Minahal nga Magbabasa:

Gibati ba nimong suod sa Diyos? Alang sa daghan, daw imposible gyod kana. Ang uban naghunahuna nga dili siya interesado nila; ang uban pod nagtuo nga dili gyod sila takos nga mahimong higala sa Diyos. Bisan pa niana, ang Bibliya mahigugmaong nag-awhag nato: “Duol sa Diyos, ug siya moduol kaninyo.” (Santiago 4:8) Gipasaligan pa gani niya ang iyang mga magsisimba: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayawg kahadlok. Ako motabang kanimo.’”—Isaias 41:13.

Sa unsang paagi makabaton tag suod nga relasyon sa Diyos? Ang suod nga panaghigalaay nagdepende sa pagkaila sa tawo, pagpabili ug pagdayeg sa iyang nindot nga mga kinaiya. Busa aron masuod sa Diyos, kinahanglan natong tun-an ang iyang mga hiyas ug panghunahuna nga gipadayag sa Bibliya. Ang pagpamalandong kon giunsa pagpakita ni Jehova ang matag usa sa iyang mga hiyas, kon sa unsang paagi hingpit kining gisundog ni Jesu-Kristo, ug kon sa unsang paagi maugmad sab nato kini, makapasuod nato sa Diyos. Masabtan nato nga si Jehova mao ang may katungod ug hingpit nga Soberano sa uniberso. Dugang pa, siya mao ang Amahan nga gikinahanglan natong tanan. Kay siya gamhanan, makataronganon, maalamon, ug mahigugmaon, siya dili gyod mobiya sa matinumanon niyang mga anak.

Hinaot nga kining libroha motabang nimo nga masuod kanunay kang Jehova nga Diyos ug maugmad ang walay kataposang panaghigalaay uban kaniya, aron mabuhi ka sa pagdayeg kaniya hangtod sa hangtod.