Ser Lekter,

Eski ou santi ou pros avek Bondye? Pour bokou dimoun sa i paret vreman enposib. Serten i krwar ki i tro lwen avek zot; lezot i sitan santi zot pa vo nanryen ki zot napa okenn lespwar pour apros avek Bondye. Me Labib i ankouraz nou: “Apros avek Bondye, e i ava apros avek zot.” (Zak 4:8) I menm asir son bann adorater: “Mwan, Zeova ou Bondye, mon pe tyonbo ou lanmen drwat. Mwan sa Enn ki pe dir ou, ‘Pa bezwen per. Mwan menm mon pou ed ou.’”​—Izai 41:13.

Konman nou kapab esey fer zefor pour ganny en relasyon pros avek Bondye? Dan nenport lanmitye ki nou devlope, sa relasyon i baze lo konn sa dimoun, admir e apresye son bann kalite ki i annan. Alors, bann kalite Bondye ek lafason ki i azir, parey i ganny revele dan Labib, i bann size enportan pour etidye. Reflesir lo lafason ki Zeova i demontre sak son bann kalite, dekouver konman Zezi ti reflekte zot parfetman, e konpran konman nou osi nou kapab devlop zot, pou fer nou vin pli pros avek Bondye. Nou pou vwar ki Zeova i merite ganny konsidere pli o dan liniver e i sa enn ki vreman apropriye pour sa pozisyon. Deplis, i sa Papa ki nou tou nou bezwen. Etan donnen ki i for, zis, saz, e i kontan nou, i pa zanmen abandonn son bann zanfan fidel.

Fotespere ki sa liv i ed ou pour vin pli pros ankor avek Bondye Zeova, e pour devlop en relasyon avek li ki pa pou zanmen kase. Alor, ou ava kapab viv pour loue li pour touzour.