja, sum nayraqat uñtʼtanjja, ukat wali respetompiw uñjaraktanjja. Ukhamasti, Jehová Diosar jakʼachasiñatakejj Bibliat sum yatjjatañasawa, uka qollan Libronwa kunjam Diosas ukajj sum qhanañchasi. Jupajj taqe chʼamani, taqe kuns cheqapar uñjiri, wali yatiñani ukat wali munasir Diosawa. Ukat janirakiw yupaychirinakaparojj jaytjkiti. Jiwasatï ukanakat lupʼiñäni ukat Jesucristo Yoqapajj kunjamsa aka Oraqenkkasajj ukanak uñachtʼayäna, kunsa jiwasajj yateqassna ukanaksa lupʼirakiñäni ukhajja, jukʼampiw Diosar jakʼachasiñäni. Ukatjja taqe kunjjar Munañani suma Apnaqerisarjama ukat Awkisarjamaw uñjarakiñäni.

Aka librow Jehová Diosar jukʼampi jakʼachasiñ yanaptʼätamjja. Cheqasa, alajjpachankir Awkisar wiñay wiñaya yupaychañatakejj jupampi sum apasiñasawa.